பனீர் அதிகம் சாப்பிட்டால் ஆபத்தா..? என்னென்ன பிரச்னைகள் வரும் தெரியுமா..?

சைவ உணவு உண்பவர்களுக்கான புரோட்டீன் சத்து பெறும் உணவுகளில் பனீர் முக்கிய இடம் வகிக்கிறது. இது உடலுக்கு தேவையான ஆற்றலை உடனடியாக வழங்குகிறது.

குறிப்பாக பனீரில் செலினியம் மற்றும் பொட்டாசியம் நிறைவாக உள்ளன. இது மனம் மற்றும் உடல் ஆரோக்கியத்தை மேம்படுத்துவதில் முக்கிய பங்கு வகிக்கிறது. என்னதான் நன்மைகளை அடுக்கிக்கொண்டே போனாலும் அமிர்தமும் நஞ்சுதானே... எனவே பனீரை அளவுக்கு அதிகமாக உட்கொண்ட பல உடல் நலக்கோளாறுகளை சந்திக்க நேரிடும். அப்ப்டி என்னென்ன பக்கவிளைவுகளை சந்திப்பீர்கள் என்று பார்க்கலாம்.

அதிக பனீர் சாப்பிட்டால் அது வயிற்றிலேயே தங்கி செரிமானத்தை தாமதப்படுத்துகிறது. இது வயிற்று மந்தம், வயிற்றுக் கோளாறு, செரிமானப் பிரச்னைகளுக்கு வழிவகுக்கிறது. சில நேரங்கள் குமட்டல், அடி வயிற்று வலி மற்றும் வயிற்று தசைப் பிடிப்பு போன்ற பிரச்னைகளும் இருக்கும்.

குறிப்பாக சமைக்காமல் அப்படியே பனீர் சாப்பிட்டால் செரிமானத்தில் கடுமையான பக்கவிளைவுகளை உண்டாக்கும். அது முழுமையாக செரிமானிக்க நீண்ட நேரம் எடுத்துக்கொள்ளும். இதனால் உடல் சோர்வு உண்டாகலாம்.

பனீரை சமைக்கும்போது செரிமானத்தை தூண்டும் உணவுப்பொருட்களை சேர்க்க வேண்டும். அதாவது மஞ்சள், இஞ்சி, ஏலக்காய் போன்ற பொருட்களை சேர்ப்பதால் செரிமானம் எளிதில் நடைபெறும்.

அப்படி செய்த பிறகு சுவையாக இருக்கிறதே என நினைத்து உடனே அனைத்தையும் சாப்பிட்டு விடாதீர்கள். கொஞ்சம் கொஞ்சமாக சாப்பிடுவதுதான் உங்கள் செரிமான அமைப்பிற்கு நல்லது. ஆரோக்கியமும் அதுதான்.

எனவே இனிமேல் பனீர் செய்தால் அளவாக சாப்பிடுங்கள். ஆரோக்கியமாக இருங்கள்..