கொரோனா முதல் வயிற்றுப்போக்கு வரை... 2022 ஆம் ஆண்டு மக்களை அச்சுறுத்திய கொடிய நோய்கள்..!

இந்தியா ஒவ்வொரு நாளும் ஒவ்வொரு துறையிலிருந்தும் பல்வேறு வகையான பிரச்சனையை சந்திக்கிறது. அந்த வகையில் கடந்த 3 ஆண்டுகளாக சவாலான துறை என்றால் மருத்துவத்துறைதான். அப்படி எந்த நோய் வந்தாலும் அதை சமாளிக்க நவீன தொழில்நுட்பங்களையும், மாத்திரைகளையும் புதுப்பித்துக்கொண்டே வருகிறது.

இருப்பினும் மற்ற மேலை நாடுகளுடன் ஒப்பிடும்போது இன்னும் சில நோய்களை சமாளிக்கும் தொழில்நுட்பத்தை மேம்படுத்த வேண்டிய தேவை உள்ளது. அப்படி நாம் இன்றவும் போராடி வரும் பாதிப்புகளில் இந்த ஆண்டு இதய நோய் மற்றும் நீரிழிவு நோய் அதிகரித்துள்ளது. அப்படி இந்தியாவில் 2022 ஆண்டு மக்களை அதிகமாக பாதித்த அபாயகரமான நோய்களின் பட்டியலை பார்க்கலாம்.

கோவிட்-19 : 2020 ஆண்டு உலகையே அச்சுறுத்திய கொரோனா நோய் பல உயிர்களை காவு வாங்கியது. இது உடலளவில் மட்டுமன்றி பொருளாதார ரீதியாகவும் பல பாதிப்புகளை ஏற்படுத்தியது. அதன் தாக்கம் இன்று வரை மக்களை விடவில்லை. அப்படி 2019 ஆண்டு தொடங்கிய இந்த நோயால் இறப்பு எண்ணிக்கை அதிகரித்துள்ளது. அப்படி இந்தியாவிலும் இறப்பு எண்ணிக்கை அதிகரித்ததில் கொரோனாவுக்கு முக்கிய பங்கு உள்ளது.

இதய நோய் : இந்தியாவில் இதய நோய் கொஞ்சம் கொஞ்சமாக அதிகரித்து இன்று இளைஞர்களையும் பாதிக்கும் அளவிற்கு அச்சுறுத்தும் நோயாக உள்ளது. இது அதிகமாக போதை பழக்கம், உடல் உழைப்பின்மை, மோசமான உணவுப்பழக்கம், உயர் இரத்த அழுத்தம், அதிக கொழுப்பு , உடல் பருமன் , குடும்ப நோய் போன்ற தீவிரமான நோய் பாதிப்பு ஆகியவை இதய நோய்க்கான முக்கிய காரணிகளாகும்.

பக்கவாதம் : இதயத்திலிருந்து மூளைக்கு செல்லும் தமனியில் அடைப்பு ஏற்படும்போது பக்கவாதம் ஏற்படுகிறது. அதிக இரத்த அழுத்தம், அதிக கொழுப்பு மற்றும் நீரிழிவு நோய் போன்ற நாள்பட்ட நோயால் பாதிக்கப்பட்டவர்களுக்கு பக்கவாதம் ஏற்படுவதற்கான வாய்ப்புகள் உண்டு.

நீரிழிவு நோய் : வயதானவர்களை மட்டுமே தாக்கக்கூடிய நோயாக இருந்த நீரிழிவு நோய் இன்று குழந்தைகளையும் விட்டு வைப்பதில்லை. இரத்தத்தில் சர்க்கரை அளவு அதிகரிக்கும்போது நீரிழிவு நோய் உண்டாகிறது. இதில் டைப் 1 மற்றும் டைப் 2 என இரண்டு வகைகள் உள்ளன.

வயிற்றுப்போக்கு : ஒரே நாளில் பல முறை மலக் கழிக்க கழிவறை செல்வதுதான் வயிற்றுப்போக்கு. இது சுகாதாரமில்லாத தண்ணீர், உணவு அல்லது உடலில் நீர்ச்சத்து குறைபாடு போன்ற காரணங்களால் நிகழ்கிறது.