சோயா பீன்ஸில் இருக்கும் நன்மைகள் என்ன..? யாரெல்லாம் சாப்பிடக்கூடாது...?

‘சோயாபீன்ஸ்’ உடலுக்கு மிகவும் சத்து தரக்கூடிய பருப்பு வகைகளில் ஒன்றாகும். மற்ற பருப்பு வகைகளை போலவே எல்லா ஊட்டச்சத்துக்களும் இதில் நிறைந்துள்ளது. குறிப்பாக புரதம், தாதுக்கள் மற்றும் வைட்டமின்கள் போன்ற சத்துக்கள் இருப்பதால், சைவ உணவு உண்பவர்களுக்கு இது ஒரு சிறந்த தேர்வாக இருக்கும்.சோயா பீன்ஸ் ஆனது சோயா மாவு, சோயா புரதம், டோஃபு, சோயா பால், சோயா சாஸ் மற்றும் சோயாபீன் எண்ணெய் உள்ளிட்ட வகைகளாக உண்ணப்படுகிறது.

மேற்கத்திய நாடுகளில், பதப்படுத்தப்பட்ட சோயா பொருட்கள் மிகவும் பிரபலமாக உள்ளது என்பது குறிப்பிடத்தக்க அம்சமாகும். புரதத்தை உருவாக்க தேவையான ஒன்பது அமினோ அமிலங்களும் இதில் உள்ளது. மேலும் இதில் நிறைவுற்ற கொழுப்பு குறைவாகவும், புரதம், வைட்டமின் சி மற்றும் ஃபோலேட் போன்றவை அதிகமாகவும் இடம் பெற்றிருக்கிறது. கால்சியம், இரும்பு, மெக்னீசியம், பாஸ்பரஸ், பொட்டாசியம் மற்றும் தியாமின் போன்ற சத்துக்களும் இதில் அடங்கியுள்ளது. மேலும் வேகவைத்த பச்சை சோயாபீன்ஸில் 141 கி கலோரிகள்,12.35 கிராம் புரதம், 6.4 கிராம் கொழுப்பு, 11.05 கிராம் கார்போஹைட்ரேட், 4.2 கிராம் நார்ச்சத்து உள்ளது. சோயா பீன்ஸ் சாப்பிடுவதால் கிடைக்கும் நன்மைகள் குறித்து இங்கு காண்போம்.

உடல் எடை குறைக்க : உடல் எடையை குறைக்க விருப்பம் உள்ளவர்கள் கண்டிப்பாக சோயா பீன்ஸினை எடுத்துக் கொள்வது அவசியம். ஆய்வின்படி சோயாபீன்ஸ் சாப்பிடுவதால் உடல் உறுப்புகளை சுற்றி கொழுப்பு படிவதை தடுக்கிறது. மேலும் ஆரோக்கியமான எடையை நிர்வகிப்பதோடு, தசை வளர்ச்சிக்கும் உதவுகிறது.

புற்றுநோயை தடுக்கிறது : சோயாபீன்ஸ்களில் காணப்படும் கலவைகள் மற்றும் ஆக்ஸிஜனேற்றங்கள் சில வகையான புற்றுநோய்களின் அபாயத்தைக் குறைக்கிறது. புரோஸ்டேட் மற்றும் மார்பக புற்றுநோய் போன்ற ஹார்மோன்களுடன் தொடர்புடைய புற்றுநோய்களின் அபாயத்தைக் குறைப்பதில் முக்கிய பங்காற்றுகிறது. புற்றுநோய் உள்ளவர்கள் தங்களது உணவில் சோயாபீன்ஸ்களை தவறாமல் எடுத்துக் கொண்டால், நல்ல பலனைத்தரும் என்கிறார்கள் மருத்துவர்கள்.

நீரழிவு நோயாளிகள் : டைப் 2 வகை நீரிழிவு நோய்க்கான அபாயத்தை சோயா பீன்ஸ் குறைக்கிறது. சோயா பீன்ஸ்களில் உள்ள ‘ஐசோஃப்ளேவோன்கள்’ நீரழிவினை ஏற்படுத்தும் காரணிகளை கட்டுப்படுத்துகிறது. உடலின் இன்சுலின் உணர்திறனை மேம்படுத்துகிறது. எனவே நீரழிவு நோயாளிகள் அடிக்கடி சோயாபீன்ஸ் சாப்பிடலாம்.

எலும்புகளை பலப்படுத்த : ‘சோயா பீன்ஸ்’ எலும்புகளின் ஆரோக்கியத்தை மேம்படுத்துகிறது. சோயா பீன்ஸில் கால்சியம் சத்து நிறைந்துள்ளது. தினசரி கால்சியம் சத்தை பெற வேண்டும் என்று நீங்கள் விரும்பினால் பாலுக்கு பதிலாக சோயா பீன்ஸினை சாப்பிடலாம். எலும்பு முறிவு ஏற்பட்ட ஒருவர் தொடர்ந்து சோயா பீன்ஸினை சாப்பிட்டு வந்தால் விரைவில் குணமாகும்.

சோயாபீன்ஸ்களை யார் சாப்பிடக்கூடாது ? : சோயா பீன்ஸ் மிகவும் பாதுகாப்பான உணவாகும். எந்தவொரு உணவு வகையும் குறிப்பிடத்தக்க சிலருக்கு ஒவ்வாமைகளை ஏற்படுத்தக் கூடும். அது என்னென்ன என்று இங்கு பாப்போம்.

தைராய்டு : ஹைப்பர் தைராய்டிசம் உள்ளவர்கள் சோயா பீன்ஸ்களை உட்கொள்ள கூடாது. சோயாபீன்ஸ்களில் காணப்படும் சில கலவைகள் தைராய்டு செயல்பாட்டில் குறுக்கிடலாம் என்றும், இது நோய்களை தீவிரப்படுத்தும் என்றும் ஆராய்ச்சிகள் கூறுகிறது.

வயிற்றுப்போக்கு : சோயாபீனில் கரையாத நார்ச்சத்து உள்ளது. இதை அதிகமாக சாப்பிடுவது வாயு மற்றும் வயிற்றுப்போக்கு அபாயத்தை அதிகரிக்கலாம். ‘IBS’ நோயால் பாதிக்கப்பட்டவர்கள் சோயா பொருட்களை உட்கொள்ளும் போது மிகவும் கவனமாக இருக்க வேண்டும்.

ஒவ்வாமை: சோயாபீன்ஸில் காணப்படும் கிளைசினின், காங்கிளிசினின் என்ற இரண்டு புரதங்களால் சோயா ஒவ்வாமை ஏற்படுகிறது. இது பொதுவாக எல்லா வயதினரிடத்திலும் காணப்படுகிறது. வாந்தி மற்றும் வயிற்றுப்போக்கு இதனால் ஏற்படும் என்பதால் அளவாக எடுத்து கொள்வது நல்லது.