செக்ஸ் முன்னும், பின்னும்.. உடலுறவு ஆரோக்கியத்திற்கு இதெல்லாம் முக்கியம்!

ஒட்டுமொத்த உடல் நலனுக்கும் நாம் அக்கறை செலுத்துவதை போலவே பாலியல் உறவு கொள்ளும் போது சுகாதார நடவடிக்கைகள் குறித்து கவனத்தில் கொள்ள வேண்டும். பிறப்பு உறுப்புகளுக்கு ஏதேனும் தொற்று ஏற்படுவதை இது தடுக்கிறது.

பாலியல் சுகாதாரத்தை நீங்கள் கடைபிடிக்காவிட்டால் உங்களுக்கு கருத்தரிக்கும் வாய்ப்பு குறைவதற்கு சாத்தியக்கூறு உண்டு. அதேபோல பாலியல் ஆரோக்கியத்தை கடைப்பிடித்தால் நீடித்த இன்பம் பெறுவதற்கான வழியாக அது அமையும்.

பிறப்புறுப்புகளை சுத்தம் செய்வது? பாலியல் உறவு கொண்ட பிறகு பிறப்புறுப்புகளை முறையாக தண்ணீர் வைத்து சுத்தம் செய்ய வேண்டும். அதை செய்ய தவறினால் எண்ணற்ற கிருமிகள் அங்கு பெருகக்கூடும். அதே சமயம் பிறப்புறுப்புகளை சுத்தம் செய்கிறேன் என்ற பெயரில் ரசாயனம் அல்லது சோப் போன்றவற்றை பயன்படுத்த தேவையில்லை.

கைகளை கழுவுங்கள் : தாம்பத்திய உறவு வைத்துக் கொள்வதற்கு முன்னும், பின்னும் கைகளை சுத்தமாக கழுவ வேண்டும். ஏனென்றால் உங்கள் கைகளால் நீங்கள் பிறப்புறுப்புகளை தொடும்போது கிருமிகள் பரவுவதற்கு வாய்ப்பு உண்டு. முடிந்தபட்சம் உறவுக்கு பிறகு வெதுவெதுப்பான தண்ணீரில் சின்ன குளியல் போடுவது நல்லது.

பெண்ணுறுப்புக்கு சொல்யூஷன் பயன்படுத்தக் கூடாது : பெண்ணுறுப்பை சுத்தம் செய்கிறேன் என்ற பெயரில் சில பெண்கள் சோப்பு, சொல்யூஷன் மற்றும் சானிடைசர் போன்றவற்றை பயன்படுத்துவதை வாடிக்கையாகக் கொண்டுள்ளனர். ஆனால் பெண்ணுறுப்பு தன்னைத்தானே சுத்தம் செய்து கொள்வதற்கான நல்ல பாக்டீரியாக்களை கொண்டிருக்கும். நீங்கள் பயன்படுத்தும் ரசாயனங்களால் அந்த பாக்டீரியா இறக்கும் பட்சத்தில் தொற்றுகள் ஏற்படலாம்.

சிறுநீர் கழித்தல் : பாலியல் உறவை முடித்த பிறகு உடனடியாக கழிவறைக்குச் சென்று சிறுநீரை வெளியேற்றுவது நல்ல பயனை தரும். ஏனென்றால், சிறுநீருடன் சேர்த்து பிறப்புறுப்பு பகுதியில் ஒட்டிக் கொண்டிருக்கும் கிருமிகள் வெளியேறிவிடும்.

பொம்மைகளை (Sex Toys) சுத்தம் செய்யவும் : வேடிக்கை நிறைந்த தாம்பத்திய வாழ்க்கை வாழ விரும்பும் தம்பதிகள் பாலியல் உறுப்புகளைப் போன்ற பொம்மைகளை (sex toys) பயன்படுத்துகின்றனர். நீங்கள் அவற்றை பயன்படுத்தாவிட்டால் ஒரு பிரச்சனையும் இல்லை. ஒருவேளை பயன்படுத்தும் பட்சத்தில் அவற்றை முறையாக சுத்தம் செய்யவும்.

ஆணுறையை மாற்றவும் : ஒரே இரவில் ஒன்றுக்கும் மேற்பட்ட முறை பாலியல் உறவு வைத்துக் கொள்ள சில தம்பதிகள் விரும்புகின்றனர். அதேபோல ஒரே சமயத்தில் பெண்ணுறுப்பு வழி புணர்ச்சி மற்றும் ஆசனவாய் விழி புணர்ச்சி அல்லது வாய்வழி புணர்ச்சி என வெவ்வேறு உத்திகளை முயற்சிக்க தம்பதிகள் விரும்புகின்றனர். இது போன்ற சமயங்களில் தொற்றுகளை தடுக்க ஆணுறையை மாற்றவும்.

அசாதாரணமான அறிகுறிகள் : பாலியல் தொடர்பான பிரச்சனைகள் அனைத்துமே மிக நுணுக்கமான, மெல்லிய அறிகுறிகளுடன் தொடங்கும். அவற்றை சாதாரணமாக கருதி நீங்கள் ஒதுக்கி விடக்கூடாது. ஏதேனும் அரிப்பு, தடிப்பு, எரிச்சல் போன்ற உணர்வுகள் ஏற்பட்டால் உடனடியாக மருத்துவரை அணுகி ஆலோசனை செய்யவும்.

மன நலனும் முக்கியம் : பாலுறுப்புகளை சுத்தமாக வைத்துக் கொள்வதுடன் தாம்பத்திய வாழ்க்கை தொடர்பான ஆரோக்கியம் முடிந்து விடுவதில்லை. மாறாக உங்கள் மன நலனும் முக்கியமாகும். குறிப்பாக பாலியல் உறவில் ஈடுபட்டு முடித்த களைப்பு, ஸ்ட்ரெஸ் போன்றவற்றிலிருந்து நீங்கள் வெளிவர வேண்டும்.