நீரிழிவு நோயாளிகள் உணவுப் பழக்கம் மூலமாக கிரியேட்டினின் அளவை கட்டுப்படுத்துவது எப்படி?

நாம் நமது தசைகளைப் பயன்படுத்தும் போது நம் உடலில் இருந்து வெளியேறும் கழிவுப் பொருள் தான் கிரியேட்டினின் ஆகும். உங்கள் சிறுநீரகம் ஆரோக்கியமாக இருந்தால், ரத்தத்தில் இருந்து இந்த கிரியேட்டினினை பிரித்து சிறுநீர் மூலமாக அதை வெளியேற்றி விடும். அதுவே உங்கள் உடலில் கிரியேட்டினின் அளவு கூடுதலாக இருக்கிறது என்றால் சிறுநீரகம் முறையாக வேலை செய்யவில்லை என்று அர்த்தம்.

சராசரி கிரியேட்டினின் அளவு எவ்வளவு?வயது, பாலினம் அடிப்படையில் ஒவ்வொரு நபருக்கும் கிரியேட்டினின் அளவு மாறுபடுகிறது. ஒரு டெசி லிட்டர் அளவிலான ரத்தத்தில் எத்தனை மில்லி கிராம் அளவுக்கு கிரியேட்டினின் இருக்கிறது என கணக்கீடு செய்யப்படுகிறது. ஆண்களுக்கு 0.6 முதல் 1.2 என்ற அளவிலும், பெண்களுக்கு 0.5 முதல் 1.1 என்ற அளவிலும், வளர் இளம் பருவத்தினருக்கு 0.5 முதல் 1.0 என்ற அளவிலும், குழந்தைகளுக்கு 0.3 முதல் 0.7 என்ற அளவிலும் இருக்க வேண்டும்.

சர்க்கரை நோயும், கிரியேட்டினின் அளவும்: உங்களுக்கு நீரிழிவு நோய் இருக்கிறது என்றால், கிரியேட்டினின் அளவை கட்டுப்பாட்டில் வைத்திருப்பது அவசியம் ஆகும். அத்தகைய சூழலில் மிக முக்கியமான 5 வாழ்வியல் பழக்க, வழக்கங்களை நீங்கள் கடைப்பிடிக்க வேண்டும் என்று மருத்துவ நிபுணர்கள் அறிவுறுத்துகின்றனர்.

புரதச்சத்தில் கட்டுப்பாடு தேவை: நீங்கள் மிக அதிகமாக புரதச்சத்து எடுத்துக் கொள்ளும்போது கிரியேட்டினின் அளவு அதிகரிக்கிறது என்று பல்வேறு ஆய்வுகள் தெரிவிக்கின்றன. ஆகவே, மிக அதிகப்படியாக புரதம் எடுத்துக் கொள்வதை கட்டாயம் தவிர்க்க வேண்டும். மருத்துவரால் பரிந்துரைக்கப்படும் அளவு சாப்பிடலாம்.

நார்ச்சத்து அதிகம் தேவை: நீண்டகால சிறுநீரக பாதிப்பு உள்ள மக்கள் நார்ச்சத்து உள்ள உணவை அதிகம் எடுத்துக் கொள்ளும்போது அவர்களது கிரியேட்டினின் அளவு குறைகிறது என்பதை தெரிந்து கொள்ளுங்கள். ஆகவே முழு தானியங்கள் மற்றும் நார்ச்சத்து காய்கறிகளை அதிகம் சேர்த்துக் கொள்ள வேண்டும்.

நீர்ச்சத்து மிக அவசியம்: சிறுநீரக நோய் பாதிப்பு இருப்பர்கள் திரவ உணவு அல்லது தண்ணீர் எடுத்துக் கொள்வதை சீராக கடைப்பிடிக்க வேண்டும். நாளொன்றுக்கு எவ்வளவு தண்ணீர் குடிக்க வேண்டும், ஒவ்வொரு சமயத்தில் எந்த அளவு தண்ணீர் அருந்த வேண்டும் என்பது குறித்து மருத்துவரின் ஆலோசனையை பெறவும்.

புகைப்பிடிப்பதை நிறுத்தவும் :  புகைப்பிடிப்பது மற்ற வகையில் உடல் நலனுக்கு கேடு தரும் என்பதோடு மட்டுமல்லாமல், நீண்டகால சிறுநீரக நோய் பாதிப்பையும் இது ஏற்படுத்தி விடும். புகைப்பிடிப்பதை நிறுத்தினால் கிரியேட்டினின் அளவும் குறையும்.

கிரியேட்டினின் சப்ளிமண்ட்ஸ் தவிர்க்கவும் : நீரிழிவு நோய் இருப்பவர்கள், கிரியேட்டினின் அளவை குறைத்து சிறுநீரக செயல்பாட்டை சீராக வைத்திருக்க வேண்டும் என்று விரும்பினால், கிரியேட்டினின் சப்ளிமண்ட்ஸ் எடுத்துக் கொள்வதை நிறுத்த வேண்டும். உடலில் அதிக கிரியேட்டினின் இருந்தால் உடல்நலன் குறித்து மிகுந்த அக்கறையோடு இருக்க வேண்டும்.