கோடைகாலத்தில் கிடைக்கும் நாவல் பழம்... யாரெல்லாம் சாப்பிட கூடாது..?

இந்தியாவில் எண்ணிலடங்கா பழ வகைகள் உள்ளன. குறிப்பாக , வெயில், குளிர் என ஒவ்வொரு பருவத்திற்கு தகுந்தாற்போல சீசன் பழங்கள் ஏராளமானவை உண்டு. கோடை காலத்தை எடுத்துக் கொண்டோம் என்றால் மாம்பழம், நுங்கு, வெள்ளரிக்காய், முந்திரிப் பழம், நாவல் பழம், தர்பூசணி உள்ளிட்ட காய், கனி வகைகள் நமக்கு கிடைக்கின்றன.

கோடைப் பருவத்தில் கிடைக்கும் பழங்கள் யாவும் இனிப்பாகவும், புளிப்புச் சுவை கொண்டதாகவும் இருக்கும். இதில், மாம்பழத்திற்கு தான் நம்பர் 1 இடம். நீங்கள் சாப்பிட்டு முடித்த பிறகும் கூட நாவில் சுவை ஒட்டிக் கொண்டிருக்கும். இதேபோல, சின்னஞ்சிறு குழந்தைகள் முதல் பெரியவர்கள் வரையில் அனைவருக்கும் பிடித்த மற்றொரு பழமாக நாவல் கனி உள்ளது.

மே, ஜூன் மாதங்களில் கிடைக்கும் : கொஞ்சம் இனிப்பு, புளிப்பு, துவர்ப்பு என சுவை கொண்டது நாவல் பழம். பொதுவாக மே மற்றும் ஜூன் மாதங்களில் கிடைக்கக் கூடியது. கிராமப்புறங்களில் பள்ளி விடுமுறை நாட்களில் இந்தப் பழங்களுக்காக காடுகள் அல்லது சாலையோர நாவல் மரங்களை நோக்கி படையெடுக்கும் சிறுவர், சிறுமிகள் ஏராளம்.

உடல் நலனுக்கு உகந்தது : நாவல் பழம் நாவுக்கு இதமான சுவை தரும் என்பதோடு மட்டுமல்லாமல் அதில் பல்வேறு மருத்துவ குணங்கள் நிரம்பியுள்ளன. குறிப்பாக வயிற்று வலி, நீரிழிவு, கீல்வாதம் போன்ற பிரச்சினைகளுக்கு பலன் தரக் கூடியது நாவல் பழங்கள் ஆகும். எண்ணற்ற உடல் நல குணாதிசயங்களைக் கொண்டிருந்தாலும், நாவல் பழங்களில் சில பக்க விளைவுகளும் இருக்கத்தான் செய்கின்றன. பக்க விளைவுகள் என்றால் அனைத்து தரப்பு மக்களையும் பாதிக்கக் கூடியது அல்ல. குறிப்பிட்ட சில உடல் நல பிரச்சினைகள் இருப்பவர்கள் மட்டும் நாவல் பழங்களை அளவோடு சாப்பிட வேண்டும் அல்லது முற்றிலுமாக தவிர்க்க வேண்டும்.

ரத்த சர்க்கரை பற்றாக்குறை அளவு : நாவல் பழங்கள் ரத்த சர்க்கரை அளவை பெரிதும் குறைக்கக் கூடியது. இந்நிலையில், நாவல் பழங்களை அதிகம் எடுத்துக் கொண்டீர்கள் என்றால் ரத்தத்தில் சர்க்கரை அளவு குறைந்துவிடும். இதேபோல, உயர் ரத்த அழுத்தத்தை குறைக்கவும் இது உதவியாக இருக்கும். அதுவே அளவு மிகுந்தால் குறைவான ரத்த அழுத்தப் பிரச்சனை வந்துவிடும்.

மலச்சிக்கல் : செரிமானப் பிரச்சினைகளுக்கு நாவல் பழங்கள் தீர்வு தரும் என்றாலும், அளவுக்கு மிகுதியாக சாப்பிட்டால் மலச்சிக்கல் ஏற்படும்.

சருமத்தில் கட்டிகள் : உங்களுக்கு முகத்தில் பரு அல்லது சருமத்தில் கட்டி போன்ற பிரச்சினைகள் இருந்தால் நீங்கள் இதை கட்டாயம் தவிர்க்க வேண்டும். நாவல் பழங்கள் சரும பிரச்சனைகளை கொண்டு வரும்.

வாந்தி : நாவல் பழங்களை அதிகம் சாப்பிடும் நபர்களில் ஒரு சிலருக்கு வாந்தி ஏற்படக் கூடும். இயல்பாகவே நாவல் பழங்கள் புளிப்புச் சுவை கொண்டது என்பதால் பிற உணவுகளை எடுத்துக் கொள்ளும்போது பல் கூச்சம் ஏற்படும்.