ஊற வைக்க வேண்டாம், கடையில் வாங்க வேண்டாம்... வீட்டிலேயே நொடியில் கெட்டியான தயிர் ரெடி... எப்படி செய்வது தெரியுமா..?

என்னதான் ஏகபோக விருந்து என்றாலும் இறுதியாக தயிர் இல்லை எனில் அது முழுமை பெறாது. அந்த அளவிற்கு தயிருக்கென தனிச் சிறப்பு உண்டு. விருந்து மட்டுமல்ல... வீட்டிலும் பலர் மதிய உணவில் இறுதியாக தயிர் சாப்பிட்டு முடிக்கும் பழக்கத்தை கொண்டிருப்பார்கள். அவர்களுக்கெல்லாம் இந்த செய்தி மிகவும் பயனுள்ளதாக இருக்கும்.

என்னதான் நொடியில் கடையில் தயிர் வாங்கி சாப்பிட்டாலும் வீட்டில் ஊற வைத்து சாப்பிடும் ருசி இருக்காது. ஆனால் அதற்கான வேலை என்பது கொஞ்சம் கூடுதலானது.

அதாவது வீட்டுத் தயிர் வேண்டுமெனில் முதல் நாள் இரவே பாலில் தண்ணீர் ஊற்றாமல் நன்கு காய்ச்சி, ஆற வைத்து பின் உறை மோர் ஊற்றி ஊற வைக்க வேண்டும். மறுநாள் காலையில் பார்த்தால் நொதித்து தயிராக மாறிவிடும். இந்த செயலில் சில நேரங்களில் இரவு தயிருக்கு ஊற வைக்க மறந்து போகலாம் அல்லது அதிக வேலை இருக்கலாம். இதனால் வீட்டு தயிர் இல்லாமல் போகும். அவர்களுக்கெல்லாம் இனி கவலையே வேண்டாம். நொடியில் கெட்டி தயிரை தயார் செய்ய இந்த டிப்ஸ் உதவலாம்.

முதலில் தயிருக்கு எப்போதும் போல் பாலை நன்கு காய்ச்சி எடுத்துக்கொள்ளுங்கள். அதை நன்கு ஆற வையுங்கள்.

அடுத்து புளித்த உறை மோரையும் எப்போதும் போல் எடுத்துக்கொள்ளுங்கள். பின் அதை ஆறிய பாலில் கலந்துகொள்ளுங்கள். நன்கு கலக்க பால் ஆற்றுவது போல் ஆற்றி எடுங்கள்.

இப்போது குக்கரில் இரண்டு கிளாஸ் தண்ணீர் ஊற்றிக்கொள்ளுங்கள். பின் அதை மூடி போடாமல் அடுப்பில் வைத்து தண்ணீர் கொதிக்க சூடேற்றுங்கள்.

கொதித்து தண்ணீர் சூடேறியதும் கலக்கி வைத்திருக்கும் பாலை ஒரு கிண்ணத்தில் எடுத்துக்கொள்ளுங்கள். அதற்கு சரியான அளவு தட்டு போட்டு மூடிவிடுங்கள்.

இப்போது அந்த பால் கிண்ணத்தை குக்கரி வைத்து மூடிவிடுங்கள். விசில் போட்டுக்கொள்ளுங்கள். அந்த சூட்டோடு குக்கரை அப்படியே ஒரு மணி நேரம் வையுங்கள். ஒரு மணி நேரம் கழித்து திறந்து பார்க்க கெட்டியான தயிர் தயாராகி இருக்கும்.

அவ்வளவுதான் கெட்டியான தயிர் தயார்.