ஆண்களின் மலட்டுத்தன்மைக்கு இதெல்லாம்தான் காரணமா..? அதிர்ச்சி தரும் ஆய்வு

திருமணம் செய்து கொண்ட தம்பதியர் பெற்றோர் ஆக முடியாமல் இருக்கும் சூழலுக்கு பெண்கள் மட்டுமல்ல சில நேரங்களில் ஆண்களும் காரணமாக இருக்கிறார்கள். இது தொடர்பான புள்ளிவிவரங்களின் படி சுமார் 40% தம்பதிகளில் காணப்படும் மலட்டுத்தன்மை பிரச்சனைகளுக்கு ஆண்கள் மட்டுமே தனிப்பட்ட காரணமாகவோ அல்லது பங்களிக்கும் காரணமாகவோ இருக்கின்றனர் என கூறப்படுகிறது.

ஆண்களுக்கு காணப்படும் விந்தணு எண்ணிக்கை குறைபாடு காரணமாக குழந்தை பேறு அவர்களுக்கு கிட்டாமல் போகிறது. மேலும் இது ஆண் மலட்டுத்தன்மை என்றும் குறிப்பிடப்படுகிறது. விந்தணுக்களின் பற்றாக்குறையே மலட்டுத்தன்மையுள்ள ஆண்களில் சுமார் 15% தந்தை ஆக முடியாமல் இருப்பதற்கு காரணமாகும்.

இந்த நவீன காலத்தில் நாம் பயன்படுத்தும் லேப்டாப்கள், ஸ்மார்ட் போன்கள், டேப்லெட்கள் போன்ற மின்னணு சாதனங்கள் ஆணின் விந்து உற்பத்திக்கு தீங்கு விளைவித்து, விந்தணுக்களின் எண்ணிக்கையை பாதிக்கிறது. இது தவிர நச்சு கலந்த காற்று, குடி மற்றும் புகை போன்ற தீய பழக்கங்களும் குறைந்த விந்து எண்ணிக்கைக்கு காரணமாகின்றன. ஆண் மலட்டுத்தன்மை ஏற்படுவதற்கான சில முக்கிய காரணங்களை பார்க்கலாம்.

காற்றில் மாசு அதிகரிப்பதால் கருவுற வைக்கும் வீரியம் ஆண்களிடையே குறையத் தொடங்கியுள்ளது என்று ஆய்வு ஒன்று கூறி உள்ளது. சுற்றுச்சூழலில் காணப்படும் அதிக அளவு நச்சுகள் காரணமாக ஆண்களுக்கு மலட்டுத்தன்மை ஏற்படும் ஆபத்து அதிகமிருப்பதாகவும் அந்த ஆய்வு கூறி இருக்கிறது.

இது தொடர்பாக 1992-ல் நடத்தப்பட்ட மிகப்பெரிய ஆய்வில் 60 ஆண்டுகளில் ஆண்களின் விந்து எண்ணிக்கை சுமார் 50% குறைந்துள்ளது தெரியவந்தது. இதன் தொடர்ச்சியாக கடந்த 2017-ல் எடுக்கப்பட்ட ஆய்வில் 1973 - 2011-ம் ஆண்டுகளுக்கு இடையில் ஆண்களின் விந்தணு செறிவு சுமார் 50-60% குறைந்துள்ளது தெரிய வந்தது. ஒரு ஆண் ஆரோக்கியமான விந்தணு எண்ணிக்கையை கொண்டிருக்கிறார் என்றால் ஒரு மில்லி லிட்டருக்கு அவரது விந்தணுவின் செறிவு 15 முதல் 200 மில்லியன் வரை இருக்க வேண்டும்.

இதனிடையே பிளாஸ்டிக்கிலிருந்து வெளி வரும் ரசாயன பிளாஸ்டிசைசர்கள் ( chemical plasticisers )காரணமாக ஆண்களில் நாளமில்லா சுரப்பி மோசமாக பாதிக்கப்படுகிறது என்று பல ஆய்வுகளில் கூறப்பட்டுள்ளது. பிளாஸ்டிசைசர்கள் விந்தணு கொல்லி என்று பரவலாக அறியப்படுகிறது.

நைட்ரஜன் டை ஆக்சைடு, சல்பர் டை ஆக்சைடு மற்றும் பிற தீங்கு விளைவிக்கும் நச்சுகள் விந்துவின் தரத்தை கெடுக்கின்றன. மின்னணு உபகரணங்கள். உணவுகளில் இருக்கும் கனரக உலோகங்களான ஈயம், கால்சியம், ஆர்சனிக் போன்றவை விந்தணுக்களின் ஆரோக்கியத்திற்கு மிகவும் தீங்கு விளைவிக்கும். தவிர முன்னர் குறிப்பிட்டபடி செல்போன்கள், லேப்டாப்கள், மோடம்கள் போன்றவை விந்தணுவின் தரத்தை கெடுப்பதில் முக்கிய பங்கு வகிக்கின்றன. இந்த எலெக்ட்ரானிக் டிவைஸ்களில் இருந்து வெளிப்படும் கதிர்வீச்சால் , ஆண் விந்தணுவின் வடிவம் மற்றும் வேகம் சிதைக்கப்படுகிறது.