குளிர்காலத்தில் அதிகமாக கிடைக்கும் பச்சை பட்டாணி... உணவில் தினமும் ஏன் சேர்த்துக்கொள்ள வேண்டும்..?

பச்சை பட்டாணி பெரும்பாலும் உலர வைக்கப்பட்டு பின்னர் விற்பனைக்கு வருகின்றன. காய்ந்த பட்டாணி ஆண்டு முழுவதிலும் விற்பனைக்கு கிடைக்கும். அதே சமயம், உலர வைக்காமல் பச்சை பட்டாணி காயாகவே சில சமயம் விற்பனைக்கு வரும். பெரும்பாலும் குளிர்காலங்களில் பச்சை பட்டாணி காய்கள் விற்பனைக்கு வருகின்றன.

உலர்ந்த பட்டாணியை ஊற வைத்து நம் சமையலில் சேர்த்து கொள்ளலாம் அல்லது காய்களில் இருந்து பிரித்தெடுக்கப்படும் பச்சை பட்டாணியை நேரடியாக சமையலில் சேர்த்துக் கொள்ளலாம். வெஜ் பிரியாணி, வெஜ் குருமா, உருளைக்கிழங்கு மசால் போன்ற பல்வேறு உணவுகளில் பச்சை பட்டாணி முக்கிய இடத்தை பெறுகிறது.

பச்சை பட்டாணியில் வைட்டமின் ஏ, வைட்டமின் பி, வைட்டமின் சி, வைட்டமின் இ மற்றும் வைட்டமின் கே போன்ற சத்துக்கள் உள்ளன. இது மட்டுமல்லாமல் பொட்டாசியம், நார்ச்சத்து மற்றும் ஜிங்க் போன்றவை இதில் நிறைந்துள்ளன. ஊட்டச்சத்து மிகுந்த பச்சை பட்டாணியை குளிர் காலத்தில் சாப்பிடுவதன் மூலமாக இன்னும் சிறப்பான பலன்களை பெற முடியும்.

ரத்த சர்க்கரை அளவு கட்டுப்படும் : பச்சை பட்டாணியின் கிளைசமிக் இன்டெக்ஸ் அளவு மிக, மிக குறைவாகும். நாம் சாப்பிட்டவுடன் ரத்தத்தில் சர்க்கரை எவ்வளவு வேகமாக சேருகிறது என்பதை குறிப்பதுதான் கிளைசமிக் இன்டெக்ஸ் ஆகும். இது மட்டுமல்லாமல் பச்சை பட்டாணியில் புரதம் மற்றும் நார்ச்சத்து போன்றவை மிகுதியாக இருப்பதால் ரத்த சர்க்கரை அளவுகள் கட்டுக்குள் வரும்.

சரும ஆரோக்கியம் : சரும ஆரோக்கியத்தை மேம்படுத்த உதவுகின்ற வைட்டமின் பி6, வைட்டமின் சி மற்றும் ஃபோலேட் ஆகிய சத்துக்கள் பச்சை பட்டாணியில் உள்ளன. இது சருமத்தில் வருகின்ற அழற்சியை கட்டுப்படுத்தும். சருமத்தில் இயல்பாக இருக்க வேண்டிய கொலாஜென் மற்றும் எலாஸ்டின் புரதம் போன்றவற்றை பட்டாணி கொண்டுள்ளது.

புரதச்சத்து மிகுந்தது : நம் உடல் ஆற்றலுக்கு புரதச்சத்து மிக, மிக அவசியமாகும். இது மட்டுமல்லாமல் நார்ச்சத்தும் முக்கியமானது. இந்த இரண்டு சத்துக்களையும் மிகுதியாகக் கொண்டுள்ள பட்டாணி சாப்பிடுவதால் நம் உடல் வலுவடையும். குறிப்பாக, புரதம் நிறைந்த இறைச்சி உணவுகளை தவிர்க்கும் சைவ பிரியர்களுக்கு புரத தேவையை பட்டாணி நிறைவு செய்கிறது. வளர் இளம் குழந்தைகளுக்கு புரதச்சத்து மிகுதியாக தேவைப்படும் நிலையில், அவர்களுக்கு தினந்தோறும் ஒரு கை அளவு பட்டாணி அவித்து சாப்பிடக் கொடுக்கலாம்.

கொலஸ்ட்ரால் அளவுகள் சீரடையும் : நமக்கு மாரடைப்பு ஏற்படுவதற்கான முக்கிய காரணம் டிரைகிளிசைரைடு, விஎல்டிஎல் போன்ற கொலஸ்ட்ரால் ஆகும். பட்டாணியில் உள்ள நியசின் என்னும் சத்து, நம் உடலில் இந்த வகை கொலஸ்ட்ரால் உற்பத்தி ஆகுவதை தடுத்து, உடலுக்கு நன்மை பயக்கும் கொலஸ்ட்ரால் வகையை மேம்படுத்துகிறது.