ஏர் ஃபிரையர் வாங்க பிளான் பண்றீங்களா..? இதை படிச்சுட்டு முடிவு பண்ணுங்க..!

வீட்டின் சமையலறையில் நம் வேலைகளை எளிதாக்க மற்றும் துரிதமாக சமைத்து முடிக்க எண்ணற்ற சாதனங்கள் உள்ளன. சாதாரணமாக நாம் அன்றாடம் பயன்படுத்தக் கூடிய மிக்ஸி, கிரைண்டர், கேஸ் ஸ்டவ் தொடங்கி மைக்ரோவேவ் ஓவன், எலெக்ட்ரிக் அடுப்பு போன்ற பல நவீன இயந்திரங்களை நாம் உபயோகித்து வருகிறோம்.

அந்த வகையில், இன்றைக்கு பெரும்பாலான மக்களால் விரும்பி வாங்கக் கூடிய பொருள்களில் ஒன்றாக ஏர் ஃபிரையர் இருக்கிறது. பயன்படுத்துவதற்கு எளிமையான முறையில் இருக்கிறது. வறுக்க வேண்டிய, பொறிக்க வேண்டிய உணவுப் பொருட்களை இதில் வைத்து சமைக்கும்போது மிகக் கடுமையான வறுவல் முறை தவிர்க்கப்படுகிறது. ஆகையால் அந்த உணவு நமக்கு ஆரோக்கியமானதாக இருக்கிறது.

எப்படி வேலை செய்கிறது : உணவுப் பொருளை வைக்கக் கூடிய பேஸ்கட்டை சுற்றியிலும் சூடான காற்று வலம் வந்தபடி இருக்கும். இந்தக் காற்று அனைத்து கோணங்களிலும் பரவும். இதனால், எண்ணெய் இல்லாமலே கூட உணவுப் பொருளை இது ஃபிரை செய்யும். அதாவது சிக்கன் அல்லது மீன் போன்ற எந்த உணவுப் பொருளுடனும் நீங்கள் சேர்க்கும் கொழுப்புச் சத்து, அதனுடனே இருந்து மொறுமொறுப்பாக இருக்கும்.

சூடான காற்று அனைத்து பக்கம் சரி சமமாக பரவுவதன் காரணமாக, மற்ற ஓவன்களைக் காட்டிலும் ஏர் ஃபிரையரில் சமையல் மிக துரிதமாக நடைபெறும். இதனால், உணவை தயார் செய்வது எளிமையான நடவடிக்கையாக மாறுகிறது. சாதாரணமாக நீங்கள் ஏர் ஃபிரையரில் ஒரு சிக்கனையோ அல்லது மீனையோ வைக்கும்போது, அதை எப்போது திருப்பி வைக்க வேண்டும் என்று உங்களுக்கு நினைவூட்டுகிறது.

எது சிறப்பானது? வழக்கமான ஓவன் அல்லது ஏர் ஃபிரையர், இந்த இரண்டில் எது சிறப்பானது என்று கேட்டால், இரண்டுமே சமையலுக்கு மிக உதவிகரமாக இருப்பவை தான். இரண்டுமே ஒரே தொழில்நுட்பத்தின் அடிப்படையில் தான் இயங்குகின்றன. எனினும், ஏர் ஃபிரையரில், சில உணவுகளை பிரத்யேகமாக ஃபிரை செய்வதற்கான வசதி இருக்கிறது.

எண்ணெய் இல்லாமல் எப்படி சமைக்கிறது : ஏர் ஃபிரையரில் சூடான காற்று மிக வேகமாக சுழல்வதன் காரணமாக எண்னெய் தேவைப்படுவதில்லை. எனினும், ஒரு டீஸ்பூன் அளவுக்கு எண்ணெய் சேர்ப்பதே நல்ல சுவையை உறுதி செய்யும். அதே நேரம் அதிக எண்ணெய் சேர்ப்பதை விரும்பவில்லை என்றால், லேசாக ஸ்பிரே செய்து விட்டால் போதுமானது.

ஃபிரட் டோஸ்ட் செய்ய முடியுமா : ஃபிரட் டோஸ்ட் செய்ய மிக எளிமையான வழிமுறைகளில் ஒன்றாக ஏர் ஃபிரையர் இருக்கிறது. டோஸ்டர் ஓவனைக் காட்டிலும் இதை சுத்தம் செய்வது மிகவும் எளிது என்பதால் பெரும்பாலான மக்களின் தேர்வாக ஏர் ஃபிரையர் இருக்கிறது.