ஒரு நாளைக்கு எத்தனை முட்டை சாப்பிடுவது நல்லது? - அளவுக்கு மீறி சாப்பிட்டால் என்னவாகும்?

டயட்டில் முட்டைகளை சேர்த்து கொள்வது பல தீவிர நோய்களுக்கான ஆபத்தை குறைப்பதோடு உடலுக்கு தேவையான பல முக்கிய ஊட்டச்சத்துக்களை அளிக்கிறது. எவ்வளவு சத்தான உணவாக இருந்தாலும் அளவுக்கு அதிகமாக எடுத்து கொள்ளும் போது அதற்கேற்ற சில பக்கவிளைவுகளை சந்திக்க வேண்டியிருக்கும்.

மிகவும் சத்தான ,ஆற்றும் ஆரோக்கியமான உணவுகளில் ஒன்றாக கருதப்படும் வெள்ளை முட்டைகளும் இதற்கு விதிவிலக்கு இல்லை. முட்டைகளை தினசரி தவறாமல் எடுத்து கொள்வதால் சில பக்கவிளைவுகள் ஏற்படலாம். நீங்கள் தினசரி உங்கள் டயட்டில் முட்டைகளை சேர்த்து கொள்பவர் எனில் பின்வரும் பக்கவிளைவுகள் பற்றி தெரிந்து கொள்வது அவசியம். முட்டைகளை அதிகம் சாப்பிடுவதால் ஏற்படும் பக்கவிளைவுகள்..

கெட்ட கொலஸ்ட்ராலை அதிகரிக்க செய்கிறது : ஒரு பெரிய சைஸ் வெள்ளை முட்டையில் 182 மிகி கொலஸ்ட்ரால் உள்ளது, இது தினசரி பரிந்துரைக்கப்பட்ட அளவை விட அதிகம் ஆகும். எனவே தினசரி பல முட்டைகளை சாப்பிடுவது அல்லது தொடர்ந்து முட்டைகளை சாப்பிடுவது உங்களது கொலஸ்ட்ரால் லெவலை அதிகரிக்கலாம்.

இதய ஆரோக்கியத்திற்கு மோசமானது : முட்டைகளை அதிகம் சாப்பிடுபவர்களுக்கு இதய நோய் மற்றும் இறப்பு ஏற்படும் அபாயம் அதிகம் என சமீபத்திய ஆய்வில் கண்டறியப்பட்டுள்ளது. இதற்கு முட்டையில் உள்ள கொலஸ்ட்ரால் தான் காரணம் என நிபுணர்கள் கருதுகின்றனர். அதிக முட்டைகளை சாப்பிடுவது உங்கள் கொலஸ்ட்ரால் அளவையும் ஃபேட் அளவையும் அதிகரிக்கும். இதன் மூலம் இதய நோய் அபாயமும் அதிகரிக்கிறது.

அதே போல முட்டையின் மஞ்சள் கரு முழுக்க முழுக்க கொலஸ்ட்ராலால் ஆனது, முட்டையின் வெள்ளைக்கரு முழுக்க புரதங்களால் ஆனது. எனவே, வேகவைத்த முட்டைகளை சாப்பிட்டாலும் கொழுப்பு அளவு அதிகமாக இருக்கும், இது உங்கள் இதய ஆரோக்கியத்தை பாதிக்கலாம்.

வயிற்று வலியை ஏற்படுத்தலாம் : நீங்கள் அதிக முட்டைகளை சாப்பிட்டால், உங்கள் செரிமான அமைப்பு பாதிக்கப்படலாம் மற்றும் உங்களுக்கு கடுமையான வயிற்று வலி ஏற்படலாம். ஆம், அதிகமான முட்டைகளை எடுத்து கொள்வது சில நேரங்களில் வயிற்று வலிக்கு வழிவகுக்கலாம். வயிறு உப்புசம் போன்ற பிற செரிமான பிரச்சனைகளையும் ஏற்படுத்த கூடும்.

சரும பிரச்சனைகளை தூண்ட கூடும் : அதிகப்படியான முட்டை நுகர்வு உடலில் இருக்கும் ப்ரோஜெஸ்ட்டிரோன் (progesterone) என்ற ஹார்மோன் உற்பத்தியை அதிகரிக்கும். இது சூட்டு கட்டி அல்லது முகப்பருக்கள் ஏற்பட வழிவகுக்கும்.

எவ்வளவு சாப்பிடலாம்.? ஒரு நாளைக்கு ஒன்று அல்லது இரண்டு முட்டைகள் சாப்பிடுவது அவ்வளவு தீங்கு விளைவிப்பதில்லை. மாறாக 4 அல்லது 5 முட்டைகளை தினசரி சாப்பிடுவதை வழக்கமாக வைத்திருப்பவர்கள் அதிக முட்டை நுகர்வு சில பிரச்சனைகளுக்கு வழிவகுக்கும் என்பதால் மிதமான அளவில் சாப்பிடுவது நல்லது.