குழந்தைகளை வாட்டும் சளி, காய்ச்சல், இருமல்.. குறையும் எதிர்ப்புசக்தி.. மருத்துவர்கள் சொல்லும் அட்வைஸ்..

குழந்தைகளுக்கு குளிர் காலத்தில் ஏற்படும் சளி, காய்ச்சல் போன்ற பாதிப்புகள் ஜனவரி மாதத்தோடு குறைந்து விடும் நிலையில், இந்த ஆண்டு பிப்ரவரி மாதமாகியும் அதிகரித்த வண்ணமே இருக்கிறது. அதற்கான காரணங்கள் என்ன என்பதை மருத்துவர்களின் விளக்கத்தோடு இந்த தொகுப்பில் பார்க்கலாம்...

இரண்டு நாட்களுக்கும் மேலாக தீவிர காய்ச்சல், அதீத இருமலுடன் வரும் குழந்தைகளுக்கு நுரையீரல் தொற்று இருப்பதோடு, சில குழந்தைகளுக்கு மூச்சுத் திணறலும் ஏற்படுகிறது. அவர்களுக்கு ஆக்சிஜன் கொடுக்க வேண்டிய தேவை இருப்பதோடு, சில நேரங்களில் அதீத அழுத்தம் கொண்ட ஆக்சிஜன் கொடுக்க வேண்டிய சூழலும் ஏற்படுவதாக மருத்துவர்கள் தெரிவிக்கின்றனர்.

இருப்பினும், பாதிக்கப்பட்ட குழந்தைகள் அனைவரும் 100 சதவீதம் குணமடைந்து விடுவதாக கூறும் மருத்துவர்கள், காய்ச்சல் இல்லாமல் சாதாரண இருமல் மட்டும் இருந்தால், இருமல் மருந்துக்கு பதிலாக, கை வைத்தியத்தை பின்பற்றலாம் என்றும் அறிவுறுத்துகின்றனர்.

இது குறித்து குழந்தைகள் நல மருத்துவர்கள் கண்ணன், ரெமா சந்திரமோகன் மற்றும் டி.ரவிக்குமார் பேட்டி அளித்துள்ளனர்.அதன்படி,  காய்ச்சல், சளி பாதிப்புகளில் இருந்து குழந்தைகள் குணமடைந்தாலும், அடுத்த சில நாட்களிலேயே அதே பாதிப்புகள் குழந்தைகளை வாட்டி வதைக்கின்றன.

ஒரு வைரஸின் பாதிப்பு குறைந்து, மற்றொரு வைரஸால் ஏற்படும் பாதிப்பே இது போன்று நோய்களுக்கு காரணம் என கூறும் மருத்துவர்கள், அனைத்து வகையான வைரஸ் பாதிப்புக்கும் சளி, காய்ச்சல், இருமல் போன்றவையே பொதுவான அறிகுறிகளாக இருப்பதாகவும் தெரிவிக்கின்றனர்.

மேலும் கொரோனாவுக்கு பிறகு உடலில் நோய் ஏற்படும் தன்மை பெரிதாக மாறியிருப்பதாகவும் மருத்துவர்கள் தெரிவிக்கின்றனர். ஊரடங்கு காரணமாக வீட்டிலேயே இருந்ததால், உடலின் எதிர்ப்பு சக்தியில் மாற்றம் ஏற்பட்டிருப்பதாக கூறும் அவர்கள், தேவையான எதிர்ப்பு சக்தி உருவான பிறகு, இதுபோன்ற பாதிப்புகள் படிப்படியாக தணிந்துவிடும் என்றும் தெரிவிக்கின்றனர்.

சளி காய்ச்சல் பாதிப்புகளுடன் டைபாய்டு, டெங்கு, அடினோ வைரஸால் ஏற்படும் கண் பாதிப்புகளும் குழந்தைகளிடம் காணப்படுவதாக மருத்துவர்கள் தெரிவிக்கின்றனர்.