நீரிழிவு நோயாளிகளுக்கான கோடைக்கால ஜூஸ் வகைகள்...

வாட்டி வதைக்கும் கோடை வெயிலால் நம் உடலில் நீர்ச்சத்து குறைபாடு ஏற்படும். இதை சமாளிக்க குளிர்ச்சியான மற்றும் புத்துணர்ச்சியான பானங்களை நாம் எடுத்துக் கொள்கிறோம். பெரும்பாலும் குளிர்பானங்கள் அனைத்துமே ஆரோக்கியமானவை, நம் உடலின் நீர்ச்சத்தை தக்க வைக்க உதவுபவை என்றாலும் கூட, அதில் உள்ள சர்க்கரை என்பது நீரிழிவு நோயாளிகளுக்கு சிக்கலை ஏற்படுவதாக அமைந்து விடும்.

குறிப்பாக, நீண்ட காலமாக ரத்த சர்க்கரை அளவு உச்சத்தில் இருக்கும் மக்களுக்கு உடனடி சிக்கல்களை ஏற்படுத்துவதாக குளிர்பானங்கள் அமைந்து விடும். அதே சமயம், அவர்களும் தங்களின் நீர்ச்சத்து குறைபாட்டை போக்கவும், உடலுக்குத் தேவையான எலக்ட்ரோலைட்ஸ் பெறவும் அவசியமான நடவடிக்கைகளை கையாள வேண்டும்.

சிறுதானிய கூழ் : கேல்வரகு, தினை, கம்பு போன்ற சிறுதானியங்களில் கூழ் செய்து, அதை மண் பானையில் வைத்து குளுமைப்படுத்த வேண்டும். பிறகு வெயில் நேரத்தில் இந்தக் கூலில் தண்ணீர் அல்லது மோர் கலந்து குடித்து வந்தால், உடலில் நீர்ச்சத்து குறைபாடு நீங்குவதோடு மட்டுமல்லாமல், நீரிழிவு நோயாளிகளின் சர்க்கரை அளவை கட்டுப்பாட்டிற்குள் வைத்திருக்கவும் உதவுகிறது. புளிப்பு சுவை கிடைக்க இதில் சில துளிகள் எலுமிச்சை சாறு கலந்து கொள்ளலாம்.

இஞ்சி மற்றும் எலுமிச்சை சாறு : உடலில் சர்க்கரை அளவை கட்டுப்படுத்த இஞ்சி உதவிகரமாக இருக்கும். கோடை காலத்தில் தாகத்தால் அவதியுறும் நீரிழிவு நோயாளிகளுக்கு இது பெரிய அளவில் உதவிகரமாக இருக்கும். இதில், எலுமிச்சை சாறு கலந்து பருகும்போது இன்னும் சுவையாக இருக்கும். இஞ்சி, எலுமிச்சை சாறு, செயற்கை சர்க்கரை சேர்க்கப்படாத நன்னாரி சர்பத் ஆகியவை கலந்து அருந்தலாம்.

காய்கறி ஸ்மூத்தி : பாலக்கீரை, இளநீர், கேரட் போன்றவற்றை சேர்த்து மிக்ஸியில் அரைத்து அருந்தாலும். நீரிழிவு நோய் அல்லாதவர்கள் கூட இதை எடுத்துக் கொள்ளலாம். இதேபோல சர்க்கரை அளவு குறைவான எந்தவொரு காய்கறி சேர்த்தும் ஸ்மூத்தி தயார் செய்யலாம்.

உப்பு சேர்த்த லெஸ்ஸி : இரண்டு கப் தயிர், ஒரு கிளாஸ் தண்ணீர், சில ஐஸ் கட்டிகள் மற்றும் ஒரு டீ ஸ்பூன் அளவு சீரக தூள் ஆகியவற்றை சேர்த்து அரைத்து பருகலாம். கோடைகாலத்தில் நீரிழிவு நோயாளிகளுக்கு சுவை மிகுந்த பானமாக இது இருக்கும்.

முலாம்பழ ஜூஸ் : முலாம்பழத்தில் நார்ச்சத்து மிகுதியாக இருக்கிறது. இது இரும்புச் சத்து, ஆண்டிஆக்ஸிடண்ட்ஸ், ஃபோலேட்ஸ் போன்ற சத்துக்களும் இருக்கின்றன. இந்த ஜூஸ் உங்கள் வயிற்றை குளுமையாக வைத்து கொள்ள உதவுகிறது. கோடை காலத்தில், நீரிழிவு நோயாளிகளுக்கான வரப்பிரசாதமாக இந்த முலாம் பழ சர்பத் இருக்கும்.