"நீண்ட நேரம் உட்கார்ந்து வேலை பார்ப்பவரா நீங்கள்? இந்த பாதிப்புகள் நிச்சயம் வரலாம்".. உஷார்.!

கொரோனா தொற்று எப்பொழுது வந்ததோ, அப்பொழுது இருந்தே நீண்ட நேரம் கணினி முன்பாக உட்கார்ந்து வேலைப்பார்க்கும் நிலை நாளுக்கு நாள் அதிகரித்து வருகிறது. அலுவலகத்தில் கூட டீ பிரேக், மதிய உணவு இடைவேளை என சில மணி நேரங்களாவது நமக்கு நேரம் கொஞ்சம் ஃப்ரியாக இருப்பதற்கு நேரம் கிடைக்கும்.

ஆனால் இந்த நிலை  வீட்டில் இருந்து வேலை பார்ப்பவர்களுக்கு இப்பொழுது கொஞ்சம் கூட இல்லை. இப்படி நீண்ட நேரம் உட்கார்ந்து வேலைப் பார்க்கும் பொழுது உடல் மற்றும் மன ஆரோக்கியத்தில் பல பாதிப்புகள் ஏற்படும் என எச்சரிக்கின்றனர் மருத்துவர்கள். வேலை மட்டுமில்லை நம்முடைய பெரும்பாலான பொழுதுபோக்குகள் டிவி, மொபைல் அல்லது லேப்டாக்களில் தான்.

இதுக்குறித்து அமெரிக்கன் ஹார்ட் அசோசியஷேன் தெரிவித்த தகவலின் படி, கடந்த 1950 முதல் உட்கார்ந்த நிலையில் வேலைப்பார்ப்பது என்பது 83% அதிகரித்துள்ளது என தெரியவந்துள்ளது. இந்த சூழலில் நீண்ட நேரம் உட்கார்ந்தே வேலைப் பார்ப்பதால் என்னென்ன பாதிப்புகள்? ஏற்படுகிறது என்பது குறித்து இங்கே அறிந்து கொள்வோம்..

ஆயுட்காலம் குறைதல்... வீடுகளில் அல்லது அலுவலகத்தில் நீண்ட நேரம் வேலைப்பார்த்தால் எப்படி உங்களின் ஆயுள்காலம் குறைகிறது? என நீங்கள் யோசிக்கலாம். இந்த கூற்று உண்மை தான். நீங்கள் அதிக நேரம் கணினி அல்லது லேப்டாப் முன்னிலையில் உட்கார்ந்து வேலைப்பார்க்கும் போது இதய நோய் சம்பந்தப்பட்ட பிரச்சனைகள், நீரிழிவு, உயர் ரத்த அழுத்தம் ஏற்படுகிறது. இதனால் உங்களின் ஆயுட்காலம் குறைகிறது. இதோடு மனநலம் சார்ந்த பிரச்சனைகள், பதட்டம் அல்லது மனச்சோர்வு போன்றவை உருவாகும் அபாயமும் அதிகரிக்கிறது.

எடை அதிகரிப்பு : Healthline.com இன் அறிக்கையின்படி, நாள் முழுவதும் நாம் உட்கார்ந்திருக்கும்போது, லிப்போபுரோட்டீன் லிபேஸ் போன்ற மூலக்கூறுகள் வெளியிடப்படுவதில்லை. இவை தான் நம்முடைய எடை அதிகரிக்கும் அபாயத்தை ஏற்படுத்துகின்றன.

நாள் முழுவதும் சோர்வு :என்ன தான் உடல் உழைப்பு இல்லாத வேலை என்றாலும், நீங்கள் நாள் முழுவதும் உட்கார்ந்து இருக்கும் போது சோர்வாக இருக்கும் மனநிலையை அடைகிறீர்கள். ஏழு முதல் எட்டு மணி நேரத்திற்கு மேலாக நீங்கள் உட்கார்ந்த இடத்திலேயே வேலைப்பார்ப்பது உங்களது தினசரி வழக்கத்தை சீர்குலைக்கின்றது.

தோரணை சமநிலையின்மை : அதிக நேரம் அமர்ந்திருக்கும் போது, நாம் எப்போதும் நேராக உட்கார்ந்திருக்க முடியாது. இதனால் முதுகுத்தண்டில் உள்ள டிஸ்க்குளில் சுருக்களை ஏற்படுத்தி, நாள்பட்ட முதுகு வலியை நமக்கு ஏற்படுத்துகிறது.

முதுகு மற்றும் கழுத்தில் வலி : பொதுவாக நீண்ட நேரம் உட்கார்ந்திருந்தாலே உங்களது முதுகில் வலி ஏற்படும். ஆம் அதிக நேரம் உட்கார்ந்திருக்கும் போது கீழ் முதுகு, நரம்புகள், தசை நாண்கள் போன்றவற்றில் அழுத்தம் ஏற்படுவதால் முதுகு வலி ஏற்படுகிறது. இதோடு அதிக நேரம் லேப்டாப் முன்னிலையில் உட்கார்ந்து வேலைப்பார்க்கும் போது கழுத்திலும் வலி ஏற்படுகிறது.

இதுப்போன்ற பல பிரச்சனைகள் ஏற்படும் என்பதால், நீங்கள் அதிக நேரம் உட்கார்ந்து வேலைப்பார்க்க வேண்டாம். அதற்கு மாற்றாக சிறிது நேரம் இடைவெளி விட்டு உங்களது பணியை மேற்கொள்ளுங்கள். இதோடு உடற்பயிற்சி செய்வதும் உங்களது உடல் ஆரோக்கியத்திற்கு சிறந்ததாக அமையும்.