நீரிழிவு நோயாளிகள் நாவல்பழம் சாப்பிடலாமா..? கூடாதா..? தெரிந்துகொள்ளுங்கள்...

இந்தியாவில் ஒவ்வொரு பருவத்திற்கு தகுந்தாற்போல சீசன் பழங்கள் ஏராளமானவை உண்டு. கோடை காலத்தை எடுத்துக் கொண்டோம் என்றால் மாம்பழம், நுங்கு, வெள்ளரிக்காய், முந்திரிப் பழம், நாவல் பழம், தர்பூசணி உள்ளிட்ட காய், கனி வகைகள் நமக்கு கிடைக்கின்றன. கோடைப் பருவத்தில் கிடைக்கும் பழங்கள் யாவும் இனிப்பாகவும், புளிப்புச் சுவை கொண்டதாகவும் இருக்கும். இதில், மாம்பழத்திற்கு தான் நம்பர் 1 இடம். நீங்கள் சாப்பிட்டு முடித்த பிறகும் கூட நாவில் சுவை ஒட்டி கொண்டிருக்கும். இதேபோல, சின்னஞ்சிறு குழந்தைகள் முதல் பெரியவர்கள் வரையில் அனைவருக்கும் பிடித்த மற்றொரு பழமாக நாவல் கனி உள்ளது.

கொஞ்சம் இனிப்பு, புளிப்பு, துவர்ப்பு ஆகிய சுவைகளை கொண்டது நாவல் பழம். பொதுவாக மே மாதம் தொடங்கி ஆகஸ்ட் மாதம் வரையிலும் கிடைக்கக் கூடியது. கிராமப்புறங்களில் பள்ளி விடுமுறை நாட்களில் இந்தப் பழங்களுக்காக காடுகள் அல்லது சாலையோர நாவல் மரங்களை நோக்கி படையெடுக்கும் சிறுவர், சிறுமிகள் ஏராளம். இப்போதெல்லாம் அனைத்து ஊர்களிலும் சாலையோர வியாபாரிகள், பழமுதிர்சோலைகள் மற்றும் சூப்பர் மார்க்கெட் மூலமாக விற்பனை செய்யப்படுகின்றன. நாவல் பழங்களில் என்னென்ன பலன் உண்டு என்பதை இந்தச் செய்தியில் தெரிந்து கொள்ளலாம்.

நீரிழிவு நோயை கட்டுப்படுத்தும் : டைப்-2 வகை சர்க்கரை நோய் கொண்டவர்களுக்கு இது மாபெரும் வரப் பிரசாதம் என்றே சொல்லலாம். நாவல் பழம் சாப்பிடுவதால் ரத்த சர்க்கரையை கட்டுக்குள் வைத்திருக்க உதவுகிறது.

ரத்த அழுத்தம் சீராகும் : நாவல் பழங்களில் அதிக அளவு பொட்டாசியம் இருக்கிறது. உயர் ரத்த அழுத்தப் பிரச்சனையை இது கட்டுப்படுத்தும். நாவல் பழம் முற்றிலும் கொழுப்பு இல்லாத பழமாகும். மிதமான அளவில் கலோரிகள், அதிக அளவில் நீர்ச்சத்து கொண்டது.

சருமத்தை பாதுகாக்கும் : நாவல் பழங்களில் இரும்புச்சத்து, ஆண்டி ஆக்ஸிடண்ட், விட்டமின் ஏ ஆகிய சத்துக்கள் உள்ளன. இவை வயது முதிர்வு பிரச்சனைகளை தடுக்கும். தோல்களில் ஏற்படும் சுருக்கங்களை தடுக்கக் கூடியது. வைட்டமின் சி சத்து இருப்பதால் நமது சருமம் பொழிவு பெறும்.

உடல் எடை குறைக்க உதவும் : குறைவான கலோரி மற்றும் அதிக அளவு நார்ச்சத்து கொண்ட பலம். ஆகவே, உடல் எடையை கட்டுக்குள் வைத்திருக்க உதவுகிறது.

ஹீமோகுளோபின் அளவு அதிகரிக்கும் : ஹீமோகுளோபின் உற்பத்திக்கு தேவையான இரும்புச் சத்து மற்றும் விட்டமின் சி ஆகியவை நாவல் பழங்களில் உள்ளன. ரத்தத்தை சுத்திகரிக்க உதவுகிறது. ரத்தத்தில் ஹீமோகுளோபின் அதிகமாக இருந்தால் உடலுக்கு அதிக ஆக்ஸிஜன் கிடைக்கும்.

ஈறுகளை வலுப்படுத்தும் : பாக்டீரியா எதிர்ப்பு திறன்களை கொண்டிருப்பதால் ஈறுகளில் ரத்த கசிவை தடுக்கும். நாவல் இலையை காய வைத்து, பவுடராக எடுத்து வைத்துக் கொண்டு, அவ்வப்போது அதில் பல் தேய்த்து வந்தால் ஈறுகள் பலப்படும்.