தோசைக்கல்லில் மாவு ஒட்டிக்கொள்கிறதா..? ரவை, மைதாவில் பூச்சு வருதா..? உங்களுக்கான கிச்சன் டிப்ஸ்

கிட்சனை நிர்வகிப்பதே பெரும் சவால்தான். யாருக்கு என்னென்ன சமைக்க வேண்டும் , எந்தெந்த பொருள் காலியாகிறது, மளிகை பொருட்கள் கெட்டுப்போகாமல், பூச்சி பிடிக்காமல் பார்த்துக்கொள்ள வேண்டும் என எத்தனை வேலைகளை நினைவில் வைத்துக்கொள்ள வேண்டும்... ஆனால் இதையெல்லாம் திறம்பட செய்ய வேண்டுமெனில் சில நுணுக்கங்கள், இரகசியங்களை தெரிந்து வைத்துக்கொண்டால் நீங்கள்தான் கில்லாடி. அந்த வகையில் உங்களுக்கான சில கிட்சன் டிப்ஸ் இதோ...

வாங்கி வைக்கும் தயிர் உடனே புளித்துப்போகிறது என நினைக்கிறீர்களா..? அடுத்த முறை அதில் கொஞ்சம் இஞ்சியை சீவி கலந்துவிடுங்கள். 2 நாள் ஆனாலும் தயிர் புளிக்காது.

மசாலா அரைக்க காய்ந்த மிளகாயை வறுக்கும்போது நெடி வரும். இதை தவிர்க்க இரண்டு உப்பு கல் போட்டு வறுத்துப்பருங்கள். மிளகாய் வறுக்கும் வாசனை கூட வராது.

பச்சை மிளகாய் ஃபிரிட்ஜில் வைத்தால் கூட அழுகிப் போகிறதே என வருத்தப்படுகிறீர்களா.. கவலையை விடுங்க.. அடுத்த முறை அதன் காம்புகளை கிள்ளிவிட்டு டப்பாவில் அடைத்து வையுங்கள். 10 நாள் ஆனாலும் ஃபிரெஷாக இருக்கும்.

தோசை சுடும்போது மாவு தோசைக்கல்லில் ஒட்டிக்கொள்ளும் சிக்கலை பலரும் அனுபவிப்பார்கள். உங்களுக்கும் இந்த பிரச்சனை இருக்கிறது எனில் அடுத்த முறை ஒரு பருத்தி துணியில் புளியை கட்டி எண்ணெயில் தொட்டு கல்லில் தடவுங்கள். பின் தோசை சுட மொறு மொறுவென வரும்.

ரவை , மைதா போன்ற மாவு பொருட்களில் பூச்சி, வண்டு பிடிப்பதை தவிர்க்க அதில் வசம்பு போட்டு கலந்து வையுங்கள். பூச்சி தொல்லை இருக்காது.