இந்த 5 அறிகுறிகள் இருந்தால் உங்களுக்கு இரத்த சோகை இருக்கலாம்..!

இரத்தத்தில் சிவப்பு அணுக்களின் உள்ளே இருக்கும் மூலக்கூறே ஹீமோகுளோபின் எனப்படுகிறது. நாம் உள்ளிழுக்கும் காற்றின் மூலம் ஆக்ஸிஜனை பிரித்து மற்ற உறுப்புகளுக்கு அனுப்பும் வேலையைத்தான் இது செய்கிறது. இதனால் உறுப்புகளில் வளர்ச்சிதை மாற்றத்தை ஊக்குவிக்கிறது.

இந்த ஹீமோகுளோபின் அளவானது அண்களுக்கு 14-18கி/டெ.லி மற்றும் பெண்களுக்கு 12-16 கி/டெ.லி இருக்க வேண்டும். இதன் அளவு குறைவாக இருந்தால் உடல் ஆரோக்கியம் பல வகைகளில் பாதிக்கப்படும். எனவே அவ்வாறு குறையும் போது நம் உடலில் தோன்றும் அறிகுறிகள் என்னென்ன பார்க்கலாம்.

சீரற்ற இதயத்துடிப்பு : இதயத்துடிப்பு திடீரென அதிகரிப்பது , குறைவது என அதன் துடிப்பு வேகத்தில் மாற்றம் உண்டாகும். ஏனெனில் மற்ற பாகங்களுக்கு ஆக்ஸிஜன் சீராக செல்லாததன் காரணமாக இதயம் அதை ஈடு செய்ய துடிப்பை அதிகரித்துக் குறைக்கும். அதன் வெளிப்பாடே இந்த அறிகுறி.

வெளிர் நிற தோல் : இரத்தம் இல்லையென்றாலே தோல் வெளிர் நிறத்தில் காணப்படும். அதோடு கண்கள், நகங்கள் மற்றும் பற்களின் ஈறுகளும் இரத்தமின்றி வெளிர்ந்து இருக்கும். இவ்வாறு இருந்தால் இரத்தக் குறைபாடு இருக்கலாம்.

தசை உறுதி இழத்தல் : இரத்தத்தில் ஹீமோகுளோபின் குறைவது இரும்புச் சத்து குறைபாட்டாலும் உண்டாக்கும். எனவே இரும்புச்சத்து இல்லை என்றால் தசைகள் சுருக்கம் விழுந்து பலவீனமடையும். இதனால் கை , கால்கள் பலவீனமாக இருக்கும்.

சிராய்ப்பு : ஹீமோகுளோபின் குறைந்தால் உடலில் ஆங்காங்கே சிராய்ப்புகள் உண்டாகும். ஹீமோகுளோபின் இல்லாமையால் பிளேட்லெட்டுகளின் உற்பத்தியும் குறையும். இதனால் இரத்தம் உறைவதை கட்டுப்படுத்தாது. இதனால் ஆங்காங்கே சிராய்ப்புகள் உண்டாகும். நாளடைவில் இது காயங்களாக மாறி இரத்தக் கசிவை உண்டாக்கலாம்.

தலைவலி : ஹீமோகுளோபின் சீராக இல்லாததால் தலைவலி, மூச்சடைப்பு , மயக்கம், தலைசுற்றல் போன்ற பிரச்னைகள் உண்டாக்கும். இதனால் உற்சாகமின்மை, எதிலும் ஆர்வமின்மை, எந்த வேலையும் செய்ய முடியாமல் எப்போதுமே தூங்கிக்கொண்டே இருக்கலாம் என்கிற உணர்வு போன்றவை இருக்கும்.

அதிகரிக்க என்ன செய்யலாம் : இரும்புச் சத்து நிறைந்த உணவுகளை உட்கொள்ளுங்கள். கீரை வகைகள், பீட்ரூட், ஆட்டு இறைச்சி, ஈரல், வான்கோழி இறைச்சி, வேர்க்கடலை, கருப்பு கொண்டைக் கடலை,முட்டை, உருளைக்கிழங்கு, மாதுளை, நட்ஸ் வகைகள், கடல்சார் உணவுகள்,தேன், ஆப்பிள்,பேரிச்சை போன்ற உணவுகளில் தினசரி ஒன்று என உட்கொண்டு வாருங்கள். இதனால் ஹீமோகுளோபின் குறைபாடு ஏற்படாமல் தடுக்கலாம்.