இரத்தக் கொதிப்பை நிர்வகிக்க பால் சார்ந்த உணவுப் பொருட்கள் உதவுமா..? தெரிந்துகொள்ளுங்கள்...

பால் சார்ந்த உணவுப் பொருட்கள் எலும்பு உறுதிக்கும், குடல் ஆரோக்கியத்திற்கும், சருமப் பொலிவுக்கும் சிறந்தது என படித்திருப்போம். அதுகுறித்த நிரூபிக்கப்பட்ட ஆய்வுகளும் உண்டு. ஆனால் தற்போதைய புது ஆய்வு மற்றொரு நற்செய்தியையும் கொண்டு வந்துள்ளது.

அதாவது பால் சார்ந்த உணவுப் பொருட்கள், குறைவான சர்க்கரை நோயாளிகளுக்கும் , உயர் இரத்த அழுத்தம் கொண்டவர்களுக்கும் அதன் தாக்கத்தை குறைக்கும் எனக் கண்டறியப்பட்டுள்ளது. BMJ Open Diabetes Research and Care என்ற ஆன்லைன் இதழ் இந்த ஆய்வை வெளியிட்டுள்ளது. இதில் 9 வருடங்களாக 1,90,000 நபர்களை கண்காணித்து பரிசோதனை செய்துள்ளது.

இந்தியா, மலேசியா, சீனா, பாகிஸ்தான் உள்ளிட்ட 12 நாடுகளைச் சேர்ந்த 35 - 70 வயது கொண்டவர்களிடம் இந்த ஆய்வை நடத்தியுள்ளது. அவர்களில் தினமும் பாலைக் கொண்டு தயாரிக்கப்பட்ட 2 வகையான உணவுப் பொருட்களை சாப்பிட்டு வந்தால் அவர்களுக்கான பாதிப்பு 12 சதவீதமாகக் குறைவதைக் கண்டறிந்துள்ளனர்.

அப்படி பால், தயிர், தயிர் சார்ந்த பானங்கள், சீஸ், பனீர், மோர் இப்படி பாலிலிருந்து உற்பத்தி செய்யக் கூடிய வெண்ணெய், கிரீம் தவிர்த்து எந்த உணவுப் பொருளையும் சாப்பிடலாம் என்கிறது. இதனால் குறை சர்க்கரை நோயாளிக்கும், உயர் இரத்த அழுத்தம் கொண்டவர்களுக்கும் அதன் பாதிப்பு 12% குறையும்.