குழந்தை பெற்றுக்கொள்ள திட்டமிடும் பெண்கள் இந்த உணவுகளை சாப்பிட்டால் சீக்கிரமே கர்ப்பமடையலாம்..!

புதிதாக திருமணம் செய்து கொண்டவர்கள் சில வாரங்கள் அல்லது மாதங்களுக்கு கர்ப்ப தடை முறைகளை கையாண்டு, வாழ்க்கையை குதூகலமாக கழிக்க விரும்பினாலும், அதற்குப் பிறகு தங்களுக்கு என்று ஒரு குழந்தை வேண்டும் என்ற ஆவல் பிறந்துவிடும். அத்தகைய சூழலில், ஆணுறை போன்ற கர்ப்ப தடை சாதனங்களைத் தவிர்த்து விட்டு, இயற்கையான முறையில் இல்லற வாழ்க்கையை தொடங்குவார்கள்.

என்னதான் இல்லற வாழ்க்கை இனிமையானதாக இருந்தாலும், சில வகை உணவுகளை எடுத்துக் கொள்வது நீங்கள் உடனடியாக கர்ப்பம் தரிப்பதற்கு உதவிகரமாக இருக்கும். ஆண், பெண் இரு பாலரும் சத்தான உணவுகளை சாப்பிடுவதுடன், வாழ்வியல் முறைகளில் சில ஆலோசனைகளை பின்பற்றினால், அவர்களது இனப்பெருக்கத் திறன் அதிகரிக்கும்.

நீங்கள் உண்ணும் உணவைப் பொறுத்து உங்கள் குடல் நலன் மேம்படும், ரத்த ஓட்டம் மற்றும் ஹார்மோன் சுரப்பு ஆகியவை சீராக இருக்கும். இதனுடன், இதர உடல் ஆரோக்கியமும் இணையும்போது, நீங்கள் இயல்பாக கர்ப்பம் அடைவதற்கான வாய்ப்புகள் அதிகரிக்கும்.

சால்மன் மீன் : சால்மன் மீனில் ஒமேகா 3 ஃபேட்டி ஆசிட் நிறைந்துள்ளது. தமிழகத்தில் இந்த மீனை காளை கெண்டை என்று குறிப்பிடுகின்றனர். இந்த மீன் சாப்பிடுவதால் உங்களது இனப்பெருக்க நலன் மேம்படும். இதில், மிக அதிகப்படியான புரதம் இருக்கிறது. உடலுக்கு தீங்கு விளைவிக்கும் மெர்க்குரி என்பது ஒருசில மீன்களில் உண்டு என்றாலும், இந்த சால்மன் மீன்களில் அந்தப் பிரச்சனை கிடையாது.

இறைச்சி : ஆடு, கோழி போன்ற இறைச்சிகளைக் காட்டிலும் அதில் உள்ள ஈரல், கல்லீரல், சிறுநீரகம், மூளை, குடல் போன்ற உறுப்புகளை எடுத்துக் கொள்வது நல்ல பலன் தரும். இதுபோன்ற உறுப்புகளில் விட்டமின் பி, இரும்புச்சத்து மற்றும் ஜிங்க் போன்ற சத்துக்கள் நிரம்பியிருக்கும்.

ஷெல்பிஷ் : ஓட்டுடன் இருக்கக் கூடிய கடல்வாழ் அல்லது நீர்வாழ் உயிரினங்கள். உதாரணத்திற்கு நண்டு, இறால், லாப்ஸ்டர் போன்ற உணவுகளை எடுத்துக் கொள்ளலாம். ஆனால், இவற்றை நன்றாக வேக வைத்து சாப்பிட வேண்டும்.

முழு முட்டைகள் : புரதச்சத்து நிரம்பியது என்பதால் கர்ப்பம் தரிப்பதற்கான ஆகச் சிறந்த உணவுகளில் ஒன்றாக முட்டை இருக்கிறது. இதில் விட்டமின் பி12 மற்றும் இ போன்ற சத்துக்களும் நிரம்பியுள்ளன. சிலர் முட்டையின் மஞ்சள் கருவை தூக்கி எறிந்து விடுவார்கள். ஆனால், மஞ்சள் கருவில் தான் நீங்கள் கர்ப்பம் அடைவதற்கான சத்துக்கள் நிரம்பியுள்ளன என்பதை மறக்காதீர்கள்.

வால்நட்ஸ் : ஒமேகா 3 ஃபேட்டி ஆசிட் மற்றும் ஒமேகா 6 ஃபேட்டி ஆசிட் நிரம்பியது. இது மூளையின் செயல்திறனை அதிகரிப்பதோடு, ஹார்மோன் சுரப்பை ஒழுங்குபடுத்துகிறது. தினசரி வால்நட் சாப்பிடும் ஆண்களுக்கு விந்தணுக்களின் ஆரோக்கியம் மேம்படும்.

பீன்ஸ் மற்றும் பயறுகள் : பீன்ஸ் மற்றும் பயறுகளில் அதிகப் புரதச்சத்து மற்றும் நார்ச்சத்து நிரம்பியுள்ளது. இது கர்ப்பப்பையின் ஆரோக்கியத்தை மேம்படுத்தும். இறைச்சிகளில் கிடைக்கும் புரதத்திற்கு ஈடாக இது உள்ளது.

புளிக்காத தயிர் மற்றும் வெண்ணெய் : கால்சியம், புரோபயாடிக்ஸ், விட்டமின் டி போன்ற சத்துக்கள் நிறைந்த புளிக்காத தயிர் மற்றும் வெண்ணெய் போன்றவை கர்ப்பப்பை ஆரோக்கியத்தை மேம்படுத்தும். இதில் புரதச்சத்தும் நிறைவாக உள்ளது.