வால்நட் முதல் தயிர் வரை… உடல் எடையை குறைக்க உதவும் உணவுகள்...

புரதம் மற்றும் நார்ச்சத்து மிகுந்த உணவுகள் நமது உடல் எடையை குறைக்க உதவும். பொதுவாகவே குறைவான கலோரிகளைக் கொண்ட நார்ச்சத்து உணவுகளை நீங்கள் சாப்பிடும்போது வயிறு நிரம்பிய உணர்வு ஏற்படும். உங்கள் ரத்த சர்க்கரை அளவை சீராக வைத்திருக்க இது உதவிகரமாக இருக்கும். உணவுக் கட்டுப்பாடு என்பது குறுகிய கால பலன்களை தந்தாலும், அதை தொடர்ந்து கடைப்பிடிப்பது என்பது சற்று சவாலான காரியம் தான். சீரான உணவுப் பழக்க வழக்கம் மூலமாக உங்கள் உடலுக்கு தேவையான ஊட்டச்சத்துக்களை நீங்கள் பெற்றுக் கொள்ள முடியும்.

உடல் எடையை குறைப்பது உங்கள் விருப்பம் என்றால், நாம் என்ன சாப்பிடுகிறோம் என்பதில் நாம் கவனமாக இருக்க வேண்டும். எந்த உணவை தேர்வு செய்ய வேண்டும் என்பதில் நாம் மிகுந்த அக்கறை செலுத்த வேண்டும். அதில் சில உணவுகளை இந்தச் செய்தியில் பார்க்கலாம்.

பரங்கிக்காய் : ஒரு கப் அளவிலான பரங்கிக்காயில் 80 கலோரிகள், விட்டமின்கள், மினரல்கள், பீடா கரோடின் உள்ளிட்டவை நிரம்பியுள்ளன. பீடா கரோடீன் என்ற சத்து நிறைந்துள்ளதன் காரணமாகவே இது ஆரஞ்சு கலரில் காட்சியளிக்கிறது. கொலஸ்ட்ரால், சோடியம் மற்றும் ஃபேட் போன்றவை முற்றிலும் இல்லாத பரன்கிக்காய் உங்கள் உடல் எடையை குறைக்க உதவும்.

வால்நட்ஸ் : உங்கள் இதய ஆரோக்கியத்திற்கு நன்மை தரும் மோனோசேச்சுரேட்டட் கொழுப்புகள் இதில் நிறைந்துள்ளது. ஒரு அவுன்ஸ் அளவு வால்நட்ஸ் சாப்பிட்டால் அதில் 4 கிராம் புரதம், 2 கிராம் நார்ச்சத்து, 200க்கும் குறைவான கலோரிகள் உள்ளிட்டவை இருக்கின்றன. இதை சாப்பிடுவதால் உங்கள் பசி கட்டுப்படுத்தப்படும்.

தயிர் : புரோபயாடிக் மற்றும் உடலுக்கு நன்மை பயக்கும் பாக்டீரியா சத்துக்கள் தயிரில் நிறைந்துள்ளன. உணவு செரிமானத்தை மேம்படுத்தக் கூடியது. குடல் ஆரோக்கியத்திற்கு உகந்தது. வயிற்றில் உள்ள கொழுப்பை கரைக்க வேண்டும் என்று நினைப்பவர்கள் தயிர் சாப்பிடலாம். கால்சியம் சத்து நிறைந்தது.

சர்க்கரை வள்ளி கிழங்கு : கலோரி சத்து குறைவானது. ஸ்டார்ச் சத்து நிறைந்த உருளைக்கிழங்கிற்கு மாற்றாக இதை நீங்கள் எடுத்துக் கொள்ளலாம். இதுவும் ஒரு வேர் காய்கறி தான். நார்ச்சத்து மற்றும் தண்ணீர் சத்து நிரம்பியது. மிக எளிதில் செரிமானம் அடையும்.

கொண்டக்கடலை : புரதம் மற்றும் நார்ச்சத்து மிகுந்தது. உடல் எடையை குறைக்க உதவும். இதில் உள்ள புரதச்சத்து உங்கள் பசியை கட்டுப்படுத்த உதவும். தினசரி கொண்டக்கடலை சாப்பிட்டு வந்தால் உடல் கட்டுக்கோப்பாக இருக்கும்.

பருப்பு : தாவரங்களில் இருந்து கிடைக்கக் கூடிய புரதச்சத்து, குறிப்பாக பருப்பு வகைகள் உங்கள் உடல் எடையை குறைக்க உதவும். பருப்புகளில் இருக்கும் புரதம் மற்றும் நார்ச்சத்து வகைகள் நம் உடல் எடையை கட்டுப்படுத்தும்.