அந்தரங்க பகுதியை சுத்தம் செய்யும்போது இதை பயன்படுத்தி கழுவலாமா..? மருத்துவர் சொல்லும் விளக்கம்..!

அந்தரங்க பகுதியை சுத்தம் செய்வது என்பது ஆண், பெண் இருவருக்கும் பொதுவான சுகாதார பழக்கமாகும். இதை செய்யத் தவறுவது தேவையற்ற உடல் நல பாதிப்புகளை உண்டாக்கலாம். இது குறித்து பலரும் பேசத் தயங்குவதுதான் சுகாதாரமின்மைக்கும், நோய்களுக்கும் முக்கிய காரணமாக அமைகிறது.

உடல் சுத்தம் என்பது குளித்து , சுத்தமான உடையை அணிவதோடு மட்டும் முடிந்துவிடுவதில்லை. நம் அந்தரங்க உறுப்புகளையும் சுத்தமாகவும் சுகாதாரமாகவும் வைத்துக்கொள்ள வேண்டும். உள்ளாடைகள் தேர்வு செய்வதிலும் கவனம் இருக்க வேண்டும். உள்ளாடைகளையும் சுத்தமாக துவைத்து அணிய வேண்டும்.

சிலர் அந்தரங்க உறுப்பை சுத்தமாக வைத்துக்கொள்வதாக நினைத்து அந்த பகுதிகளிலும் சோப்பு , பாடி வாஷ் என பயன்படுத்தி கழுவுகின்றனர். இது முற்றிலும் தவறான பழக்கம் என எச்சரிக்கின்றனர் மருத்துவர்கள்.

பொதுவாகவே அந்தரங்க உறுப்பு தன்னை தானே சுத்தம் செய்துகொள்ளும் என்கின்றனர். குறிப்பாக பெண்களுக்கு கர்ப்பப்பை தன்னைத்தானே சுத்தம் செய்து அதன் கழிவுகளை அந்தரங்க உறுப்பு வழியாகத்தான் வெளியேற்றும். அதைத்தான் பெண்கள் வெள்ளைப்படுதல் என்பார்கள். எனவே அவற்றை நிச்சயமாக நாம் நன்கு கழுவி சுத்தம் செய்தல் அவசியம். அதற்காக சோப்பு பயன்படுத்தக் கூடாது.

இதற்கு சாதாரணமாக குளிக்கும் தண்ணீரைக்கொண்டு கழுவினாலே போதுமானது என்கின்றனர். ஏனெனில் அந்தரங்க பகுதியில் வறட்சியை ஏற்படுத்தாமக் இருக்க அங்கு எண்ணெய் பசை இருக்கும். இதை நாம் சோப்பு கொண்டு கழுவுவதால் யோனியின் பிஹெச் அளவு குறைந்து அரிப்பு, வறட்சி மற்றும் பாக்டீரியாக்களின் உருவாக்கமும் அதிகரிக்கும். இதனால் தேவையற்ற தொற்று மற்றும் கிருமிகளின் உருவாக்கத்திற்கு காரணமாகிவிடுவோம்.

எனவே அந்தரங்க உறுப்பை கழுவுதல் என்பது சாதாரண தண்ணீரைக் கொண்டு கழுவினாலே போதுமானது. குறிப்பாக மாதவிடாய் சமயத்தில் பெண்கள் பிறப்புறுப்பை சுத்தம் செய்வதற்கும் சாதாரண தண்ணீரை பயன்படுத்துதல் போதுமானது என்கின்றனர் மருத்துவர்கள்.

ஒருவேளை நீங்கள் அந்தரங்க உறுப்புகளை சுத்தம் செய்வதற்கென பிரத்யேகமாக தயாரிக்கப்படும் இண்டிமேட் வாஷிங் லிக்விட் பயன்படுத்த விரும்பினால் அவற்றையும் அளவுக்கு அதிகமாக பயன்படுத்தக் கூடாது. ஒரு துளி போதுமானது என்கிறார் இந்தியன் எக்ஸ்பிரஸ் இணையத்திற்கு பேட்டி அளித்த மருத்துவர் மேக் ரஞ்சன்.