மூச்சு பயிற்சி, நடைப்பயிற்சி உள்ளிட்டவை கோவிட் நோயாளிகளை மீட்க உதவுமா?

உலகம் முழுவதும் கோவிட் தொற்று தாக்கிய நோயெதிர்ப்பு சக்தி குறைந்த நபர்கள் கடும் பாதிப்புகளை சந்திக்கின்றனர். ஒரு சிலர் உயிரிழக்கின்றனர். ஆனாலும் கோவிட் தொற்றால் பாதிக்கப்பட்ட பலர் ஒரு சில நாட்களில் நோயிலிருந்து மீண்டு வருகின்றனர். இந்நிலையில் கோவிட் நோயாளிகள் அவர்களின் பழைய இயல்பு வாழ்க்கை முறைக்கு திரும்புவதற்கும், முழு ஆரோக்கியத்தை பெறவும் மறுவாழ்வு திட்டத்தை மருத்துவர்கள் பரிந்துரைத்துள்ளனர். கோவிட் நோயாளிகளுக்கான மறுவாழ்வு திட்டத்தை ஜான்ஸ் ஹாப்கின்ஸ் மருத்துவம் மறுவாழ்வு நெட்வொர்க் (johns Hopkins Medicine Rehabilitation Network) பரிந்துரைத்துள்ளது.

கோவிட் -19 உடல் ரீதியாக மட்டுமின்றி, மனரீதியாகவும் நோயாளிகளை பாதிக்கிறது. எனவே தாங்கள் பரிந்துரைக்கும் புனர்வாழ்வு முயற்சிகள், கோவிட் நோயாளிகளை ஆரோக்கியமாக மீட்டெடுப்பதை நோக்கமாக கொண்டுள்ளன. இது நோயாளிகளை முந்தைய வாழ்க்கைத் தரத்திற்கு மீண்டும் திரும்ப உதவுகிறது என்று ஜான்ஸ் ஹாப்கின்ஸ் மெடிசின் கூறி உள்ளது. பலவீனம், சோர்வு மற்றும் மூச்சுத் திணறல், நடைபயிற்சி மற்றும் அன்றாட பணிகளைச் செய்வதில் சிரமம் ஆகியவை தொற்றினால் ஏற்படும் பொதுவான குறைபாடுகள்.

இயல்பாக இருக்க விடாத இந்த உடல் குறைபாடுகளை கோவிட் நோயாளிகள் அனுபவிக்கும் போது, அது அவர்களுக்கு ஒருவித மனஅழுத்தத்தை ஏற்படுத்துகிறது. தொற்றை பற்றிய பயம் மற்றும் மனச்சோர்வு இரண்டுமே கோவிட் நோயாளிகளின் உடல் ஆரோக்கியத்தை கடுமையாக பாதிக்கும். இதனிடையே உடல் மற்றும் மன ஆரோக்கியம் உள்ளிட்டவற்றை மேம்படுத்துவதே நோக்கமாக கொண்ட உடற்பயிற்சி மற்றும் செயல்பாட்டின் மூலம் நோயிலிருந்து விரைவாக மீள முடியும்.

வீட்டில் சுய-தனிமைபடுத்தலில் இருக்கும் போதே இவற்றை செய்யலாம். கோவிட் நோயாளிகளை மீட்டெடுப்பதில் இயக்கம் முக்கிய பங்கு வகிக்கிறது. பயிற்சிகள் மூலம் இயங்குவது அல்லது இயங்க முயற்சிப்பது உடலை குணப்படுத்துகிறது மற்றும் மனதை மீட்டெடுப்பதற்கும் உணர்ச்சிகளைத் தணிப்பதற்கும் சிறந்த வழியாகும்.எனவே பயிற்சிகள் மற்றும் இயக்கங்களுடன் மீட்பு மற்றும் குணப்படுத்தும் செயல்முறையை துவக்கலாம் என்று ஜான்ஸ் ஹாப்கின்ஸ் கூறியுள்ளது.

மனித இயக்கத்தின் 5 அடுக்குகள் உடலிலும் மனதிலும் முழு நபரின் ஆரோக்கியத்தையும் சரிசெய்து மேம்படுத்துகின்றன,

* ஆழமாக சுவாசிக்கவும், இன்னும் மிக ஆழமாக சுவாசிக்கவும், நுரையீரலை கீழே இருந்து மேலே வரை காற்றால் நிரப்பவும்

* வெஸ்டிபுலர் அமைப்பை ( vestibular system) இயக்கவும். வெஸ்டிபுலர் சிஸ்டம் உடலில் இருந்து சமநிலை மற்றும் உணர்ச்சி உள்ளீட்டைக் கட்டுப்படுத்துகிறது மற்றும் தலை மற்றும் கண்களை நகர்த்துவதன் மூலம் இயக்கப்படுகிறது

* உடலையும், மனதையும் ஆக்ட்டிவாக வைத்திருக்க தவழுவது, நடப்பது, மார்ச்சிங் (marching) உள்ளிட்ட செயல்களில் ஈடுபடலாம்

* உடலை வலுவாக்கும், தசை வலிமையை அதிகரிக்கும் பயிற்சிகளில் ஈடுபடலாம்

* உடல் செயல்பாடு மற்றும் இயக்கத்திற்கான சகிப்புத்தன்மையை அதிகரிக்க உதவும். முழு நபரையும் பலப்படுத்தும் பயிற்சிகள் உடலை சரிசெய்யவும் மீட்கவும் உதவும்.

ஜான்ஸ் ஹாப்கின்ஸின் கூற்றுப்படி, பயிற்சிகள் கார்டியோபுல்மோனரி (இதயம் மற்றும் நுரையீரல்), நியூரோ-வெஸ்டிபுலர் (சமநிலை மற்றும் ஒருங்கிணைப்பு), தசைக்கூட்டு (தசைகள் மற்றும் மூட்டுகள்), மன / அறிவாற்றல் (மூளை மற்றும் சிந்தனை) உள்ளிட்ட உடல் அமைப்புகளை வலுவாக்க உதவுகின்றன.