வெயில் காலத்தில் ஓட்டப்பயிற்சி செய்வது கடினமாக உள்ளதா..? இந்த டிப்ஸை ஃபாலோ பண்ணுங்க...

வெயில் உச்சத்தில் இருக்கும் சமயத்தில் நாம் வெளியே செல்வது நமக்கு பல விதமான உடல் நலப் பிரச்சினைகளை கொண்டு வந்து சேர்க்கும். குறிப்பாக ஓட்டப்பயிற்சி வீரர்களுக்கு பாதிப்புகள் சற்று அதிகமாக இருக்கும். வெயிலின் பாதிப்பால் ஓட்டப்பயிற்சி வீரர்கள் தங்களுடைய இலக்கை குறிப்பிட்ட நேரத்தில் அடைய முடியாமல் போகலாம். இருப்பினும் சில முன்னெச்சரிக்கை நடவடிக்கைகளை கையாண்டால் நாம் இந்தப் பிரச்சினையை எதிர்கொள்ள முடியும்.

அதிகாலையில் ஓட்டப்பயிற்சி : அதிகாலையில் பொழுது விடியத் தொடங்கும்போதே நீங்கள் ஓட்டப்பயிற்சியை தொடங்கிவிட வேண்டும். இவ்வாறு செய்வதால் உங்கள் எண்ண ஓட்டம் மேம்படும். நாள் முழுவதும் நீங்கள் ஆற்றல் மிகுந்தவராக காணப்படுவீர்கள்.

சூழலுக்கு தகுந்தாற்போல மாற்றிக் கொள்ளுதல் : குளிர்காலம் என்றாலும், கோடைகாலம் என்றாலும் சூழலுக்கு தகுந்தாற்போல உங்கள் உடல் தன்னை மாற்றிக் கொள்ளும். தொடக்கத்தில் உங்கள் இலக்குகளில் நீங்கள் சில சமரசங்களை செய்து கொள்ள வேண்டியிருக்கும். ஆனால், காலச்சூழலுக்கு ஏற்றாற்போல உடல் மாறிய பிறகு உங்கள் இலக்கை நீங்கள் அதிகரித்துக் கொள்ளலாம்.

தண்ணீர் அருந்துவது அவசியமானது : உடலில் நீர்ச்சத்து பற்றாக்குறை இருக்கவே கூடாது. சூரிய வெப்பமானது உங்கள் உடலில் நீர்ச்சத்தை இழக்கச் செய்யும். ஓட்டப்பயிற்சி வீரர்கள் தங்கள் பயிற்சியின் போது அல்லது பயிற்சியின் நிறைவின்போது தண்ணீர் அருந்த வேண்டும் என்ற கட்டாயம் ஏற்படும். ஆனால், பயிற்சிக்கு செல்வதற்கு முன்பாகவே போதுமான தண்ணீர் அருந்திவிட வேண்டும்.

சன்ஸ்கிரீன் அணிய வேண்டும் : ஒவ்வொரு முறை ஓட்டப்பயிற்சி செல்லும்போதும் சன்ஸ்கிரீன் அணிய வேண்டும். சூரிய ஒளிக் கதிர்வீச்சுகளில் இருந்து உங்களுக்கு இது பாதுகாப்பை தரும்.

கூட்டு சேர்ந்து ஓடுங்கள் : தனியாக ஓடுவதைக் காட்டிலும் யாருடனாவது இணைந்து பயிற்சி செய்யலாம். அல்லது குழுவாக ஓடலாம். இது உங்களுக்கு உத்வேகத்தை அளிக்கும்.

தொப்பி அணிந்து கொள்ளலாம் : வெயிலின் தாக்கத்தில் இருந்து தப்பிக்க ஓடும்போது தொப்பி அணிந்து ஓடலாம். சூரிய வெப்பத்தில் இருந்து இது பாதுகாப்பு தரும். ஆனால், மிகவும் இறுக்கமான தொப்பிகளை அணியக் கூடாது. சில சமயம், தலையில் துண்டு ஏதேனும் கட்டிக் கொள்ளலாம்.

தண்ணீருக்கு அருகாமையில் ஓட்டம் : ஏரி, ஆற்றங்கரை, குளத்துக்கரை போன்ற நீர்நிலைகளுக்கு அருகாமையில் ஓட்டப் பயிற்சி செய்யலாம். அங்கு குளுமையான சூழல் நிலவும். இதனால், உங்கள் உடல் வெப்பம் அடைவதில் இருந்து பாதுகாப்பு கிடைக்கும்.

எச்சரிக்கை அவசியம் : சில சமயம் நமது உடல் வெயிலின் தாக்கத்தை தாங்க முடியாமல் தடுமாறும். குறிப்பாக தலைவலி, வாந்தி, குமட்டல் அல்லது தலைச்சுற்றல் போன்ற பிரச்சினைகள் ஏற்படும். அதுபோன்ற சமயங்களில் மருத்துவரை அணுகி ஆலோசனை செய்யவும்.