ஓட்ஸ் நல்லதுதான் என்றாலும் அதிகமாக சாப்பிட்டால் என்னென்ன பக்கவிளைவுகள் வரும் தெரியுமா..?

காலை உணவை ஹெல்தியாக நமக்கான பெஸ்ட் மற்றும் ஈசியான ஆப்ஷன் ஓட்ஸ்தான். இதில் நார்ச்சத்து நிறைந்திருப்பதால் உடல் எடை குறைக்க நினைப்போர், சர்க்கரை நோயாளிகளுக்கு மிகச்சிறந்த உணவு. இது என்னதான் ஆரோக்கியம் நிறைந்தது என்றாலும் அளவுக்கு அதிகமாக உட்கொண்டால் ஆபத்து. எப்படி எந்தெந்த வகைகளில் பக்கவிளைவுகளை உண்டாக்கும். ஒரு நாளைக்கு ஓட்ஸ் உணவின் அளவு என்ன போன்ற தகவல்களைக் காணலாம்.

தினமும் காலை ஓட்ஸ் உணவை மட்டும்தான் சாப்பிடுகிறீர்கள் எனில் நீங்கள் மற்ற உணவுகளை சாப்பிடத் தவறுகிறீர்கள். இதனால் மற்ற உணவுகளிலிருந்து கிடைக்கக் கூடிய ஊட்டச்சத்து கிடைக்காமல் போகிறது. எனவே வாரம் 2 முறை காலை உணவாக ஓட்ஸ் சாப்பிடலாம். மற்ற நாட்களில் ஊட்டச்சத்து மிக்க காலை உணவுகளை தேர்வு செய்யலாம்.

ஓட்ஸ் சாப்பிடுவது உடல் எடையைக் குறைக்க உதவும் என்றாலும் அதிகமாக சாப்பிடுவது தசைகளுக்கு பாதிப்பை உண்டாக்கும். அதாவது ஓட்ஸில் நார்ச்சத்து நிறைவாக இருப்பதால் உடலில் அதிகமான நார்ச்சத்து சேர்ந்துவிடும். இதனால் உங்களுக்கு பசியே எடுக்காமல் போகும். இதனால் மற்ற ஊட்டச்சத்துக்களை பெர முடியாமல் உடலின் ஆற்றல் குறையும். இதை தொடர்ந்து மற்ற பாதிப்புகளையும் சந்திக்கக் கூடும்.

வயிறு மந்தம் : ஏற்கெனவே குறிப்பிட்டதுபோல் நார்ச்சத்து அதிகமாக இருந்தால் செரிமாண ஆற்றல் குறையும். இதனால் வயிறு மந்தமாக இருப்பதுபோல் தோன்றும். இதனால் எந்த உணவையும் சாப்பிடப் பிடிக்காது. உங்களுக்கு ஏற்கெனவே வாயுத்தொல்லை இருப்பின் நிலைமை இன்னும் மோசமாகிவிடும்.

அளவுக்கு அதிகமான சேர்க்கை : உடல் எடையை குறைக்க ஓட்ஸ் சாப்பிடுவோர் ஹெல்தியாக சாப்பிடுகிறேன் என அதோடு நட்ஸ், பழங்கள் , சிரப், என பல வகையான உணவுப் பொருட்களால் அலங்கரித்து சாப்பிடுவார்கள். இதுபோன்று சாப்பிடுவதால் உடல் எடை குறைவதற்கு மாறாக அதிகரித்துவிடும். எனவே உஷாராக இருங்கள்.