கோடைக் காலத்தில் அவசியம் சாப்பிடும் உணவுகளில் வால்நட் முக்கியமானது... ஏன் தெரியுமா?

வால்நட்டிற்கும், கோடை காலத்திற்கும் பாரம்பரிய தொடர்பு எதுவும் இல்லை. ஏனென்றால் வால்நட் பெரும்பாலும் குளிர் காலத்தில் விளையக் கூடியவை. ஆனால், ஏதோ சில காரணங்களால் கோடை காலத்தில் எடுத்துக் கொள்ள வேண்டிய அவசியமான உணவுகளில் வால்நட் மிக முக்கியமான இடத்தைப் பிடித்துள்ளது. நம் இதய நலன் காக்க தேவையான ஒமேகா 3 ஃபேட்டி ஆசிட் வால்நட்டில் உள்ளது. இந்த சத்தை நம் உடல் உற்பத்தி செய்யாது என்பதை நினைவில் கொள்ள வேண்டும்.

மூளையின் செயல்பாடுகளை ஊக்குவிக்கவும், அழற்சியை தவிர்க்கவும் ஒமேகா சத்து மிக அவசியமாகும். இது மட்டுமல்லாமல் வால்நட்டில் மிகுதியான புரதம் மற்றும் நார்ச்சத்து ஆகியவை உள்ளன. உடல் எடையை கட்டுக்குள் வைக்கவும் நீரிழிவு, இதய நோய் போன்ற நீடித்த நோய்களை தவிர்க்கவும் வால்நட் உதவியாக அமையும். ஆனால் நாளொன்றுக்கு 28 கிராமுக்கு மிகுதியாக வால்நட் சாப்பிடக் கூடாது.

இதுகுறித்து ஊட்டச்சத்து நிபுணர் ஸ்வேதா ஷா கூறுகையில், “பொதுவாக கோடைகாலத்தில் உடல் உஷ்ணமாக இருக்கும். வால்நட் கூட உஷ்ணத்தை ஏற்படுத்தக் கூடிய உணவுப் பொருள் தான். ஆனால், அதற்காக கோடைகாலத்தில் அதை சாப்பிடக் கூடாது என்று அர்த்தமல்ல. அதே சமயம், வால்நட்டுகளை இரவு முழுவது ஊற வைத்து சாப்பிடுவது நல்லது. வால்நட்டுகளின் உஷ்ணத்தை தணிக்க அதை சாலட், ஜூஸ், ஸ்மூத்தி போன்றவற்றில் சேர்த்து சாப்பிடலாம்’’ என்று தெரிவித்தார்.

ஊற வைத்து சாப்பிட வேண்டும் : இரவு தூங்கச் செல்லும் முன்பாக 4, 5 வால்நட்டுகளை தண்ணீரில் ஊற வைத்துவிட வேண்டும். காலை வெறும் வயிற்றில் அதை சாப்பிட நல்ல பலன் கிடைக்கும். ஊற வைத்து சாப்பிடுவதால் வால்நட் குளிர்ச்சி அடையும் மற்றும் எளிதில் செரிமானம் ஆகும்.

பாலுடன் சேர்த்து சாப்பிடலாம் : ஊற வைத்த வால்நட்டுகளை பாலுடன் கொதிக்க வைத்து வெது, வெதுப்பான சூட்டில் எடுத்துக் கொள்ளலாம். குறிப்பாக பகல் பொழுதில் ஊற வைத்து, இரவு தூங்கச் செல்லும் முன்பாக பாலுடன் சேர்த்து சாப்பிடுவது நல்ல பலனை தரும்.

ஸ்மூத்தியில் சேர்க்கலாம் : கோடை வெயிலில் இருந்து தப்பிக்க நாம் எடுத்துக் கொள்ளும் தர்பூசணி ஜூஸ், பப்பாளி ஸ்மூத்தி, திராட்சை ஜூஸ், வாழைப்பழ ஸ்மூத்தி போன்றவற்றில் வால்நட்ஸ்களை சேர்த்துக் கொள்ளலாம். உங்களுக்கான ஊட்டச்சத்து இரட்டிப்பாக கிடைக்கும்.

உணவில் சேர்க்கலாம் : அல்வா, பால்கோவா மற்றும் இதர இனிப்புகளில் நீங்கள் சேர்க்கின்ற பிற உலர் நட்ஸ் போலவே வால்நட்ஸ்களை சேர்த்துக் கொள்ளலாம். இது உடலுக்கு நல்ல ஆற்றலை தரும்.

வால்நட் பால் : வால்நட் பருப்புகளை ஊற வைத்து, மிக்ஸியில் அடித்து அதிலிருந்து பால் எடுத்து அருந்துவது கோடை காலத்திற்கு உகந்ததாக அமையும். வால்நட் பாலில் சுவையூட்டுவதற்கு பேரீச்சை பழம், தேன் போன்றவற்றை சேர்த்துக் கொள்ளலாம்.

தயிருடன் சேர்த்து சாப்பிடலாம் : கோடை காலத்தில் உடலை குளிர்ச்சியாக வைத்துக் கொள்ளவும், குடல் நலனை காக்கவும் நாம் புளிக்காத தயிரை உணவில் சேர்த்துக் கொள்ள வேண்டும். அப்படியான தயிருடன் வால்நட், ஸ்ட்ராபெர்ரி, ப்ளூபெர்ரி போன்றவற்றை சேர்த்துக் கொள்ளலாம்.

வால்நட் ஸ்நாக்ஸ் : ஒரு கடாயில் வால்நட்டுகளைப் போட்டு அதனுடன் வெந்தயம், கொத்தமல்லி விதைகள், புதினா இலைகள் ஆகியவற்றை சேர்த்து வறுத்து சாப்பிடலாம். 10, 15 நிமிடங்களில் தயாராகக் கூடிய இது உங்களுக்கான ஸ்நாக்ஸ் ஆக அமையும்.