மாத்திரைகள் எடுத்துக்கொள்ளும்போது செய்யும் இந்த தவறுகள் உங்கள் பாதிப்பை மேலும் தீவிரமாக்கும் என்பது தெரியுமா..?

மருந்து , மாத்திரைகளை உட்கொள்வதில் இன்றளவும் மக்களுக்கு விழிப்புணர்வு தேவைப்படுகிறது. அதனால்தான் ஒவ்வொரு ஆண்டும் 1.5 மில்லியன் மக்கள் தவறான முறையில் மாத்திரைகளை உட்கொள்வதால் பாதிக்கப்படுவதாக புள்ளி விவரங்கள் தெரிவிக்கின்றன. சரியான முறையில், சிகிச்சைக்கான சரியான மாத்திரைகளை மருத்துவரின் பரிந்துரையில் அதை பின்பற்றி வந்தாலே மாத்திரைகளால் உண்டாகும் பாதிப்பை தவிர்க்கலாம் என மருத்துவர்கள் தெரிவிக்கின்றனர். அப்படி என்னென்ன தவறுகளை செய்கின்றனர் என்று பார்க்கலாம்.

மாத்திரைகளை ஒன்றினைத்தல் : அதாவது உங்களுக்கு இரு வெவ்வேறு நோய்கள் இருந்தால் அதன் மாத்திரைகளை சில கால இடைவெளியில் தனித்தனியாக போட வேண்டும். ஆனால் சில இரண்டு மாத்திரைகளையும் ஒன்றாக விழுங்கிவிடுவார்கள். இதனால் அந்த மாத்திரையின் நன்மைகள் அந்த பாதிப்பை முழுமையாக சரி செய்யாது. அதாவது அதன் நன்மைகள் முழுமையாக சென்று சேராது. மாறாக சில பக்கவிளைவுகளைதான் சந்திக்க நேரிடும்.

மாத்திரைகள் பற்றிய அறிவின்மை : சிலர் மருத்துவர்களின் பரிந்துரை இல்லாமல் அந்த மாத்திரைகள் பற்றிய முழுமையான புரிதல் , அறிவு இல்லாமல் தாங்களாகவே மருந்தகங்களில் மாத்திரைகளை வாங்கி உட்கொள்வார்கள். இது மிகவும் ஆபத்தான செயல். அதேபோல் மருத்துவர் உங்களுக்கு என்னென்ன மாத்திரைகளை எழுதி கொடுத்துள்ளார், உங்கள் நோய்க்கான சரியான மாத்திரையைத்தான் எழுதி கொடுத்துள்ளாரா என்பதையும் அது சார்ந்த கற்றல் உள்ளவர்களை கேட்டு தெரிந்துகொள்ளுங்கள். இல்லையெனில் அதனால் நடக்கும் மருத்துவ தவறுகளை நீங்கள்தான் சந்திக்க நேரிடும்.

அதிக டோஸ் கொண்ட மாத்திரைகள் : மருத்துவர் பரிந்துரைத்த மாத்திரைகளை மட்டுமே உட்கொள்ள வேண்டும். வலியின் தீவிரத்தை குறைக்க அதை விட அதிக டோஸ் கொண்ட மாத்திரைகளை உட்கொள்வது உங்களை அதிக சோர்வடையச் செய்யும். தலை சுற்றலை உண்டாக்கும். உங்கள் கல்லீரல் பாதிக்கப்படும்.

அடிக்கடி மாத்திரைகள் உட்கொள்ளுதல் : சில அவ்வப்போது வரும் உபாதைகளான தலைவலி , வயிற்று வலி, வயிற்றுப்போக்கு, நெஞ்சு எரிச்சல் போன்ற பிரச்னைகளுக்கு மருத்துவர் பரிந்துரையின்றி மருந்தகங்களில் மாத்திரை வாங்கி உட்கொள்வது எதிர்காலத்தில் தேவையற்ற பாதிப்புகளை உண்டாக்கும். அதோடு அவற்றை அடிக்கடி உட்கொள்ளுதல் இறப்பு வரை கொண்டு செல்லலாம் என மருத்துவர்கள் எச்சரிக்கின்றனர்.

மாத்திரைகளை தவிர்த்தல் : மருத்துவர் பரிந்துரைத்த மாத்திரைகள்தான் உங்களை உயிரை பாதுகாக்கிறது எனில் அதை முறையாக உட்கொண்டு வருவது அவசியம். சரியான நேரத்தில், தவறாமல் முறையாக எடுத்துக்கொள்ளுங்கள். மாறாக அவற்றை தவிர்த்து வருவது உங்கள் உயிருக்கே ஆபத்தாகலாம்.

மாத்திரை உட்கொள்ளும் முறை : சாப்பிட்ட உடனேயே மாத்திரை உட்கொள்ளுதல் தவறு. ஏனெனில் நீங்கள் சாப்பிட்ட உணவும் , மாத்திரைகளும் தவறான காம்பினேஷனாக இருந்தால் ஒவ்வாமையை ஏற்படுத்தலாம் அல்லது மாத்திரையின் ஊட்டச்சத்தை உறிஞ்சுவதற்கு சிரமப்படலாம். எனவே சாப்பிடும் உணவில் கவனமாக இருங்கள். இந்த சிரமத்தை தவிர்க்க சிலர் வெறும் வயிற்றில் மாத்திரை சாப்பிட்ட பின்னர் சிறிது நேரம் கழித்து உணவு உட்கொள்ளலாம் என்கின்றனர். எனவே இதை உங்கள் மருத்துவரிடம் உறுதி செய்துகொண்டு பின்பற்றுங்கள்.

மற்றவர்களின் மாத்திரையை நீங்கள் உட்கொள்ளுதல் : ஒருவருக்கு இருக்கும் அதே உடல் நல பாதிப்பு மற்றவர்களுக்கும் இருந்தால் அதை மருத்துவரின் பரிந்துரை என்று அவருடைய மாத்திரையை உட்கொள்வார்கள். இப்படி அவர்களுக்காக மருத்துவர் பரிந்துரைத்த மாத்திரையை நீங்கள் உட்கொள்வது பாதிப்பை அதிகமாக்கலாம். அதோடு அவருக்காக எழுதப்பட்ட மாத்திரை அவருடைய நோய் பாதிப்பு, உடல் பலவீனம் போன்றவற்றை அடிப்படையாகக் கொண்டு எழுதிக் கொடுத்திருக்கலாம். உங்களுக்கு அதன் தீவிரம் குறைவாக இருந்தால் அல்லது உங்களுக்கு வேறு ஏதேனும் நோய் இருந்தால் இந்த பரிந்துரையற்ற மாத்திரை உங்களை ஆபத்தில் சிக்க வைக்கலாம். எனவே அசாதாரணமாக இருக்காதீர்கள்.