வறுத்த எண்ணெயின் அடியில் மிஞ்சியிருக்கும் துகள்களை நீக்கிவிட்டு மீண்டும் பயன்படுத்த டிப்ஸ்

நாம் தினமும் பல வகையான உணவுகளை சமைத்தாலும் கூட நாம் செய்யும் அனைத்து சமையல்களிலும் நாம் பயன்படுத்தும் ஒரு பொருள் - எண்ணெய். இன்னும் குறிப்பிட்டு சொல்ல வேண்டும் என்றால், எதையாவது ஒன்றை எண்ணெய்யில் போட்டு வறுக்காமல் அன்றைய சமையலை முடிக்காத இந்திய பெண்கள் இங்கே மிகவும் குறைவே!

அது அப்பளமாக, வடையாக இருக்கலாம், அல்லது காய்கறிகளாக இருக்கலாம் அல்லது சிக்கன், மட்டன், மீன் போன்றவைகளாக கூட இருக்கலாம். ஆனால் ஒவ்வொரு முறையும் மேற்குறிப்பிட்ட ரெசிபிகளை நாம் செய்து முடிக்கும் போது, எண்ணெய் பாத்திரத்தில் சில உணவு துகள்கள் எஞ்சியிருப்பதை நாம் பார்க்க முடியும்.

பொதுவாக அந்த துகள்கள் எஞ்சியிருக்கும் மாவாக, மசாலாவாக அல்லது நீங்கள் வறுத்த பொருளின் மிச்சங்களாக கூட இருக்கலாம். நம்மில் பெரும்பாலோர்கள் இந்த துகள்களைப் பற்றி அதிகம் கவலைப்படுவதில்லை மட்டுமின்றி, அதே எண்ணெயை மற்ற உணவுகளில் மீண்டும் பயன்படுத்தும் பழக்கத்தையும் கொண்டுள்ளோம்.

பயன்படுத்தப்பட்ட சமையல் எண்ணெயை பல நோக்கங்களுக்காக மீண்டும் மீண்டும் பயன்படுத்தினால், அது உங்கள் ஆரோக்கியத்திற்கு எவ்வளவு தீங்கானது என்பதை பற்றி நீங்கள் அறிவீர்களா? தெரியாது என்றால், இப்போது தெரிந்து கொள்ளுங்கள். பயன்படுத்தப்பட்ட, அழுக்கான சமையல் எண்ணெய் பல்வேறு வழிகளில் நம் உடல் நலத்தை பாதிக்கலாம். இது எண்ணெய்களில் டிரான்ஸ்-ஃபேட்டை உருவாக்கலாம், இரத்த அழுத்தத்தை அதிகரிக்கலாம், அதிக அளவு நச்சுகளை கூட வெளியிடலாம்

இதற்காக ஒவ்வொரு முறையும் புதிய சமையல் எண்ணெயை பயன்படுத்த முடியுமா? என்கிற உங்களின் கேள்வியும் நியாமானதே. இந்த இடத்தில் தான் "பயன்படுத்திய எண்ணையை சரியான முறையில் சுத்தம் செய்வது எப்படி?" என்கிற தெளிவு நமக்கு தேவைப்படுகிறது.

1. வடிகட்டி மூலம் சுத்தம் செய்யவும் : ஒரு வடிகட்டி, ஒரு மெல்லிய சல்லடை, ஒரு பேப்பர் காபி பில்டர் வழியாக பயன்படுத்திய எண்ணைய்யை வடிகட்டும் முன், அந்த எண்ணெய்யை குளிர்விக்க மறக்க வேண்டாம். வடிகட்டுவதன் முக்கிய நோக்கம் எண்ணெயில் மீதமுள்ள வறுபட்ட துகள்களை அகற்றுவதே ஆகும் என்பதையும் மறக்க வேண்டாம்.

2. கார்ன்-ஸ்ட்ராச் உடன் கலக்கவும்: பயன்படுத்தப்பட்ட எண்ணையை கார்ன் ஸ்ட்ராச் உடன் கலந்து அதை சூடு செய்யவும். இந்த இடத்தில் எண்ணெய் கொதிக்க விடாமல் பார்த்துக் கொள்ளவும். உடன் தொடர்ந்து கிளறவும்; பிறகு சுமார் 10 நிமிடங்கள் ஆறவிட்டு பின்னர் வடிகட்டவும்.

3. எலுமிச்சையை சேர்க்கவும் : ஒரு எலுமிச்சையை சிறு துண்டுகளாக நறுக்கி பயன்படுத்தப்பட்ட எண்ணெய்யில் போடவும். எஞ்சியிருக்கும் துகள்கள் எலுமிச்சையில் ஒட்டிக்கொண்டிருக்கும். அவற்றை வெளியே எடுத்து பின் வடிகட்டவும்.

4. வெளிச்சம் படாமல் வைக்கவும்: சமைப்பது மட்டுமே எண்ணெயை சீர்கொலைக்கும் ஒரு விஷயம் அல்ல. எண்ணெயை சரியான சமையல் நிலையில் வைத்திருக்க, ஈரப்பதம், ஒளி மற்றும் வெப்பத்திலிருந்து அதை விலக்கி வைக்க வேண்டும்.

5. சூடான இடத்தில் வைக்க கூடாது: அடுப்பில் இருந்து எண்ணெயை சற்று விலக்கியே வைக்கவும், மற்ற சமையல் வேளைகளில் இருந்து வெளிப்படும் இரண்டாம் நிலை வெப்பத்தால் அது பாதிக்கப்படலாம். மாறாக, குளிர்சாதனப் பெட்டியில் சேமித்து, கெட்டியானவுடன் கூட அதை பயன்படுத்தலாம்.