வெயில் காலத்தில் சியா விதைகளை ஏன் சாப்பிடனும்..? 9 நன்மைகளை தெரிஞ்சுக்கோங்க..!

சியா விதைகள் இல்லாமல் ஒரு கோடை காலத்தை கடப்பது கடினம். சாதாரணமாக சாலையோரங்களில் உள்ள ஜூஸ் கடைகளில் கூட நாம் பருகும் குளிர்பானங்களில் சியா விதைகளை கலந்து தருவார்கள். இது மட்டுமல்லாமல் சாலட் தயாரிக்கும்போது சியா விதைகளை சேர்த்துக் கொள்ளலாம். இதை எப்படி உபயோகித்தாலும் முதலில் தண்ணீரில் ஊற வைத்துக் கொள்ள வேண்டும்.

பார்ப்பதற்கு அளவில் சிறியதாக உள்ள சியா விதைகளில் நம் உடலுக்கும், மனதிற்கும் பலன் தரக் கூடிய எக்கசக்க சத்துக்கள் உள்ளது. சியா விதைகளில் ஆக்ஸிஜனேற்றிகள், தாதுக்கள், நார்ச்சத்து மற்றும் ஒமேகா-3 கொழுப்பு அமிலங்கள் உள்ளன. இந்த ஊட்டச்சத்துக்கள் உடல் செயல்பாடுகள் மற்றும் அமைப்புகளை ஆதரிக்கிறது. சியா விதைகளின் நன்மைகள் பற்றி இங்கே காணலாம்.

நார்ச்சத்து நிரம்பியது : சியா விதைகளில் சுமார் 92 சதவீதம் நார்ச்சத்து நிரம்பியுள்ளது. அதேசமயம், மாவுச்சத்து குறைவாக உள்ளது. இதில் இருக்கும். நார்ச்சத்தானது கரையும் தன்மை கொண்டது. நம் குடலில் உள்ள நன்மை பயக்கும் பாக்டீரியாக்களுக்கு உணவாக பயன்படுகிறது. இதனால், குடல் நலன் மேம்படும்.

இதய நோய் ஆபத்துகளை குறைக்கும் : தினசரி உங்கள் உணவுப் பட்டியலில் சியா விதைகள் இருந்தால், இதயம் சம்பந்தப்பட்ட நோய்களை தவிர்க்கலாம். குறிப்பாக, ரத்தத்தில் உள்ள டிரிகிளைசைரைடு கொழுப்பை இது கரைக்கிறது. உடல் உள்ளுறுப்புகளின் வீக்கம் குறைவதுடன், இன்சுலின் சுரப்பு அதிகமாகிறது. அதுமட்டும் அல்ல, உடலுக்கு நன்மை பயக்கும் ஹெச்டிஎல் கொழுப்பு அதிகரிக்கும்.

எலும்புகளை பலப்படுத்தும் : சியா விதைகளில், நமது எலும்புகளுக்கு வலுவூட்டக் கூடிய கால்சியம், புரதம், மேக்னீசியம் மற்றும் பாஸ்பரஸ் போன்ற சத்துகள் உள்ளது. பால் பொருட்களை தவிர்ப்பவர்களுக்கு, கால்சியம் சத்து கிடைக்க உதவியாக இருக்கும்.

ஆன்டி-ஆக்ஸிடண்ட் அதிகம் : உடலின் செல்கள் மீது தாக்குதல் நடத்தக் கூடிய கிருமிகளை அழிப்பதில், சியா விதைகளில் உள்ள ஆன்டி-ஆக்ஸிடண்ட் சத்துகளின் பங்கு அதிகமாகும். வயது முதிர்வை கட்டுப்படுத்தும்.

அதிக புரதச்சத்து : சியா விதைகளில் உயர் தரத்திலான புரதம் நிரம்பியிருக்கிறது. எனவே, இதை அதிகம் எடுத்துக் கொள்ளும் போது நமக்கு பசி உணர்வு கட்டுப்படும். இதனால், இரவு நேர பசி அல்லது ஸ்நாக்ஸ் சாப்பிடும் ஆசை கட்டுப்படுத்தப்படும்.

ஊட்டச்சத்துகள் நிரம்பியது : ஒரு அவுன்ஸ் சியா விதைகளில் 11 கிராம் நார்ச்சத்து, 4 கிராம் புரதம், 5 கிராம் ஒமேகா 3 ஃபேட்டி ஆசிட் ஆகியவை நிரம்பியுள்ளது. இது தவிர 18 சதவீதம் கால்சியம், 30 சதவீதம் மேக்னீசியம், 27 சதவீதம் பாஸ்பரஸ் ஆகியவை உள்ளன. வெறும் 137 கலோரிகள் மட்டுமே உண்டு.

உடல் எடையை குறைக்க உதவும் : அதிக புரதச் சத்து மற்றும் நார்ச்சத்து இதில் இருப்பதால் உடல் எடையை குறைக்க உதவியாக இருக்கும். இதை சாப்பிடும்போது வயிறு நிரம்பிய உணர்வு ஏற்படும். எனவே, எளிமையாக உடல் எடையை குறைக்கலாம்.

ஒமேகா 3 ஃபேட்டி ஆசிட் : சப்ஜா விதைகளைப் போன்றே சியா விதைகளிலும் ஒமேகா 3 ஃபேட்டி ஆசிட் அதிகமாக உள்ளது. விலங்குகளில் இருந்து கிடைக்கும் ஒமேகா 3 ஃபேட்டி ஆசிட் அளவுக்கு கிடைக்காது என்றாலும், இதுவும் உடலுக்கு நன்மை தரும்.

உடல் உஷ்ணத்தை தீர்க்கும் : கோடை காலத்தில் நம் உடலில் நீர்ச்சத்தை தக்க வைத்துக் கொள்ளவும், உடலை குளிர்ச்சியாக வைத்துக் கொள்ளவும் இது உதவிகரமாக இருக்கும். சியா விதைகளை எடுத்துக் கொண்டால் வாதம், பித்தம் குறையும். மேலும், உடலில் கபம் (நீர்ச்சத்து) அதிகரிக்கும் என்றும் ஆயுர்வேத மருத்துவம் கூறுகிறது.