பிறவி இதய நோய் பற்றி தெரியுமா..? அறிகுறிகளும்.. காரணங்களும்..

கருவில் வளருகின்ற போதே துரதிருஷ்டவசமாக சில குழந்தைகளுக்கு குறைபாடு ஏற்பட்டு விடுகிறது. அந்த வகையில், குழந்தைகளுக்கு பிறவியிலேயே இருக்க கூடிய இதய நோய்க்கு பெயர்தான் Congenital Heart Disease (CHD) ஆகும். இதயத்தின் அமைப்பு மற்றும் செயல்பாடு இந்த நோயினால் பாதிக்கப்படுகிறது.

இதில் ஆறுதலான விஷயம் என்னவென்றால் உலகெங்கிலும் பிறக்கும் குழந்தைகளில் ஒரு சதவீதத்தினருக்கும் மட்டுமே இந்த குறைபாடு இருக்கிறது. இந்த நோயால் பாதிக்கப்பட்ட குழந்தைகளுக்கு அதன் விளைவுகள் மிதமானதாக இருக்கலாம் அல்லது தீவிரத்தன்மை உடையதாக இருக்கலாம். ஆனால், பெரிய அளவுக்கு அறிகுறிகள் எதையும் காட்டாது. இருப்பினும் உடனடி சிகிச்சை அவசியமாகும்.

பிறவி இதய நோயை கண்டறிவது எப்படி.? ஹைதராபாதை சேர்ந்தவரும், குழந்தைகளுக்கான இதயநோய் சிகிச்சை நிபுணருமான, மருத்துவர். தபண் குமார் தாஷ் இதுகுறித்து பேசுகையில், “பிறவி இதய குறைபாடுகளை கருவிலேயே கண்டறியலாம் அல்லது பிரசவத்திற்கு முன்பாகவே தெரிந்து கொள்ளலாம். வழக்கமான அல்ட்ராசவுண்ட் பரிசோதனையின்போது இது தெரியவரும்.

குழந்தையின் இதய வளர்ச்சியை கண்காணிக்கவும், பிறந்த பிறகு அவர்களுக்கு உரிய சிகிச்சை அளிக்கவும் இந்தப் பரிசோதனை முறைகள் மருத்துவர்களுக்கு உதவியாக இருக்கும். நோயின் பாதிப்புகளை பொருத்து இதன் அறிகுறிகள் மாறுபடலாம்’’ என்று தெரிவித்தார்.

அறிகுறிகள் : குழந்தைகளுக்கு மூச்சு வாங்குவது, கட்டுப்படுத்த முடியாத அழுகை, அதிகப்படியான வியர்வை, பாலூட்டுவதில் கடினம், குழந்தையின் உடல் எடை அதிகரிப்பு போன்றவை இதன் அறிகுறிகள் ஆகும். சில குழந்தைகளூக்கு சருமம் ஊதா நிறத்தில் மாறக் கூடும். கால்கள் வீங்கலாம் மற்றும் இதயத்துடிப்பு வேகமாக இருக்கும்.

வளர் இளம் குழந்தைகளுக்கு இந்த நோய் காரணமாக, சாதாரண வேலைகளை செய்யும்போதே உடல் சோர்வு, வளர்ச்சியின்மை போன்ற பிரச்சினைகள் ஏற்படலாம். சில குழந்தைகளுக்கு நெஞ்சு வலி, மயக்கம் போன்ற தொந்தரவுகள் ஏற்படும்.

இதய இரைச்சல் : குழந்தைகளின் இதய நலனை மருத்துவர்கள் பரிசோதனை செய்யும்போது இதயத்தில் இருந்து இரைச்சல் ஓசை கேட்கும். இதயத்திற்கு ரத்த ஓட்டம் அதிகரிப்பதன் காரணமாக இதுபோன்ற இரைச்சல் கேட்கக் கூடும். இது கண்டறியப்பட்டால் அடுத்தகட்ட பரிசோதனைகளை செய்ய வேண்டும்.

மருத்துவ பரிசோதனை : எக்கோ பரிசோதனை, மார்பக எக்ஸ்-ரே, இசிஜி போன்ற பரிசோதனைகள் மூலமாக பிறவி இதய நோயை கண்டறிய முடியும். சிலருக்கு இந்தப் பரிசோதனைகளில் எதையும் துல்லியமாக கண்டுபிடிக்க முடியவில்லை என்றால் சிடி ஸ்கேன், எம்ஆர்ஐ ஸ்கேன், கார்டியாக் காத்தட்ரைசேஷன் போன்ற பரிசோதனைகள் தேவைப்படும்.

பச்சிளம் குழந்தைகளிடம் எப்படி கண்டறியப்படுகிறது ? குழந்தை பிறப்பதற்கு முன்பாகவே நோயை கண்டறியும் அளவுக்கு சமீபத்திய ஆண்டுகளில் தொழில்நுட்பம் வளர்ந்துள்ளது. கருவில் வளரும் குழந்தைகளுக்கான எக்கோகார்டியோகிராஃபி பரிசோதனை செய்யப்படுகிறது. 16 முதல் 24 வார குழந்தைகளுக்கு இந்தப் பரிசோதனையை செய்ய முடியும்.