தக்காளியை ஃபிரிட்ஜில் வைப்பது அதன் சுவையை பாதிக்குமா..? எப்படி சேமித்து வைப்பது சிறந்தது..?

தக்காளி இல்லாத இந்திய உணவு இருக்க முடியாது. அதனால்தான் அதன் விலை ஏற்றம் தொட்டாலும் வியாபாரத்தில் மாற்றம் இருக்காது. ஒரு தக்காளியேனும் சமையலில் சேர்த்தால்தான் அந்த உணவுக்கு சுவை கிடைக்கும். அப்படி சாப்பிட்ட நம் நாவுக்கு தக்காளி இல்லாத உணவு சப்பென்றுதான் இருக்கும். ஆனால் உண்மையிலேயே நீங்கள் அந்த தக்காளியின் முழுமையான சுவையைதான் அனுபவிக்கிறீர்களா..?

ஏனெனில் பெரும்பாலான வீடுகளில் சேமிப்பு காரணமாக தக்காளியையும் தேவைக்கு சற்று அதிகமாக வாங்கி ஃபிரிட்ஜில் வைத்து பராமரிக்கின்றனர். தேவைப்படும்போதெல்லாம் எடுத்து பயன்படுத்திக்கொள்கின்றனர். அந்த தக்காளிகளும் எத்தனை நாள் கழித்து எடுத்தாலும் அதே ஃபிரெஷில் இருக்கின்றன. ஆனால் அதன் சுவையும், ஊட்டச்சத்துக்களும் அதே ஃபிரெஷில் இருக்கின்றனவா..? இந்த அனைத்து கேள்விகளுக்கும் விடை தெரிய மேலும் படியுங்கள்...

பலரும் தக்காளி அழுகாமல் ஃபிரெஷாக இருக்க ஃபிரிட்ஜில் சேமித்து வைக்கிறார்கள். ஆனால் அப்படி வைக்கலாமா என்ற சந்தேகம் பலருக்கும் இருக்கும். இதற்கு முற்றுப்புள்ளி வைக்கும் விதமாக ஜெர்மனியின் காட்டிஜன் பல்கலைக்கழகம் ஆய்வு ஒன்றை நடத்தியுள்ளது.

அந்த ஆய்வில் தக்காளியை அறையின் வெப்பநிலைக்கு ஏற்ப வெளியிலேயே வைக்கலாமா அல்லது ஃபிரிட்ஜில் வைத்தால் என்ன நடக்கும் என இரு சேமிப்பு வகைகளை முன்வைத்து நடத்தியது.

இப்படி இரு முறைகளிலும் தக்காளியை சேமித்து வைத்தால் எந்த மாற்றங்களும் இல்லை என்பது தெரிய வந்துள்ளது. இருப்பினும் அந்த தக்காளின் தரம் மற்றும் சுவை என்பது அதன் சேமிப்பு நாட்களைப் பொருத்தது என்கின்றனர். அதோடு அதன் சுவை என்பது தக்காளியின் வகைகளைப் பொருத்தது என்பதையும் குறிப்பிடுகின்றனர்.

இறுதியில் தக்காளியை ஃபிட்ஜில் வைத்தாலும், அறையின் வைத்தாலும் எதிர்கால திட்டம் கருதி அதிகம் வாங்கி சேமிக்கும் பழக்கத்தை கைவிடுதல் நல்லது. அப்படியே வாங்கினாலும் 2 - 3 நாட்களுக்கு மேல் வைப்பதை தவிர்ப்பது நல்லது என பரிந்துரைக்கின்றனர். எனவே இனிமேலும் தக்காளியை ஃபிரிட்ஜில் வைக்கலாமா அல்லது வெளியில் வைக்கலாமா என்பது உங்களுடைய சாய்ஸ்..!