கர்ப்பத்தில் உள்ள கரு வளர்ச்சிக்கு உதவும் இரும்புச்சத்து நிறைந்த உணவுகள்..!

கர்ப்ப காலத்தில் ஹீமோகுளோபின் அளவு அதிகரிக்க இரும்புச்சத்து அவசியம். எனவே, தான் மருத்துவர்கள் இரும்புச்சத்து நிறைந்த உணவுகளை சாப்பிடுங்கள் என பரிந்துரைக்கிறார்கள். ஏனென்றால், கர்ப்ப காலத்தில் ஹீமோகுளோபின் அளவு சீராக இருந்தால் தான் குழந்தைக்கு தேவையான இரத்த ஓட்டம் சீராக்கி, குழந்தையின் வளர்ச்சி அதிகரிக்கும். கர்ப்பிணிகள் சாப்பிட வேண்டிய இரும்புச்சத்து நிறைந்த உணவுகள் பற்றி இங்கே பார்க்கலாம்.

பயறு மற்றும் பீன்ஸ் வகைகள் : பீன்ஸ் கொட்டை வகைகள், பயறு வகைகள், மூக்கடலை, பட்டாணி வகைகள், சோயா போன்றவை இரும்புச்சத்து நிறைந்தவை. இதில் ஒரு கப் வீதம் எடுத்துக்கொண்டாலே 6.6 மி.கி அளவுக்கு இரும்புச் சத்தை தினம் பெறலாம். மேலும் அதில் ஃபோலேட், பொட்டாசியம், மெக்னீசியம் போன்ற சத்துக்களும் அடங்கியுள்ளன.

கீரை வகைகள் : சிறு கீரை, அரை கீரை , பருப்புக் கீரை, பசலைக் கீரை, முருங்கைக்கீரை, தண்டுக்கீரை என வகை வகையான கீரைகளையும் தினம் எடுத்துக்கொள்ளுங்கள். ஒரு கப் கீரையில் 6.4 மி.கி இரும்புச்சத்தை பெறலாம்.

புரக்கோலி : புரக்கோலி எளிமையாக செய்யக் கூடிய உணவாகும். இதில் அதிகமாக ஊட்டச்சத்துக்கள் அடங்கியுள்ளன. குறிப்பாக கர்ப்பிணிகளுக்கு தேவையான ஊட்டச்சத்து இதில் அடங்கியுள்ளன. இரும்புச் சத்து, விட்டமின் சி, நார்ச்சத்து ஆகியவையும் உள்ளன.

பூசணி விதை : பூசணி விதைகளை தினம் ஸ்னாக்ஸ் போல் எடுத்துக்கொள்ளலாம். இதில் விட்டமின் கே, ஸிங்க் , மெனீசியம், மாங்கனீஸ் மற்றும் இரும்பு சத்து ஆகியவை உள்ளன.

சிக்கன், மீன் : புரதச்சத்து நிறைந்த இறைச்சி வகைகளையும் உட்கொள்ளலாம். குறிப்பாக சிக்கன் மற்றும் மீன் வகைகள் ஊட்டச்சத்து நிறைந்தவை. ஆட்டுக்கறி, சிக்கனில் உள்ள சில உறுப்புகள் இரும்புச்சத்தை அதிகரிக்கும் ஆற்றல் கொண்டவை. எனவே அவற்றை உட்கொள்வதும் சிறந்தது.