உங்கள் மூளை நலனை மேம்படுத்துவது எப்படி?

நீண்டகால ஆயுளுக்கும், ஆரோக்கியமான வாழ்வுக்கும் உங்கள் உடல் நலன் எந்த அளவுக்கு முக்கியமோ, அந்த அளவுக்கு மன நலனும் முக்கியமாகும்.

நம் உடலில் உள்ள அனைத்து பாகங்களையும் நிர்வகிக்கும் கிங் மாஸ்டர் போல உள்ள மூளையை நாம் ஆரோக்கியமாக வைத்துக் கொள்வதன் மூலமாக எண்ணற்ற பலன்களை அடைய முடியும். ஒவ்வொரு நாளும் சில எளிய பழக்க வழக்கங்களை கடைபிடிப்பதன் மூலம் உங்கள் மூளையின் செயல்பாடு வேகத்தை அதிகரிப்பதுடன், அதன் செயல்திறனை மேம்படுத்த முடியும். மனதின் நிம்மதி கெட்டால், படிப்படியாக உடல் நலனிலும் அது எதிரொலிக்கும். ஆகவே, மன நலனை எப்போதும் ஆரோக்கியமாக வைத்துக் கொள்ள வேண்டும்.

பலமற்ற கையை உபயோகம் செய்யுங்கள் : உங்கள் இரண்டு கைகளில் எது பலமற்றது என்று நீங்கள் கருதுகிறீர்களோ, அந்த கையை அதிகமான வேலைகளை செய்ய உபயோகம் செய்யுங்கள். குறிப்பாக அன்றாட பணிகளை மேற்கொள்ள பலமற்ற கையை அதிகம் பயன்படுத்தலாம். இது உங்கள் மனதை பலப்படுத்த உதவும்.

எதையேனும் புதிதாக கற்றுக் கொள்ளுங்கள் : ஒரு மியூசிக்கல் சாதனம் அல்லது ஒரு மொழி என எதையாவது ஒன்றை புதிதாக கற்றுக் கொள்ளும் போது, அது உங்கள் மூளைக்கு சவால் விடுக்கும். புதிய சிந்தனைகளையும் தோற்றுவிக்கும். இதனால் மூளையின் செயல்திறன் அதிகரிக்கும்.

தியானம் : தியானம் செய்வதன் மூலமாக உங்கள் உடல் அமைதி அடையும். மன அழுத்தம் குறைந்து, நிம்மதி ஏற்படும். இதுமட்டுமல்லாமல் தகவல்களை நினைவூட்டும் மூளையின் செயல்பாட்டை இது அதிகரிக்கும்.

புதிர் விளையாட்டு விளையாடுங்கள் : புதிர் விளையாட்டு ஒன்றை விளையாடுவதன் மூலமாக உங்கள் மூளை மிகுந்த சுறுசுறுப்பு அடையும். பல்வேறு கோணங்களில் சிந்தித்து, சரியான முடிவை எடுக்க இது உதவிகரமாக இருக்கும். மேலும், உங்கள் சிந்தனை மற்றும் செயல்பாடுகளில் எதிரொலிக்கும்.

புதிய வழியை தேர்வு செய்யுங்கள் : நெரிசல் மிகுந்த வழித்தடங்களில் சிக்கிக் கொள்வதால் மனதில் தேவையற்ற டென்ஷன் ஏற்படுகிறது. இதற்குப் பதிலாக புதிய வழித்தடங்கள் மூலமாக பயணம் செய்யலாம் அல்லது அலுவலகம் செல்ல வாகனங்களில் பயணிப்பதற்கு பதிலாக பொது போக்குவரத்து மூலமாக பயணிக்கலாம்.

இசையை ரசிக்கலாம் : இசையை ரசிப்பதன் மூலமாக உங்கள் மனதில் ஒரு சாந்தமான நிலை ஏற்படும். இதுமட்டுமல்லாமல் புத்தம்புது சிந்தனைகளை இது விளைவிக்கும். பாடல் வரிகளில் கவனம் செலுத்திக் கேட்பதன் மூலமாக உங்கள் நினைவுத் திறன் பெரிதும் மேம்படும்.