உணவுக்கு பின் வெற்றிலை மெல்லுவதால் கிடைக்கும் பலன்கள்... விசேஷங்களில் பயன்படுத்துவதற்கும் இதுதான் காரணமா..?

தமிழர் பாரம்பரியத்தில் ‘தாம்பூலம்’ என்னும் சொல் மிகுந்த முக்கியத்துவம் வாய்ந்தது. காதுகுத்து, திருமணம் என எந்தவொரு விசேஷங்களுக்கு நீங்கள் சென்றாலும் வரவேற்பு பகுதியில் அல்லது உணவு அரங்கிற்கு அருகில் மேஜை மீது வரிசையாக வெற்றிலை, பாக்கு அடுக்கி வைக்கப்பட்டிருப்பதை நீங்கள் பார்த்திருக்க கூடும். சாப்பிட்டு முடிப்பவர்களில் பெரும்பாலானவர்கள் வெற்றிலை, பாக்கு, சுண்ணாம்பு சேர்த்து மெல்லுவதை வழக்கமாக வைத்திருப்பார்கள்.

வீடுகளில் கூட, நம் தாத்தா, பாட்டி, சில சமயங்களில் நம் தாய், தந்தையரிடம் கூட உணவுக்குப் பிறகு வெற்றிலை மெல்லும் பழக்கம் இருக்கும். குறிப்பாக, விருந்து உணவு எடுத்துக் கொள்ளும் சமயங்களில், இதை அவர்கள் கட்டாயமாக கடைப்பிடிப்பார்கள். நம்மில் சிலரும் கூட வெற்றிலை, பாக்கு அல்லது ஸ்வீட் பீடா சாப்பிடுவதை வழக்கமாக கொண்டிருப்போம்.

புனிதம் மிகுந்த வெற்றிலை : வெற்றிலை சாப்பிடுவதற்கு மட்டுமானது மட்டுமல்ல. வீட்டின் பூஜை அறைகளில், கோவில்களில் தெய்வங்களை வழிபடும்போது வெற்றிலை, பாக்கு வைத்து வழிபடுவது தமிழர்களின் பாரம்பரிய வழக்கமாக இருக்கிறது. விசேஷங்களில் உறவினர்களுக்கு தாம்பூல பை கொடுத்து அனுப்புவது வாடிக்கையாக இருக்கிறது. நம் வாழ்வில் இந்த அளவுக்கு இடம் பிடித்துள்ள வெற்றிலையில் என்னென்ன நன்மைகள் இருக்கின்றன என்பதை இந்த செய்தியில் பார்க்கலாம்.

வலி நிவாரணியாக இருக்கிறது : உடலில் உள்ள பல்வேறு வலிகளை கட்டுப்படுத்தும் குணாதிசயம் இயற்கையாகவே வெற்றிலையில் இருக்கிறது. குறிப்பாக, வெற்றிலையை நசுக்கி, அதன் சாறு எடுத்து நெற்றியில் பூசினால் தலைவலி குறையும்.

மலச்சிக்கலை கட்டுப்படுத்துகிறது : மலச்சிக்கலால் அவதிப்படுபவர்களுக்கு சிறந்த நிவாரணியாக வெற்றிலை இருக்கிறது. இந்த சிக்கல் இருப்பவர்கள் வெறும் வயிற்றில் வெற்றிலை மெல்ல வேண்டும். இது வயிற்றில் உள்ள பிஹெச் அளவை சமநிலையில் வைக்கும். இதனால், மலச்சிக்கல் கட்டுப்படுத்தப்படும்.

செரிமானத்தை மேம்படுத்துகிறது : வெற்றிலை மெல்லும்போது வாயில் எச்சில் அதிகம் சுரக்கிறது. இது உணவுப் பொருட்களை உடைத்து செரிமானம் செய்ய உதவும். இதனால், ஜீரண மண்டலத்தில் உள்ள தேவையற்ற அழுத்தம் குறைகிறது.

பசியை தூண்டுகிறது : நாள் ஒன்றுக்கு ஒரு வெற்றிலையாவது நீங்கள் சாப்பிட்டு வந்தால், உடலில் உள்ள தேவையற்ற கழிவுகள் வெளியேறும். மேலும் பிஹெச் அளவு சமநிலை அடைகிறது. இதன் விளைவாக பசி அதிகரிக்கும்.

மூச்சுத்திறன் மேம்படும் : மூச்சுத்திறன் தொடர்பான பிரச்சினைகளுக்கு தீர்வு தருகிறது வெற்றிலை. வெற்றிலை மீது கடுகு எண்ணெய் சேர்த்து, லேசாக வாட்டி எடுத்து மார்பு பகுதியில் வைத்தால் நிவாரணம் கிடைக்கும்.

இருமலை போக்குகிறது : வெற்றிலையில் ஆன்டிபயாடிக்ஸ் நிரம்பியுள்ளது. இது உடலில் இருமல் தொந்தரவுகளை போக்குவதற்கு உதவிகரமாக இருக்கும். தொடர் இருமலால் உடலில் ஏற்படும் வீக்கங்களைக் குறைப்பதற்கு இது உதவிகரமாக இருக்கும்.