செரிமானம் முதல் இதய ஆரோக்கியம் வரை.. கனிந்த வாழைப்பழத்தில் இத்தனை நன்மைகளா..?

தமிழகத்தில் இப்போது சமூக வலைதளங்களில் வீடியோ ஒன்று டிரெண்ட் ஆகி வருகிறது. நன்கு கனிந்த வாழைப்பழத்தின் ஒரு பகுதியில் தோல் சிதைந்து, லேசாக அழுகியிருக்கும் நிலையில், அந்தப் பகுதியை வெட்டி எடுத்து ஒரு மைக்ரோஸ்கோப் கருவி மூலமாக பார்க்கின்றபோது அதில் எண்ணற்ற நுண் கிருமிகள் இருப்பதைப் போன்று அந்த வீடியோ உள்ளது. இவ்வாறு உள்ள பழத்தை சாப்பிடுவது உடல் நலனுக்கு கேடு என்று விழிப்புணர்வு ஏற்படுத்தும் வகையில் அந்த வீடியோ அமைந்துள்ளது.

உடனே, கனிந்த வாழைப்பழம் என்றாலே அதை தூக்கி எறிந்து விட வேண்டுமா என்ற சந்தேகம் நம் மனதில் எழும். உண்மை என்னவென்றால் அதுபோல சிதைந்து, அழுகிய பழங்களை சாப்பிடக் கூடாது தான். ஆனால், வாழைப் பழத்தின் தோல் கொஞ்சம் கூட சிதையாமல், உள்ளே பழத்தின் வெள்ளை நிறம் மாறாமல் இருக்கின்ற கனிந்த பழங்களை நாம் தவறாமல் சாப்பிடலாம்.

செல்களின் பாதிப்பை தடுக்கும் : கனிந்த பழங்களில் ஆண்டிஆக்ஸிடண்ட் சத்து நிறைவாக இருக்கும். இது உங்களுக்கு நோய் எதிர்ப்பு சக்தியை வலுப்படுத்துவதால் பல நோய்களை தடுக்க இயலும். இது மட்டுமல்லாமல் நம் உடலில் உள்ள செல்கள் பாதிப்பு அடைவதை இது தடுக்கும்.

இதய நலன் மேம்படும் : கனிந்த வாழைப்பழத்தை சாப்பிடுவது இதய நலனுக்கும் நல்லதுதான். பொட்டாசியம், மெக்னீசியம் போன்றவை இதில் மிகுதியாக இருக்கும். ஆகவே உங்கள் ரத்த அழுத்தம் கட்டுக்குள் வரும். கொலஸ்ட்ரால் அளவுகள் குறையும். ஆக, ஒட்டுமொத்தமாக உங்களின் இதய நலன் மேம்படும்.

செரிமானத்திற்கு எளிது : ஸ்டார்ச் சத்து கனிந்த பழத்தில் மிகுதியாக இருக்கும். அது சர்க்கரை சத்தாக மாற்றம் அடையும். இதனால், இது உடனடியாக செரிமானம் ஆகி உங்களுக்கு ஆற்றல் கிடைக்கும். செரிமானக் கோளாறு போன்ற பிரச்சினையால் அவதி அடைபவர்கள் வாழைப்பழம் சாப்பிடலாம்.

நெஞ்செரிச்சலை குறைக்கிறது : உங்களுக்கு நெஞ்செரிச்சல் பிரச்சினை இருக்கிறது என்றால் நீங்கள் கனிந்த வாழைப்பழத்தை சாப்பிடலாம். இது இயற்கையான ஆண்டசிட் போல செயல்படும். அது மட்டுமல்லாமல், உங்கள் வயிற்றின் உட்புறச் சுவர்களை ஆசிட் அரித்து விடாமல் இது தடுக்கிறது.

புற்றுநோய் தடுக்கப்படும் : கனிந்த வாழைப்பழங்களில் நெக்ரோசிஸ் என்னும் பொருள் இருக்கிறது. இது உங்கள் உடலில் புற்றுநோய் பரவுவதை தடுப்பதுடன், அசாதாரணமான செல்களின் வளர்ச்சியை தடுக்கிறது. குறிப்பாக, வாழைப்பழ தோலின் உட்புற பகுதியில் இந்த நெக்ரோசிஸ் சத்து உள்ளது.

தசைவலிக்கு தீர்வு : மூட்டு மற்றும் தசை வலியால் அவதி அடைபவர்கள் கனிந்த வாழைப்பழத்தை எடுத்துக் கொள்ளலாம். அதில் உள்ள பொட்டாசியம் நல்லதொரு வலி நிவாரணியாக செயல்படும். குறிப்பாக விளையாட்டு வீரர்கள் தினசரி வாழைப்பழம் சாப்பிடலாம்.