உடல் எடையை குறைக்க பாதாம் அல்லது வால்நட்… இரண்டில் எது நல்லது?

நமது வாழ்வியல் முறையில் மாற்றம் ஏற்பட்டதில் இருந்தே உடலுக்கு ஏராளமான பாதிப்புகள் வர தொடங்கிவிட்டன. அதில் முக்கியமாக குறிப்பிட்டு சொல்ல வேண்டுமென்றால் உடல் பருமனால் உண்டாகும் பிரச்சனைகளை எடுத்து கொள்ளலாம். தவறான உணவு பழக்கம், ஒரே இடத்தில் அதிக நேரம் உட்கார்ந்திருத்தல், உடற்பயிற்சி இன்மை போன்றவற்றால் உடல் எடை விரைவிலேயே கூடிவிடும். எடை கூடிய பின் தினமும் உடற்பயிற்சிகளை செய்தாக வேண்டிய கட்டாயத்திற்கு வந்து விடுவோம்.

வெறும் உடற்பயிற்சி மட்டுமில்லாமல் சத்தான உணவு பழக்கத்தை மேற்கொண்டு வந்தால் தான் உடல் எடையை குறைக்க முடியும். அந்த வகையில் பலர் பாதாம் மற்றும் வால்நட்டை எடை குறைக்கும் போது சாப்பிடுவர். இவை இரண்டில் எது மிகவும் சிறந்தது என்பதை பற்றி இந்த பதிவில் தெரிந்து கொண்டு பலன் பெறுவோம்.

எப்படி உதவும்? அதிக நல்ல கொழுப்பு, புரதம் மற்றும் நார்ச்சத்துக்கள் பாதாமில் நிறைந்துள்ளது. எனவே இவற்றை சாப்பிடுவதால் வயிறு நிரம்பிய உணர்வு உண்டாகும். இதனால் அடிக்கடி எதாவது சாப்பிட வேண்டும் என்கிற உணர்வு குறைந்து விடும். குறிப்பாக உடல் எடையை குறைக்க நினைப்பவர்களுக்கு இடையில் சாப்பிட கூடிய தேவையற்ற உணவுகள் தான் எடையை குறைக்க விடாமல் தடுக்கும். இந்த நிலை பாதாம் சாப்பிடுவதால் மாறும்.

உடல் எடை : உடல் எடையை குறைப்பவர்கள் வால்நட்டை காட்டிலும் பாதாம் சாப்பிடுவது சிறந்தது. குறிப்பாக இடுப்பு பகுதியில் உள்ள கொழுப்பை குறைக்க பாதாம் பெரிதும் உதவும் என உடற்பயிற்சி நிபுணர்கள் தெரிவிக்கின்றனர். எனவே உடற்பயிற்சி செய்பவர்கள் பாதாம் சாப்பிட்டு வந்தால் பெரிய அளவில் மாற்றங்களை அடையலாம்.

இதய ஆரோக்கியம் : வால்நட்டில் ஆரோக்கியமான கொழுப்பு அமிலங்கள் அதிகம் உள்ளது. இதை சாப்பிட்டு வருவதால் உடலில் சேர்ந்துள்ள கெட்ட கொழுப்பை குறைத்து விடலாம். மேலும் இரத்த அழுத்தத்தை கட்டுக்குள் வைக்கவும் இது உதவுகிறது.

மூளை நலனுக்கு : உடலில் மிக முக்கிய உறுப்புகளில் ஒன்றான மூளையின் ஆரோக்கியத்தை பாதுகாப்பதில் வால்நட்டிற்கு அதிக பங்கு உண்டு. இதில் அதிக அளவு ஆன்ட்டி- ஆக்சிடென்ட்ஸ் உள்ளதால் மூளை பகுதியில் உண்டாக கூடிய வீக்கத்தை குறைக்கும். மற்றும் பாதிப்புகள் எதுவும் ஏற்படாமல் பார்த்து கொள்ளும்.

எப்படி சாப்பிடுவது? பாதாம் மற்றும் வால்நட்டை வறுத்து சாப்பிட கூடாது. அவ்வாறு செய்வதால் அவற்றில் உள்ள ஊட்டச்சத்துக்கள் குறைந்து விடும். பாதாமை நீரில் ஊற வைத்து தோலை நீக்கிய பின் சாப்பிட வேண்டும். தினமும் 6-7 பாதாம் சாப்பிடுவது உடலுக்கு நல்லது. அதே போன்று 2 முழு வால்நட்டை தினமும் எடுத்து கொள்ளலாம். இந்த அளவை விடவும் அதிகமாக இவற்றை சாப்பிட்டால் உடல் உபாதைகள் உண்டாகும்.