மாதவிடாய் தள்ளிப்போக மாத்திரைக்கு குட்பை சொல்லுங்க.. இந்த இயற்கை முறைகளை டிரை பண்ணுங்க

பெண்கள் ஒவ்வொருவரும் மாதவிலக்கை எதிர்கொள்ள வேண்டும் என்பதுதான் இயற்கையான நியதி ஆகும். அதே சமயம், மாதவிலக்கு காலத்தில் பெண்கள் எதிர்கொள்ளும் அசௌகரியகங்கள் மற்றும் பிரச்சனைகள் ஏராளம். குறிப்பாக உடல் சோர்வு, அடிவயிற்று வலி, தசை பிடிப்பு, மார்பு பகுதியில் லேசான வீக்கம் மற்றும் வயிறு உப்புசம் போன்ற பல்வேறு பிரச்சனைகளை எதிர்கொள்ள வேண்டியிருக்கும்.

அதேபோல, மாதவிலக்கு காலத்தில் அடிக்கடி நாப்கின்கள் அல்லது மென்ஸ்சுரல் கப்களை மாற்ற வேண்டிய தேவைகள், கிருமி தொற்றுகளை தடுக்க கூடுதலான சுகாதார வழிமுறைகளை பின்பற்றுதல் என இந்த நாட்களில் பெண்களுக்கான அசௌகரியங்கள் சற்று அதிகமாகத் தான் இருக்கும்.

நமக்கு மாதவிலக்கு வர இருக்கின்ற சமயத்தில் குடும்ப விழாக்கள், நண்பர்களுடனான சந்திப்பு, அலுவலக சுற்றுலாக்கள் அல்லது பார்ட்டி என ஏதேனும் முக்கியமான நிகழ்வுகள் இருந்தால், இந்த பிரச்சனைகளுடன் அங்கு பங்கெடுப்பதை விரும்ப மாட்டோம். விளையாட்டு வீராங்கனைகளாக இருப்பின், மாதவிலக்கு நாட்களை ஒட்டி போட்டிகள் அமைந்தால் அதில் பங்கெடுப்பது சிரமமாக இருக்கும்.இப்படியான தருணங்களில் மாதவிலக்கை தள்ளிவைக்க வேண்டும் என்பதுதான் அனேக பெண்களின் விருப்பமாக இருக்கும். ஆக, அதை இயற்கையான முறையில் மேற்கொள்வது எப்படி என்பதை இந்த செய்தியில் தெரிந்து கொள்ளலாம்.

ஆப்பிள் சைடர் வினிகர் : மாதவிலக்கை தாமதப்படுத்தவும், மாதவிலக்கு கால பிரச்சனைகளுக்கு நல்ல தீர்வை கொடுக்கவும் ஆப்பிள் சைடர் வினிகர் பயனுள்ளதாக இருக்கும். மாதவிலக்கு ஏற்படுவதற்கு ஒரு வாரத்திற்கு முன்பாக ஆப்பிள் சைடர் வினிகரை தண்ணீரில் கலந்து குடித்தால் நல்ல பலன் கிடைக்கும்.

எலுமிச்சை சாறு: மாதவிலக்கை தாமதப்படுத்துவதற்கான பழங்கால வழிமுறைகளில் இதுவும் ஒன்று. மிதமான அளவில் எலுமிச்சை சாறு அருந்தினால் மாதவிலக்கை தாமதப்படுத்த முடியும் என்று பழங்கால மருத்துவக் குறிப்புகளில் கூறப்பட்டிருக்கிறது.

ஜெலட்டின் : உங்களுக்கு மாதவிலக்கு ஏற்படுவதற்கு 3 அல்லது 4 தினங்கள் முன்பாக, தினசரி ஜெலட்டின் தண்ணீர் அருந்தினால் மாதவிலக்கை தள்ளி வைக்க முடியும். இருப்பினும் இதை மிகுதியாக எடுத்துக் கொண்டால் செரிமானக் கோளாறுகள் மற்றும் வயிறு உப்புசம் போன்ற பிரச்சனைகள் ஏற்படும்.

கடலை பருப்பு சூப் : கடலை பருப்பை மாவாக அரைத்து வைத்துக் கொண்டு, தினசரி 2 டேபிள் ஸ்பூன் ஏதேனும் ஒரு சூப்பில் கலந்து குடிக்கலாம். மாதவிலக்கு வருவதற்கான 10 தினங்கள் முன்பாக இதை எடுத்துக் கொள்ளவும்.

இலவங்க டீ : மாதவிலக்கை தாமதப்படுத்தவும், மாதவிலக்கு காலத்தில் வீக்கம், தசை பிடிப்பு மற்றும் மிகுதியான உதிரப் போக்கு போன்ற பிரச்சனைகளை கட்டுப்படுத்தவும் இலவங்க டீ அருந்தலாம்.

தர்பூசணி : வயிறு நலனுக்கும், நல்ல ஊட்டச்சத்து கிடைக்கவும் தர்பூசணி பயனுள்ளதாக இருக்கும். மாதவிலக்கு காலத்தில் இருந்து 7 நாட்களுக்கு முன்பாக இதை பயன்படுத்துவதன் மூலமாக மாதவிலக்கை தாமதப்படுத்த முடியும்.