சிறுநீரில் மோசமான வாடை தென்பட்டால் உஷார்... சிறுநீரக பாதிப்பின் அறிகுறியாக இருக்கலாம்..!

சிறுநீரில் பெரும்பகுதி தண்ணீர் தான் இருக்கிறது என்பதால் அதில் பெரும்பாலும் வாடை இருக்காது. ஆனால், சில காரணங்களால் சகிக்க தகுந்த அளவில் வாடை இருப்பது இயல்பானது தான். துர்நாற்றமும் இல்லாமல், சாதாரண நிலையில் இருக்கும் அந்த வாடை ஒன்றும் கவலைக்குரிய விஷயமல்ல.

ஆனால், வாடை அடிப்பதுடன் சிறுநீருடன் சேர்ந்து ரத்தம் வருவது அல்லது சிறுநீர் கழிக்கும் போது எரிச்சல், அடிக்கடி சிறுநீர் கழிக்க நேரிடுவது என்பதெல்லாம் ஏதோ நோய்களின் அறிகுறிகள் தான். அதிலும், சிறுநீரில் பலமான அமோனியா வாடை தென்படுகிறது என்றால் அது சிறுநீர் பாதை தொற்றின் அறிகுறியாகும்.

சிஸ்டிடீஸ் என்றால் என்ன? சிறுநீர் பையில் அழற்சியை ஏற்படுத்தக் கூடிய சிறுநீர் பாதை தொற்றுக்குப் பெயர்தான் சிஸ்டிடீஸ் ஆகும். பொதுவாக சிறுநீர் கடந்து வரும் குழாயில் பாக்டீரியா கலப்பதன் காரணமாக இவ்வாறு நடைபெறுகிறது. பாலுறவின்போது இந்த பாக்டீரியா தொற்று ஏற்படலாம். கழிவறையை பயன்படுத்திய பின் பின்பக்கத்தில் இருந்து முன்பக்கமாக நோக்கி துடைப்பது, சிறுநீரக கல், கர்ப்பமாக இருப்பது, ஆண்களுக்கான விரைவீக்கம், பெண்களுக்கு நிகழும் மெனோபாஸ், நோய் எதிர்ப்பு சக்தி பலவீனம் போன்ற காரணங்களாலும் இது நிகழக் கூடும்.

சிஸ்டிடீஸ் பிரச்சினையின் அறிகுறிகள் : சிறுநீர் கழிக்கும்போது வலி, வழக்கத்திற்கு மாறாக அடிக்கடி சிறுநீர் கழிப்பது, சிறுநீர் அடர்த்தியாக காட்சியளிப்பது மற்றும் கடுமையான வாடை கொண்டிருப்பது, அடிவயிற்றுப் பகுதியில் வலி ஏற்படுவது போன்றவை இந்த பிரச்சினையின் அறிகுறிகள் ஆகும்.

கவுச்சி வாடை : பெண்களுக்கு பாக்டீரியா தொற்றுகள் காரணமாக பயங்கரமான கவுச்சி வாடை தென்படலாம். பெண்ணுறுப்பில் இருந்து ஏற்படும் க்ரே-ஒயிட் கலர் கசிவில் இருந்து இந்த வாடை தொன்றலாம். பாக்டீரியா தொற்று என்பது தீவிரத்தன்மை மிகுந்த விஷயமல்ல என்றாலும், நாள்பட்ட பிரச்சினையாக இருப்பின் மருத்துவரை அணுகவும். சிலருக்கு ஆண்டிபயாடிக் மருந்துகள் தேவைப்படலாம்.

இனிப்பு வாடை கொண்ட சிறுநீர் : சிலருடைய சிறுநீரில் இனிப்பு அல்லது பழ வாடை என்பது அடிக்க கூடும். உங்கள் சிறுநீரில் அதிகப்படியான சர்க்கரை வெளியேறுவதன் அறிகுறி இதுவாகும். கட்டுப்பாடு இல்லாத நீரிழிவு நோயின் எதிரொலியாக சிறுநீரில் மிக அதிகமான சர்க்கரை வெளியேறும்.

பிற காரணங்கள் : உடலில் நீர்ச்சத்து பற்றாக்குறை ஏற்படுவதன் காரணமாகவும் சிறுநீரில் கெட்ட வாடை தென்படலாம். பூண்டு, தண்ணீர் விட்டான் கிழங்கு, காஃபி போன்ற உணவு மற்றும் பானங்களின் காரணமாகவும் வாடை ஏற்படலாம். பொதுவாக சிறுநீரில் ஏற்படக் கூடிய வாடை தற்காலிகமானதாகவும், சுயமாக குணமடையக் கூடியதாகவும் இருக்கும். ஆனால், சிறுநீர் கலரில் மாற்றம் மற்றும் வழக்கத்திற்கு மாறாக மிகுதியான வாடை போன்ற அறிகுறிகள் இருந்தால் மருத்துவர்களை அணுகவும்.