ஒவ்வொரு மாதமும் மாதவிடாய் வலியால் அவதிப்படுகிறீர்களா..? தினசரி உணவில் இவற்றையும் சேர்த்துக்கொள்ளுங்கள்..!

பெண்கள் எவ்வளவு வலிமை மிகுந்தவர்களாக இருந்தாலும் இந்த மாதவிலக்கு என்பது அவர்களுக்கு சிரமம் ஏற்படுத்துகின்ற விஷயம் தான். அதுவும் மாதவிலக்கு வலி மிகுந்ததாகவோ அல்லது சீரற்றதாகவோ இருந்தால் அதனால் அவர்கள் எதிர்கொள்ளும் பாதிப்புகள் ஏராளம். தசை பிடிப்பு, வயிறு உப்புசம், மனச் சோர்வு போன்ற காரணங்களால் பெண்கள் மிகவும் அவதி அடைவார்கள். குறிப்பாக, இனிப்பான எந்த உணவும் இந்த சமயத்தில் அவர்களுக்கு கசப்பான அனுபவத்தை ஏற்படுத்தக் கூடியதாகவே அமையும். மாதவிலக்கு அறிகுறிகள் ஒவ்வொரு நபருக்கு மாறுபடுகிறது. அதே சமயம், உரிய முறையில் கவனமெடுத்து எச்சரிக்கையுடன் செயல்பட்டால் ஒவ்வொரு மாதமும் மாதவிலக்கு சீரான கால அளவில் நடைபெறும்.

இரும்புச்சத்து : ஒவ்வொரு மாதமும் நீங்கள் உதிரத்தை இழக்கும்போது இரும்புச் சத்தையும் சேர்த்தே இழக்கிறீர்கள். இதனால் உடல்சோர்வு, வலி மிகுந்த தசை பிடிப்புகள் போன்ற பிரச்சினைகள் ஏற்படும். ஆகவே, கீரைகள், மாதுளம்பழம், பீட்ரூட், பேரீட்சை போன்ற இரும்புச்சத்து மிகுந்த உணவுகளை எடுத்துக் கொள்ள வேண்டும்.

நார்ச்சத்து : உடலில் உள்ள கழிவுகள் மற்றும் நச்சுக்களை வெளியேற்றுவதற்கு நார்ச்சத்து உதவிகரமாக இருக்கிறது. குறிப்பாக உடல் பிடிப்புகளை ஏற்படுத்தும் ஈஸ்ட்ரோஜனை வெளியேற்ற இது உதவுகிறது.

சப்ஜா விதைகள் : விட்டமின்கள், மினரல்கள் போன்றவை நிறைந்த உன்னதமான உணவு இது. இதில் ஒமேகா 3 ஃபேட்டி ஆசிட், புரதம் போன்றவையும் நிறைந்துள்ளன. மாதவிலக்கை சீர்படுத்தும் ஆற்றல் இதற்கு இருக்கிறது.

சிறு தானியங்கள் : சிறுதானியங்களை உணவில் சேர்த்துக் கொள்வதால் மாதவிலக்கு கால தசை பிடிப்புகளை போக்கலாம். கேழ்வரகு, சோளம், கம்பு, தினை போன்றவற்றை நீங்கள் எடுத்துக் கொள்ளலாம்.

நெய் : மாதவிலக்கு காலத்தில், ஒவ்வொரு வேளையும் உணவின் போது ஒரு ஸ்பூன் அளவு நெய் சேர்த்துக் கொண்டால் செரிமானம் தொடர்புடைய பிரச்சினைகள் நீங்கும்.

ஆளி விதைகள் : நம் உடலில் உள்ள அதிகப்படியான ஈஸ்ட்ரோஜன் அளவுகளை வெளியேற்றும் ஆற்றல் கொண்டது. இதனால் மாதவிலக்கு சீரடையும்.

மஞ்சள் மற்றும் இஞ்சி : மஞ்சளில் உள்ள அதிகப்படியான ஆண்டிஆக்ஸிடண்ட் என்பது மாதவிலக்கு சீரானதாக வைத்திருக்க உதவும். அதுமட்டுமல்லாமல் ஹார்மோன்களை முறைப்படுத்த உதவிகரமாக இருக்கும். மாதவிலக்கு தாமதமானால், மஞ்சள் மாற்றும் இஞ்சி சேர்த்து கொதிக்க வைத்த சாறு அருந்தலாம்.

தண்ணீர் : மாதவிலக்கு காலத்தில் உடலுக்கு நீர்ச்சத்து அவசியமானது ஆகும். குறிப்பாக வெந்நீர் அருந்தினால் உடலில் உள்ள பிடிப்புகள் குறையும்.

மெக்னீசியம் : மாதவிலக்கு காலத்தில், முதலில் கர்ப்பப்பை தசைகளில் தான் வலி உண்டாகிறது. அதை இலகுவாக வைத்திருக்க மெக்னீசியம் உதவுகிறது. கொண்டக்கடலை, முழு தானியங்கள், அவகோடா போன்றவற்றில் இந்தச் சத்து உள்ளது.

சாமந்தி தேநீர் : மாதவிலக்கு வருவதற்கு சில நாட்கள் முன்பாகவே சாமந்தி தேநீர் அருந்தலாம். உடலில் உதிரப்போக்கு ஏற்படும்போது உண்டாகும் வலியை குறைக்க இது உதவும்.