மாஸ்க் அணிவதில் நீங்கள் செய்யும் இந்த தவறுகளால் வைரஸ் தொற்று பரவுவதற்கான வாய்ப்பு அதிகம்..

கொரோனா பரவல் ஒவ்வொரு நாளும் அதன் தீவிரத்தை அதிகரித்துக்கொண்டே வருகிறது. காற்று, காற்றின் துகள்கள் என அதன் பரவல் எப்படி நிகழ்கிறது என ஆராய்ச்சியாளர்களே பிரம்மிக்கின்றனர். இந்நிலையில் அதற்கு ஒரே பாதுகாப்பு மாஸ்க் மட்டும்தான். ஆனால் அந்த மாஸ்கையும் பலர் அலட்சியமாக பயன்படுத்துகின்றனர்.

கொரோனாவிற்கு பயந்து மாஸ்க் அணிவோரைக் காட்டிலும் போலீஸின் அபராதத்திற்கு பயந்தே வெறும் கண் துடைப்பிற்காக பயன்படுத்துகின்றனர். ஒருவேளை நிஜமாகவே அதை இப்படியெல்லாம் அணிந்தால் ஆபத்து வரும் என தெரியாமல் அணிகிறீர்கள் எனில் உங்களை வழிகாட்டவே இந்தக் கட்டுரை.

மூக்கு மற்றும் வாயை மூடாமை : சிலர் தாடைக்குக் கீழ் மாஸ்கை இறக்கிவிட்டுக்கொண்டு சுற்றுவார்கள். இதற்கு நீங்கள் மாஸ்க் அணியவே தேவையில்லை. ஏனெனில் வைரஸானது வாய் மற்றும் மூக்கு வழியாகத்தான் பரவுகிறது. அவற்றை மூடவே மாஸ்க். ஆனால் அதை திறந்துவிட்டு தாடையில் இறக்கிவிடுவதில் பயனில்லை.எனவே அடுத்தமுறை மூக்கு மற்றும் வாய் நன்றாக மூடி இருக்குமாறு பார்த்துக்கொள்ளுங்கள்.

தவறாக அணிதல் : சிலர் மாஸ்க்கை தலைகீழாக அணிந்திருப்பார்கள். அவ்வாறு அணிந்தாலும் காற்றுத் துகள், நீர்த்துளிகள் மூலம் வைரஸ் உள்ளே செல்ல வாய்ப்பு அதிகம். எனவே மூக்கு மூச்சு விடுவதற்கு ஏற்ப கூம்பு வடிவில் இருப்பதை மேல் பக்கமாக அணிய வேண்டும். விரிந்த பகுதி கீழே இருக்க வேண்டும்.

திருப்பி அணிவது : சிலர் பின் புறமாக திருப்பி அணிந்திருப்பார்கள். இவ்வாறு அணிவதாலும் மாஸ்க் பாதுகாப்பை இழக்கிறது. சர்ஜிகல் மாஸ்குகளில் இந்தக் குழப்பம் இருக்காது. வீட்டில் துணியில் தயாரிக்கப்பட்ட மாஸ்குகள் அணியும்போது இந்த குழப்பம் வரும். அதேபோல் வெளியே சென்றுவிட்டு வந்து மீண்டும் பயன்படுத்தும்போது உள்பக்கம் வெளிப்பக்கம் பார்த்து அணியுங்கள்.

தொடுவதை தவிருங்கள் : மாஸ்கின் வெளிப்புறத்தை தொடுவதை தவிறுங்கள். அதை சரி செய்கிறேன், கழற்றி மாட்டுகிறேன் என அதை அடிக்கடி தொடுவதாலும் வைரஸ் ஆபத்து உள்ளது. அவ்வாறு அதை சரியாக அணிய வேண்டுமெனில் அணிந்துவிட்டு உடனே சானிடைசர் கொண்டு கைகளை துடைத்துக்கொள்ளுங்கள். வீட்டிற்கு வந்ததும் சோப்பு போட்டு கட்டாயம் கழுவுங்கள்.

மீண்டும் பயன்படுத்துதல் : வீட்டில் மாஸ்குகளையும் உடுத்தும் ஆடைக்களைப் போல் நிறைய வாங்கி வைத்துக்கொள்ளுங்கள். ஒவ்வொரு முறை வெளியே சென்று வந்ததும் அதை சோப்பால் அலசி காய வைத்துவிடுங்கள். அடுத்த முறை வேறொரு மாஸ்கை பயன்படுத்துங்கள். ஒரே மாஸ்கை பயன்படுத்துவதும் பரவலுக்கு சாத்தியக் கூறுகளை உண்டாக்கும்.