தாய்ப்பால் கட்டிக்கொண்டால் செய்ய வேண்டிய 8 விஷயங்கள்... வலிக்கு உடனடி நிவாரணம் கிடைக்கும்..!

புதிதாக குழந்தை பெற்ற்க்கொண்ட தாய்மார்களுக்கு இருக்கும் பிரச்னைகளில் தாய்ப்பால் கட்டிக்கொள்வதும் ஒன்று. குழந்தை பெற்றுக்கொள்ளும் வலியைக் காட்டிலும் தாய்ப்பால் கட்டிக்கொண்டு ஏற்படும் வலி சொல்லில் அடங்காதது என்பார்கள். ஆனால் இந்த வலியை தவிர்க்கவும் முடியாது. ஆரம்பத்தில் பெண்களுக்கு தாய்ப்பால் அதிகமாக சுரக்கும். ஆனால் குழந்தைகளால் அதிகம் குடிக்க முடியாது என்பதால் அது மார்பில் கட்டிக்கொண்டு கடுமையாக வலிக்கும். இதை அம்மாகளே சில வீட்டு வைத்தியங்கள் செய்து தாய்ப்பாலை வெளியேற்றிட முடியும் அல்லது வலியை குறைக்க முடியும். எப்படி என்று பார்க்கலாம்.

தாய்ப்பால் கட்டிக்கொள்ள காரணம் : குழந்தை ஈன்ற முதல் மாதத்தில் அதிக பால் சுரக்கும். குழந்தைக்கு சிறு வயிறு என்பதால் கொஞ்சம் தான் குடிக்கும் அந்த சமயத்தில் பால் கட்டிக்கொள்ளலாம். குழந்தைக்கு சரியாகப் பால் கொடுக்கவில்லை, மார்பகங்களை அழுத்திப் படுத்தல், பாலை நிறுத்துதல் போன்ற காரணங்களுக்காக பால் கட்டிக்கொள்ளும். இந்த பால் கட்டுதல் வலி மட்டுமல்லாது காய்ச்சலைக் கூட உண்டாக்கும். எனவே இதற்கு சில வீட்டு வைத்தியங்களே போதுமானது. அவை என்னென்ன பார்க்கலாம்.

இறுக்கமான உடை : பால் கொடுக்கும் காலகட்டத்தில் இறுக்கமான உடைகளை தவிர்த்து லூஸான உடை அணியுங்கள். இதுவும் பால் கட்டிக்கொள்ள முக்கிய காரணம்.

ஒத்தடம் : சுடு நீரில் துணியை நனைத்து ஒத்தடம் கொடுங்கள். ஹீட்டிங் மசாஜ் பேட் இருந்தாலும் ஒத்தடம் கொடுக்கலாம்.

சூடான குளியல் : சூடான குளியல் போட்டாலும் பால் வற்றிவிடும்.

மசாஜ் : நீங்களே உங்கள் கைகளை வைத்து மசாஜ் செய்தால் பால் கரைந்து வரும். அப்படியே வெளியேற்றலாம்.

பூண்டு : பூண்டை நசுக்கி இரண்டு மணி நேரத்திற்கு ஒரு முறை சாப்பிட்டு வந்தால் வலி குறையும். அப்படியே சாப்பிட பிடிக்கவில்லை என்றால் தேனுடன் கலந்து சாப்பிடலாம்.

பத்து போடுங்கள் : பாசிப்பயறு மற்றும் துவரம் பருப்பு இரண்டையும் பொடியாக்கி அதை தண்ணீரில் கெட்டியாகக் கரைத்து மார்பில் பத்து போட்டால் அது காயும்போது பாலும் முறிந்து வெளியேறிவிடும்.

அரிசி பேக் : அரிசி அல்லது மண் எதுவாக இருந்தாலும் அதை கடாயில் சூடாக்கி வெது வெதுப்பான பதத்தில் துணியில் கட்டி ஒத்தடம் கொடுத்தால் கரைந்துவிடும்.

ஐஸ் கட்டி : ஐஸ் கட்டிகளை நொறுக்கி அதை துணியில் கட்டி ஒத்தடம் கொடுத்தாலும் மார்பகங்கள் இளகி பால் வெளியேறும். இது குளிர்ச்சி என்பதால் காய்ச்சல் வரலாம்.