சளி, இருமலை போக்க உதவும் எலுமிச்சை... எவ்வாறு பயன்படுத்த வேண்டும்..?

எலுமிச்சை பல வகையில் உடலுக்கு நன்மை சேர்க்கக் கூடியது. அந்த வகையில் சளி, இருமலைப் போக்கவும் எலுமிச்சை உதவுகிறது. எவ்வாறு என்று பார்க்கலாம்.

நெஞ்சு சளி : ஒரு எலுமிச்சையை நறுக்கி ஒரு கிளாஸ் தண்ணீரில் கொதிக்க வைக்க வேண்டும். அதோடு பாதி வெங்காயத்தையும் நறுக்கிப் போட வேண்டும். பின் வடிகட்டி குடிக்க நெஞ்சு சளி நீங்கும் என ஆயுர்வேத மருத்துவர் ஜெத்ரோ க்ளோஸ் "Back to Eden" என்ற புத்தகத்தில் கூறியுள்ளார்.

தொண்டை கரகரப்பு : ஒரு எலுமிச்சையை துண்டுகளாக நறுக்கி ஒரு கப் தண்ணீரில் கொதிக்க வையுங்கள். தண்ணீர் சூடு குறைந்ததும் வடிகட்டி அதில் 2 tbsp கிளிசரின் சேர்த்து கலக்க வேண்டும். 10 நிமிடங்கள் கழித்து 1 tbsp தேன் கலக்கவேண்டும். பின் இந்தக் கலவை நீரை தேவைப்படும் போதெல்லாம் ஒரு சிப் குடிக்கலாம். இதனால் தொண்டை வலி, சளி குறையும் என லிவ்ஸ்ட்ராங் ஆன்லைன் இதழ் குறிப்பிட்டுள்ளது.

இருமல் : எலுமிச்சை சாறில் தேன் கலந்து குடிக்க இருமல் மற்றும் தொண்டை வலி நீங்கும்.

தூக்கமின்மை : சளி , இருமல் இருந்தாலே தூங்குவது கடினம்தான். எனவே இந்த முறையை பின்பற்ற தூக்கம் வரலாம். முதலில் ரம் அல்லது ஸ்கார்ட்ச் இருந்தால் அதோடு தேன் மற்றும் எலுமிச்சை சாறு கலந்துகொள்ளுங்கள். பின் ஏதாவதொரு டீ பேக் அதில் போடுங்கள். பின் சூடான தண்ணீரை ஊற்றி நன்கு கலந்து குடியுங்கள். இதனால் நிம்மதியான தூக்கம் கிடைக்கும். சளி, இருமல், தொண்டை வலி தொல்லை இருக்காது.

குறிப்பு : மேலே குறிப்பிட்ட எதுவும் எடுபடவில்லை. கடுமையான சளி, இருமல் எனில் உடனடியாக மருத்துவரை தொடர்பு கொள்ளுங்கள்.