சுருக்கு சுருக்குனு குத்துற மாதிரி தலை வலிக்குதா..? உடனே போக்கும் 8 டிப்ஸ்..!

தலைவலி என்பது பலர் அன்றாடம் சமாளிக்கும் ஒரு பொதுவான பிரச்சனை. இவை, இயல்பான பிரச்சனையாக இருந்தாலும், அவை உங்கள் அன்றாட வாழ்க்கையை சீர்குலைக்கும். மனச்சோர்வு, உடல்சோர்வு, உணவு பழக்கம் போன்ற பலவித காரணங்களால் தலைவலி ஏற்படுகிறது. பல வகையான தலைவலிகள் இருந்தாலும், டென்ஷனால் உண்டாகும் தலைவலி மிகவும் பொதுவானது. தலைவலி என்றது, நம்மில் பலர் யோசிக்காமல் மாத்திரைகளை வாங்கி போடுவோம். அது வலியையும் குறைக்கும். ஆனால், அந்த நிலை தொடர்ந்தால் பல ஆபத்துக்கள் ஏற்படும். தலைவலியை போக்கும் சில வீட்டு வைத்தியங்கள் பற்றி இங்கு காணலாம்.

வெந்நீர் குளியல் : தலைவலி இருக்கும் போது கழுத்து மற்றும் தலை பகுதியில் வெந்நீர் பையை கொண்டு ஒத்தடம் தருவது நல்ல பலனை கொடுக்கும். மேலும், வெதுவெதுப்பான நீர் கொண்டு தலைக்கு குளிப்பதும் தலைவலியில் இருந்து நிவாரணம் பெற உதவும்.

மசாலா டீ : சுக்கு, கொத்தமல்லி விதை, கருப்பட்டி அல்லது வெல்லம் கொண்டு தயாரிக்கப்படும் டீ-யினை குடித்தால் தலைவலியில் இருந்து நிவாரணம் பெறலாம். மேலும், தலைவலி காரணமாக ஏற்படும் மயக்கம், உடல் சோர்வு போன்ற பிரச்சனைகளை போக்கவும் இந்த சுக்கு டீ உதவும்.

தண்ணீர் பருகுங்கள் : போதுமான அளவு தண்ணீர் குடிப்பது தலைவலி பிரச்சனையில் இருந்து நிவாரணம் பெற உதவும். இல்லையெனில், உடலை நிரேற்றத்துடன் வைத்துக்கொள்ள உதவும் இளநீர் மற்றும் பழச்சாறுகளை பருகுவதும் நல்ல பலன் தரும். ஏனென்றால், உடலில் தண்ணீர் குறைவாக இருந்தாலும் சில சமயங்களில் தலைவலி அல்லது தலை கணம் போன்ற உணர்வுகள் ஏற்படும்.

பற்றுப்போடுதல் : இரண்டு கப் தண்ணீரை நன்கு கொதிக்க வைத்து, அதில் 2 சொட்டு லாவண்டர் எண்ணெய் மற்றும் ஒரு சொட்டு ஆலிவ் எண்ணெய் சேர்த்து கலந்து, பின்னர் ஒரு காட்டன் துணியை அந்த கலவையில் முக்கி, அதை தண்ணீர் இல்லாமல் பிழிந்து, நெற்றிக்கு பற்று போட நல்ல பலன் கிடைக்கும்.

ஆயில் மசாஜ் : 3 சொட்டு மிளகுக்கீரை எண்ணெயுடன் ஒரு சொட்டு பாதாம் எண்ணெய் அல்லது ஆலிவ் எண்ணெய் சேர்த்து நெற்றி மற்றும் கழுத்து பகுதியில் மசாஜ் செய்தால் தலைவலி படிப்படியாக குறையும்.

நெற்றிக்கு பற்று போடுதல் : ஒரு கப் கொதிக்க வைத்த நீரில் அரை கப் ஆப்பிள் சிடர் வினிகர் சேர்த்து, பின்னர் ஒரு பருத்தி துண்டை இதில் நனைத்து நன்றாக புழிந்த பின் நெற்றிக்கு பற்று போட தலைவலியில் இருந்து நிவாரணம் பெறலாம்.

சந்தனப்பொடி வைத்தியம் : சந்தனத்தை தண்ணீர் சேர்த்து மை போல் அரைத்து நெற்றிக்கு பற்று போட, தலைவலி விரைவாக குறையும். சந்தனத்தில் உள்ள குளிர்ச்சியூட்டும் தன்மை தலைவலியில் இருந்து நிவாரணம் பெற உதவுகிறது.

ரோஸ்மேரி எண்ணெய் மசாஜ்: அழற்சி எதிர்ப்பு பண்புகள் கொண்ட ரோஸ்மேரி எண்ணெய் கொண்டு தலைக்கு மசாஜ் செய்ய, தலைவலியில் இருந்து நிவாரணம் பெறலாம். தலைக்கு மசாஜ் செய்ய பயன்படுத்தும் எண்ணெயுடன் ஒரு சொட்டு ரோஸ்மேரி எண்ணெய் சேர்த்து மசாஜ் செய்ய தலைவலி மட்டும் அல்ல முடி உதிர்வும் குறையும்.