இந்த 5 டிப்ஸ் போதும்.. அடிக்கிற வெயில்லையும் ஜில்லுனு இருக்கலாம்

வெளியே தலை காட்ட முடியாத அளவுக்கு வெயில் இப்போதே வாட்டி வதைக்க தொடங்கியிருக்கிறது. அதற்காக வீட்டிற்குள்ளேயே முடங்கியிருக்க முடியுமா? இந்த வெயில் காலத்தில் நம் உடல் உஷ்ணம் அதிகரிக்க சூரியன் மட்டும் காரணமல்ல. நாம் சாப்பிடக் கூடிய சில உணவுகளும் கூட உஷ்ணத்தை அதிகரிக்கிறது. நாள் முழுவதும் அவ்வபோது தண்ணீர் அருந்தி நீர்ச்சத்தை தக்க வைத்துக் கொள்வதுடன் நம் உடலை குளுமையாக வைத்துக் கொள்ள பின்வரும் ஆலோசனைகளை பின்பற்றலாம்.

வெப்பத்தை குறைப்பதற்கான வழிமுறைகள் : கோடை காலத்தில் நேரடியாக தண்ணீர் மட்டுமே அருந்த வேண்டும் என்பதில்லை. தண்ணீர் சத்து கொண்ட பானங்கள் மற்றும் உணவுப் பொருட்களும் கூட நல்ல பலனை தரும். அந்த வகையில் இளநீர், தர்பூசணி, நுங்கு போன்றவற்றை எடுத்துக் கொள்ளலாம். தண்ணீரில் ஊற வைத்த சப்ஜா விதைகள், பாதாம் பிசின் போன்றவற்றை ஜூஸ் மற்றும் சாலட் போன்றவற்றில் சேர்த்துக் கொள்ளலாம். அது மிகுந்த குளிர்ச்சியை தரும்.

தளர்வான உடைகளை அணியவும் :  இறுக்கமான உடைகளை அணிவதால் உடலுக்குள் புழுக்கம் மென்மேலும் அதிகரிக்கும். தளர்வான உடைகள், அதுவும் பருத்தியில் தயாரான உடைகளை அணிந்தால் உடலுக்கு நல்ல காற்றோட்டம் கிடைக்கும். கருப்பு நிற ஆடைகள், அடர் நிறம் கொண்ட ஆடைகளை தவிர்த்து லேசான நிறம் கொண்ட ஆடைகளை அணியவும்.

நிழல் பார்த்து ஒதுங்கவும் : சொந்தப் பணிகளுக்காக வெளியிடங்களுக்கு செல்ல வேண்டியிருக்கும் என்பதில் மாற்றுக் கருத்து இல்லை. ஆனால், அவ்வபோது வெயிலில் இருந்து ஒதுங்கி நிழல் கொண்ட மரத்தடியில் அல்லது பேருந்து நிறுத்தம் போன்ற பொது இடங்களில் ஓய்வு எடுத்துக் கொள்ளவும்.

லேசான உடற்பயிற்சிகள் மற்றும் குளியல் : கோடை காலத்தில் கடுமையான பயிற்சிகள் செய்வது உடலுக்கு சோர்வை ஏற்படுத்தும். ஆகவே, லேசான பயிற்சிகளை செய்யவும். பயிற்சி செய்து வியர்வையை துடைத்து ஆசுவாசப்படுத்திய பிறகு குளிக்கச் செல்லலாம். அதுவும் குளுமையான நீரில் குளிப்பது நல்ல பலனை தரும்.

தவிர்க்க வேண்டிய நடவடிக்கைகள் : உச்சிவெயில் அடிக்கும் நேரத்தில் முடிந்தவரை வெளியிடங்களுக்குச் செல்வதை தவிர்க்கலாம். சூடான, மசாலா நிறைந்த உணவுகளை தவிர்க்க வேண்டும். அவை உடல் உஷ்ணத்தை அதிகப்படுத்தும் மற்றும் நீர்ச்சத்து குறைபாட்டை ஏற்படுத்தும்.

மது, சிகரெட், காஃபி போன்ற பழக்கங்களை குறைத்துக் கொள்ள வேண்டும். அதிக வெப்பம் கொண்ட சமயத்தில் கடுமையான வேலைகளை செய்வது மயக்கம், ஸ்டிரோக் போன்ற பாதிப்புகளை ஏற்படுத்தும். அதுகுறித்து எச்சரிக்கையாக இருக்க வேண்டும்.