சொத்தைப்பல் வலியால் கடுமையாக அவதிப்படுகிறீர்களா..? எளிமையான சில வீட்டுக்குறிப்புகள்...

வாய் சுகாதாரம்தான் ஒட்டு மொத்த ஆரோக்கியத்திற்கும் முக்கிய பாதையாக இருக்கிறது. அதை ஆரோக்கியமாக வைத்துக்கொண்டாலே பாதி பிரச்னைகளை தவிர்க்கலாம். அந்த வகையில் சுகாதாரமற்ற பழக்கங்கள் மட்டுமன்றி உணவுகள் மூலமாகவும் வாயில் சொத்தைப்பல் வர காரணமாக இருக்கின்றன. இது பற்களை அரித்து எந்த உணவையும் சாப்பிட முடியாமல் தீராத வலியையும் தரும். ஆரம்ப நிலை சொத்தைப் பல் வலி எனில் வீட்டுக் குறிப்புகளைக் கொண்டு சரி செய்யலாம். அவை என்னென்ன பார்க்கலாம்.

பூண்டு : பூண்டு பல்லுடன் இரண்டு கல் உப்பு வைத்து பாதிக்கப்பட்ட பல் மேல் வைத்து வாயை மூடிவிடுங்கள். இதனால் பூண்டில் இருக்கும் ஆண்டி பாக்டீரியாக்கள் வலியைக் குறைத்து சற்று இலகுவாக இருக்கும்.

சுடுநீர் : வெதுவெதுப்பான சுடுநீர் கூட பல் வலிக்கு இதமாக இருக்கும். எனவே வெதுவெப்பான நீருடன் அரை ஸ்பூன் உப்பு சேர்த்து வாயை நன்கு கொப்பளித்து துப்புங்கள். இதை வலி வரும்போது மட்டுமல்ல பொதுவாகவே உணவு சாப்பிட்டபின் செய்து வந்தால் உணவுத் துகள்கள் சிக்கி இருந்தாலும் வெளியேறும். சொத்தைப் பல் வருவதையும் தவிர்க்கலாம்.

கற்பூரம் : கற்பூரமும் சொத்தைப் பல் வலிக்கு நிவாரணி. எனவே அதை சிறு கட்டி எடுத்துக்கொண்டு வலியை உண்டாக்கும் பல்லின் மீது வைக்க வலி குறையும்.

கிராம்பு : கிராம்பை வலி இருக்கும் பல்லின் மீது வைத்து வாயை மூடிவிட பல் ஈறுகள் ஜிவ்வென இழுக்கும். இதனால் வலி சற்று குறைந்து இலகுவாக இருக்கும். கிராம்பு எண்ணெய் இருந்தாலும் அதை பல் மீது தடவலாம்.

மஞ்சள் : மஞ்சள் ஆண்டி பாக்டீரியா மற்றும் ஆண்டி செப்டிக் பண்புகளை உள்ளடக்கியதால் அதை கொஞ்சமாக எடுத்து பல்லின் மீது தடவி சிறிது நேரம் கழித்து வெதுவெதுப்பான நீரினால் வாயைக் கொப்பளித்து விடுங்கள். இதனால் ஈறுகளும் ஓய்வு பெறும்.

குறிப்பு : மேலே குறிப்பிட்டுள்ள வீட்டு வைத்தியங்கள் வலிக்கான தற்காலிக குறிப்புகளே தவிற நிரந்தர தீர்வு அல்ல. எனவே கடுமையான பாதிப்பாக இருக்கும் பட்சத்தில் மருத்துவரை அணுகுங்கள். சாதாரணமாக விட்டுவிட்டால் அது தீவிர பிரச்னையை உண்டாக்கும்.