கெட்ட கொழுப்புகளை குறைக்க ஒயின் உதவிகரமாக இருக்கிறதாம்.! ஆய்வு சொல்லும் தகவல்

கிறிஸ்துமஸ் பண்டிகை நெருங்கி வந்து கொண்டிருக்கிறது. இன்னும் ஓரிரு வாரங்களே எஞ்சியுள்ளன. இந்த பண்டிகை நாளில் சூடான சாக்லேட், வகை வகையான இனிப்புகள், கேக், ரொட்டிகள் என பலதரப்பட்ட உணவுகளை குறிப்பிட்ட அளவில் நாம் எடுத்துக் கொள்ள இருக்கிறோம்.

இது போன்ற உணவு பழக்கம் காரணமாகத்தான் உடல் பருமன், உடல் எடை கூடுதல் மற்றும் கொலஸ்ட்ரால் அளவு கூடுதல் போன்ற அபாயங்கள் வருகின்றன. மேலும் இதன் எதிரொலியாக இதய நோய் சம்பந்தப்பட்ட பிரச்சனைகளும் வருகின்றன. குறிப்பாக ஹார்ட் அட்டாக் அல்லது ஸ்ட்ரோக் போன்ற நோய்களின் மூலமாக உயிரிழப்பு ஏற்படுகிறது.

ஆனால், இதில் ஆறுதல் தருகின்ற விஷயம் என்னவென்றால் கிறிஸ்துமஸ் பண்டிகைக்கு நீங்கள் எடுத்துக் கொள்ளும் ஆரோக்கியமான பானம் ஒன்று உடலில் உள்ள கெட்ட கொழுப்புகளை குறைப்பதில் முக்கிய பங்கு வகிக்கிறதாம். அதுதான் மல்டு ஒயின்.

இனிப்பு மற்றும் கார சுவை மிகுந்த இந்த ஒயினானது பண்டிகை காலத்தில் பரவலாக எடுத்துக் கொள்ளக் கூடிய பானமாக இருக்கிறது. இதனை மிதமான அளவில் உட்கொள்ளும் போது உடலில் உள்ள கொலஸ்ட்ரால் குறைகிறது என்றும், ரத்தக் கட்டுகள் தடுக்கப்படுகின்றன என்றும் ஆய்வுகள் தெரிவிக்கின்றன.

ஒயினில் உள்ள ஆண்டி ஆக்ஸிடண்ட்கள் இயல்பாகவே நமது உடலில் நோய் எதிர்ப்பு சக்தியை மேம்படுத்தி, இதயம் சம்பந்தப்பட்ட நோய்களுக்கான வாய்ப்புகளை குறைக்கின்றன.

கொலஸ்ட்ராலை ஒயின் குறைப்பது எப்படி? பொதுவாக ஒயின் என்பது திராட்சை பழங்களில் இருந்து தயாரிக்கப்படுகிறது என்பது உங்களுக்கு தெரிந்த விஷயம் தான். திராட்சை பழங்களில் உள்ள பாலிபினால்ஸ் நம் கொலஸ்ட்ரால் கட்டமைப்புகளை உடைக்க கூடியதாகும். இத்துடன் ஒயினில் சேர்க்கப்பட்டுள்ள லவங்கப்பட்டையானது நமது உடலில் உள்ள அலர்ஜி மற்றும் வீக்கம் ஆகியவற்றை இயல்பாகவே குறைக்க கூடியதாகும்.

இது மட்டுமல்லாமல் நம் உடல் நலனுக்கு ஆரோக்கியம் தரக்கூடிய இஞ்சி, கிராம்பு, சிட்ரஸ் பழங்கள் போன்றவை ஒயினில் சேர்க்கப்படுகின்றன. விட்டமின் சி நிறைந்த சிட்ரஸ் பழங்கள் நோய் எதிர்ப்பு சக்தியை மேம்படுத்துகிறது. இஞ்சி உடலில் உள்ள அழற்சியை போக்குகிறது.

எச்சரிக்கை மிக அவசியம் : ஒயின் எடுத்துக் கொள்வதால் ஊட்டச்சத்து அதிகரிக்கிறது மற்றும் கொலஸ்ட்ரால் குறைகிறது என்ற பலன் கிடைத்தாலும் கூட, இதனை அதிகமாக எடுத்துக் கொள்ளக் கூடாது என்று மருத்துவர்கள் எச்சரிக்கின்றனர். நீங்கள் மிகுதியான அளவில் ஒயின் எடுத்துக் கொள்ளும்போது உங்களுக்கு அடுத்த நாள் காலையில் தலைவலி உண்டாகக்கூடும் மற்றும் ரத்த சர்க்கரை அளவுகள் அதிகரிக்கக்கூடும். இது மட்டுமல்லாமல் அளவுக்கு அதிகமாக ஒயின் எடுத்துக் கொள்வதால் உயர் இரத்த அழுத்தமும் அதிகரிக்கும்.

ஆக, கட்டுப்பாடு இல்லாமல் நீங்கள் ஒயின் எடுத்துக் கொள்ளும் பட்சத்தில் உடல் ரீதியாகவும், மனரீதியாகவும் உங்களுக்கு பிரச்சினைகள் ஏற்படக்கூடும். ஒன்று அல்லது இரண்டு கிளாஸ் அளவுகள் குடித்தால் அதிகப்பட்ச பலன்களை பெறலாம்.