இதய நோய்களைத் தவிர்க்க சமையல் முறையில் செய்ய வேண்டிய மாற்றங்கள்

இந்தியாவில் ஆண்டுதோறும் ஏற்படும் மரணங்களில் 28 சதவீதம் பேர் மாரடைப்பால் மரணம் அடைகின்றனர் என்று மத்திய சுகாதாரத் துறை அமைச்சகம் அண்மையில் நாடாளுமன்றத்தில் தெரிவித்தது. அதிர்ச்சிக்குரிய இந்த தகவலை கேட்பவர்களுக்கும் ஹார்ட் அட்டாக் வந்துவிடும் போல இருக்கிறது இன்றைய சூழல்.

ஆக, வயது, பாலின பேதமின்றி எல்லோருமே இதய நலன் குறித்து அக்கறை கொள்ள வேண்டியிருக்கிறது. குறிப்பாக வாழ்வியல் மாற்றங்களும், ஆரோக்கியமான உணவும் அவசியமாகிறது. அந்த வகையில் உணவுகளை மிக நன்றாக வேக வைத்து சாப்பிட வேண்டும் என்ற நினைப்பு பலருக்கும் இருக்கிறது.

ஆனால், மனம் நிறைந்த, வண்ணமயமான காய்கறிகள் மற்றும் பழங்களை உட்கொள்வது, சிறுதானியங்கள், பருப்புகள், நட்ஸ், மீன் போன்ற உணவுகள் தான் இதய ஆரோக்கியத்தை மேம்படுத்தக் கூடிய உணவுகளை எடுத்துக் கொள்வதுதான் இதய நலனை காக்க உதவும் என்று மருத்துவம் சொல்கிறது.

ஆக, இதய நலனுக்கு பரிந்துரைக்கப்பட்ட உணவுகளை நாம் குறைவில்லாமல் எடுத்துக் கொள்வது அவசியம். அதைவிட முக்கியமானது உணவை வேக வைக்கும் முறை ஆகும். ஏனெனில் உணவை வேக வைக்கும் அளவை பொறுத்து அதன் நிறம், சுவை, மனம் மற்றும் ஊட்டச்சத்து போன்றவை மாற்றம் அடைகின்றன. ஆக, கீழ்காணும் வழிமுறைகளை பின்பற்றுவது பயனுள்ளதாக அமையும்.

குறைவான தண்ணீர் பயன்பாடு : உணவுப் பொருட்களை வேக வைக்கும்போது முடிந்தவரை குறைவான தண்ணீர் பயன்படுத்த வேண்டும். ஏனெனில் கரையத் தகுந்த ஊட்டச்சத்துக்கள் வெளியேறுவதை இது தடுக்கும். அதே சமயம் காய்கறி வேக வைத்து தண்ணீர் வடித்தால், அதை கிரேவி, சாஸ் போன்றவற்றுக்கு பயன்படுத்திக் கொள்ளலாம். மேலும் பேக்கிங் சோடா பயன்படுத்துவதை தவிர்க்கவும்.

மிக அதிகமான தீ கூடாது : எந்த ஒரு உணவையும் மிதமான தீயில் வேக வைப்பது அவசியம் ஆகும். அவசரம் கருதி மிகக் கடுமையான அளவில் தீ மூட்டக் கூடாது. குறிப்பாக கிரில், பேக்கிங், பாய்லிங், வறுவல் போன்றவற்றை செய்யும்போது அளவான தீயில் சமைக்கவும். அதிக தீ கொண்டு சமைத்தால் புற்றுநோய், இதய நோய், நீரிழிவு போன்றவை வரலாம்.

பல எண்ணெய்களை பயன்படுத்த வேண்டும் : பல்வகை வித்துக்களில் இருந்து தயாரிக்கப்பட்ட எண்ணெய்களை பயன்படுத்துவது நல்லது. அப்படி இல்லை என்றால் இரண்டு மூன்று வகை எண்ணெய்களை சுழற்சி முறையில் மாற்றி, மாற்றி சமையலுக்கு பயன்படுத்தலாம். எண்ணெயில் வறுக்கப்பட்ட உணவுகளை குறைத்துக் கொள்ள வேண்டும்.