கொளுத்தும் கோடை காலத்தில் குடல் நலனை மேம்படுத்துவது எப்படி?..?

கோடை வெயில் காரணமாக நாம் எதிர்கொள்ளும் பல பிரச்சினைகளில் ஒன்று குடல் சார்ந்த பிரச்சினைகள். அதிலும் உப்பு, புளி, காரம் ஆகியவற்றை மிகுதியாக சேர்க்கும் தமிழர்களின் உணவுப் பழக்கமாக இருப்பதால் ‘வயிறு வேக்காலம்’ என்று சொல்லக் கூடிய வயிற்றுப்புண் பிரச்சினை பலருக்கும் பொதுவானதாக இருக்கும்.

கார, சாரமான உணவுகளை சாப்பிடும்போது வயிறு வலி, வயிற்றுப்போக்கு, குமட்டல் மற்றும் வாந்தி ஆகிய பிரச்சினைகளையும் எதிர்கொள்ள வேண்டியிருக்கும். இதுகுறித்து புது டெல்லியைச் சேர்ந்த மருத்துவர் முகேஷ் மெஹ்ரா கூறுகையில், “குடல் நலனுக்கு குந்தகம் விளைவிக்கின்ற கிருமிகளின் பெருக்கம் கோடை காலத்தில் மிகுதியாக இருக்கும்’’ என்றார்.

அவர் மேலும் பேசுகையில், “குடல் சார்ந்த பிரச்சினைகளை தவிர்க்க வேண்டும் என்றால், நாம் முன்கூட்டியே சில நடவடிக்கைகளை மேற்கொள்ள வேண்டும். அதில் மிக முக்கியமானது நம் நோய் எதிர்ப்பு சக்தி கட்டமைப்பை பலப்படுத்த வேண்டும். இந்த கட்டமைப்பின் பெரும்பகுதி குடலில் தான் இடம்பெற்றுள்ளது’’ என்று தெரிவித்தார்.

அடிப்படையான நடவடிக்கைகள் : நோய் எதிர்ப்பு சக்தியை மேம்படுத்த தினசரி உடற்பயிற்சி செய்வதுடன், நமது உணவுப் பழக்கம் சீரானதாக இருக்க வேண்டும். அப்படி இருந்தால் தான் வெளிப்புற கிருமிகள் நம் உடலுக்குள் நுழையும்போது நம் உடல் அதை எதிர்த்து போராடும்.

ப்ரோக்கோலி, பெர்ரி, ஆரஞ்சு, இஞ்சி, வெங்காயம், நட்ஸ் போன்றவற்றை சேர்த்துக் கொள்ள வேண்டும். அவை நம் நோய் எதிர்ப்பு சக்தியை பலப்படுத்தும். ஆண்டி ஆக்ஸிடண்ட் நிறைந்த காய்கறிகளையும், பழங்களையும் அதிகம் உட்கொண்டால் கோடைகால காய்ச்சல் பிரச்சினையில் இருந்து தப்பிக்கலாம். எப்போதும் உங்களுக்கு விருப்பமான மட்டன், சிக்கன், மீன் போன்ற உணவுகளை நன்றாக வேகவைத்து எடுத்துக் கொள்ளவும். அதேபோல, அவற்றில் சேர்க்கப்படும் மசாலாக்களின் அளவையும் குறைக்க வேண்டும்.

கைகளை கழுவ வேண்டும் : கோடைகால நோய் கிருமிகள் பலவும் நம் கைகளின் வழியே உடலுக்குள் நுழைகின்றது. ஆகவே, முடிந்தவரையில் அவ்வபோது கைகளை கழுவி சுத்தமாக வைத்துக் கொள்ள வேண்டும். எந்த நேரமும் ஏசி-யை உபயோகம் செய்யாமல் முடிந்த பட்சம் உங்கள் அறையை காற்றோட்டம் நிறைந்ததாக வைத்துக் கொள்ள வேண்டும்.

நீர்ச்சத்து மற்றும் ப்ரோபயாடிக்ஸ் : கொளுத்தும் வெயில் காலத்தில் நம் உடலுக்கு நீர்ச்சத்து மிக, மிக அவசியம் என்பது தெரிந்த விஷயம் தான். நீர்ச்சத்து குறையும் பட்சத்தில் மலச்சிக்கல், செரிமானக் கோளாறுகள் போன்றவை ஏற்படலாம். குறிப்பாக அடர் பச்சை நிற காய்கறிகளை சாப்பிட வேண்டும்.குடலுக்கு நன்மை பயக்கும் பாக்டீரியாக்கள் ப்ரோபயாடிக் உணவுகள் மூலமாக கிடைக்கின்றன. அந்த வகையில் கோடை காலத்தில் மோர், தயிர், பன்னீர் போன்றவற்றை எடுத்துக் கொள்ள வேண்டும்.