கர்ப்ப காலத்தில் பெண்கள் தவிர்க்க வேண்டிய சில பானங்கள்!

கர்ப்ப காலம் ஒவ்வொரு பெண்ணுக்கும் சிறப்பான தருணம். அந்த காலத்தில் கர்ப்பிணிகள் கூடுதல் கவனமாக இருக்க வேண்டும். அத்துடன், குழந்தையின் ஆரோக்கியம் மற்றும் வளர்ச்சிக்கு தேவையான சத்தான உணவுகளை உட்கொள்ள வேண்டியதும் அவசியம். அதுவும் கர்ப்பிணிப் பெண்கள் எடுத்துக்கொள்ளும் பானங்களில் கூடுதல் கவனம் செலுத்த வேண்டியது அவசியம். காரணம், கர்ப்பிணிகள் எடுத்துக்கொள்ளும் உணவு அவர்களின் குழந்தைகளின் ஆரோக்கியத்தையும் பாதிக்கும். அப்படி கர்ப்பிணி பெண்கள் தவிர்க்க வேண்டிய சில பானங்கள் குறித்து இங்கே காணலாம்.

மது பானம் : கர்ப்பிணிப் பெண்கள் தங்கள் கர்ப்ப காலத்தில் மது பானங்களை எடுத்துக்கொள்வது, குறை பிரசவம், பிறப்பு குறைபாடுகள், குழந்தைகளின் மூளை வளர்ச்சி குறைவு போன்ற பிரச்சனைகளுக்கு வழிவகுக்கும்.

எனர்ஜி ட்ரிங்ஸ் : கடைகளில் விற்கப்படும் எலக்ட்ரோலைட்டுகள் கொண்ட ஆற்றல் பானங்களை கர்ப்பிணி பெண்கள் முழுவதுமாக தவிர்த்தல் நல்லது. ஏனென்றால், இதில் நிறைந்துள்ள காஃபின் சிசுவின் வளர்ச்சிக்கு நல்லது அல்ல.

பதப்படுத்தப்படாத பால் : பதப்படுத்தப்படாத பாலில் (Unpasteurized milk) குழந்தைகளின் உயிருக்கு ஆபத்து மற்றும் நோய்களை ஏற்படுத்தும் பாக்டீரியாக்கள் நிறைந்துள்ளன. எனவே, பதப்படுத்தப்படாத பால்களை கர்ப்பிணி பெண்கள் எடுத்துக்கொள்வது நல்லது அல்ல.

காஃபினேட் பானங்கள் (Caffeinated beverages) : உற்சாக பானங்களின் வகைப்பட்டியலின் கீழ் வரும் இந்த பானங்கள், இளைஞர்கள் அதிகம் விரும்பும் ஒரு பானம் ஆகும். குழந்தைகளுக்கு ஆகாத பானங்களில் ஒன்றான இந்த பானத்தை கர்ப்பிணிகள் தவிர்த்தல் நல்லது.

பதப்படுத்தப்பட்ட பழச்சாறு : கர்ப்ப காலத்தின் போது பெண்கள், புதிய (fresh) பழங்களை கொண்டு தயாரிக்கப்படும் பழச்சாறுகளை எடுத்துக்கொள்ளலாம். ஆனால், கடையில் கிடைக்கும் பதப்படுத்தப்பட்ட பழச்சாறுகளை எடுத்துக்கொள்ள கூடாது. அவை, பாட்டில்களில் நீண்ட நாள் கெடாமல் இருக்க அதில் அமிலங்கள் கலக்க பட்டிருக்கும். இவை கருவில் உள்ள குழந்தைக்கு ஆரோக்கியமானது அல்ல.

கேஃபிர் (Kefir) : கெஃபிர் என்பது புரோபயாடிக்குகள் நிறைந்த ஒரு பேஸ்டுரைஸ் செய்யப்பட்ட, புளிக்கவைக்கப்பட்ட பால் பானமாகும். இந்த பால் கர்ப்பிணி பெண்களுக்கு நன்மை பயக்கும் என சிலர் கூறினாலும், இதை உறுதிப்படுத்தும் ஆய்வுகள் ஏதும் இல்லை.

டயட் சோடா (Diet Soda) : செயற்கை இனிப்புகள் கொண்ட பானங்களை கர்ப்பிணி பெண்கள் முழுவதுமாக தவிர்த்தல் நல்லது. அந்த வகையில் செயற்கை இனிப்புகள் சேர்க்கப்பட்டு தயாரிக்கப்படும் டயட் சோடாக்களை தவிர்த்தல் நல்லது.

நீர், பால் மற்றும் மூலிகை தேநீர் போன்றவை கர்ப்ப காலத்தில், கர்ப்பிணி பெண்களையும் அவர்களது வயிற்றில் வளரும் குழந்தையையும் பாதுகாப்பாக வைத்திருக்க உதவும் சிறந்த பானங்கள் ஆகும்.