கவலையை அதிகப்படுத்தும் காஃபி.. மன அழுத்தம் ஏற்பட மேலும் சில காரணங்கள்!

மன அழுத்தம், கவலை போன்ற பிரச்சினைகளை நீங்கள் எதிர்கொண்டு வருபவர் என்றால் உங்கள் மனதில் எப்போதுமே அதீத பயம், பதற்றம், ஆழ்ந்த சோகம் போன்றவை குடி கொண்டிருக்கும். நமக்கு கவலையை ஏற்படுத்துவது எது என்பதை கண்டறிந்து, அதற்கு தீர்வு காண்பதற்கான முயற்சிகளை மேற்கொள்ள வேண்டும்.

பெரும்பாலும் தனிப்பட்ட காரணங்களே கவலைகளுக்கு காரணமாக அமைந்தாலும், சில பொதுவான காரணங்களாலும் கவலைகள் தூண்டப்படுகின்றன என்று மனநல ஆலோசகர்கள் தெரிவிக்கின்றனர். இதுகுறித்து மனநல ஆலோசகர், மருத்துவர் டேனியல் ஜி.ஆமென், இன்ஸ்டாகிராமில் வெளியிட்டுள்ள பதிவில், கவலைகளுக்கான காரணங்களை பட்டியலிட்டுள்ளார்.

சுயமாக கிளம்பும் எதிர்மறை சிந்தனைகள் : முன்னெச்சரிக்கை என்ற பெயரில் எப்போது எதிர்மறையாக பேசிக் கொண்டிருக்கும் நபர்களை பார்த்துள்ளீர்களா? திடீரென்று இந்த பேருந்து கவிழ்ந்தால் என்னாவது? இப்போது இந்த கட்டடம் இடிந்து விழுந்தாலும் விழுந்துவிடும் என்ற ரீதியில் இவர்களது பேச்சு அமையும். இதுபோன்ற எதிர்மறை சிந்தனைகள் உங்களுக்கும் இருந்தால் அதை கட்டுப்படுத்திக் கொள்ள வேண்டும்.

அதிக கிளைசமிக் உடைய உணவுகள் : உணவுக்கும், மன அழுத்தத்திற்கும் என்ன தொடர்பு இருக்கப் போகிறது என்று நினைக்கிறீர்களா? நிச்சயமாக உள்ளது. உங்கள் ரத்த சர்க்கரை அளவை திடீரென்று அதிகரிக்கக் கூடிய பிரெட், பாஸ்தா, உருளைக் கிழங்கு, அரிசி சாதம், சர்க்கரை, ஜூஸ் போன்றவை அதிக கிளைசமிக் இண்டெக்ஸ் கொண்ட உணவுகள் ஆகும்.

இவை உடலில் துரிதமாக இன்சுலின் சுரப்பை தூண்டும். ரத்த சர்க்கரை குறைந்தவுடன் நம் உடல் சோர்ந்துவிடும். கவலை தோய்ந்த முகமாக மாறிவிடும். ஆகவே, குறைந்த கிளைசமிக் இண்டெக்ஸ் கொண்ட உணவுகளை சாப்பிட வேண்டும்.

காஃபி : நாம் சுறுசுறுப்பாக இருக்க வேண்டும் என்று எண்ணி அருந்துகின்ற காஃபி நம் மனதுக்கு ஸ்ட்ரெஸ் ஏற்படுத்தக் கூடிய பானமாக அமைகிறது. குறிப்பாக, அதிகாலைப் பொழுதில் காஃபி அருந்துவதை தவிர்க்க வேண்டும். அதற்குப் பதிலாக டீ அல்லது இதர கசாயங்களை அருந்தலாம்.

தூக்கமின்மை : ஆழ்ந்த உறக்கம் நம் உடல் நலனுக்கு மிக, மிக அவசியம். நிம்மதியான தூக்கத்தின் மூலமாக மட்டுமே நம் உடலும், உள்ளமும் புத்துணர்ச்சி அடையும். நாள் ஒன்றுக்கு 7 முதல் 8 மணி நேர தூக்கம் அவசியம். அதற்கு குறைவான தூக்கம் நம் மனதில் இறுக்கத்தை ஏற்படுத்தும்.

மறைமுகமான காரணங்கள் : சளி, இருமல், ஆஸ்துமா போன்ற நோய்களுக்கு நாம் எடுத்துக் கொள்ளும் மருந்துகளின் பக்க விளைவாக ஸ்ட்ரெஸ் அதிகரிக்கிறது. கூடுமான வரையில் நம் உடலில் நோய் எதிர்ப்பு சக்தியை பலப்படுத்தி இந்த நோய்களை விரட்டி அடிப்பதன் மூலமாக ஸ்ட்ரெஸ் என்னும் கொடுமையில் இருந்து விடுபடலாம்.