இந்த உணவு வகைகளை ஒருபோதும் ஒன்றாக சேர்த்து சாப்பிடவே கூடாதாம்... மீறினால் என்ன ஆகும்..?

உடல் எடையை குறைக்க வேண்டும் என்று நீங்கள் மிக தீவிரமாக முயற்சி செய்து கொண்டிருக்கிறீர்கள் என்றால், உங்கள் உடலின் உள்ள கூடுதலான கொழுப்பை குறைப்பதும் மிக முக்கியமானது என்பதை தெரிந்து கொள்ளுங்கள். நீங்கள் உடலுக்கு சத்தான உணவுகளை சாப்பிடுபவர் மற்றும் உணவு குறித்து அதிக அக்கறை கொண்டிருப்பவர் என்றாலும் கூட, சில வகை உணவுகளை ஒரே சமயத்தில் சேர்த்து சாப்பிடுவது உங்களுக்கு சிக்கலை ஏற்படுத்துவதாக அமையும்.

சில உணவுகளை சேர்த்து எடுத்துக் கொள்ளும்போது நம் உடலில் அது செரிமானக் கோளாறுகளை ஏற்படுத்தும் என்றும், அதன் எதிரொலியாக உடலுக்கு தேவையான ஊட்டச்சத்துகளை உறிஞ்சும் நடவடிக்கை தடுக்கப்படுகிறது என்றும் ஊட்டச்சத்து நிபுணர்கள் மற்றும் ஆயுர்வேத நிபுணர்கள் தெரிவிக்கின்றனர்.

மாவுச்சத்து, புரதச்சத்து காம்பினேஷன் ஆகாது : புரதச்சத்து கொண்ட இறைச்சியுடன், மாவுச் சத்து கொண்ட உருளைக்கிழங்கு அல்லது பிரெட் போன்றவற்றை சேர்த்து சாப்பிடக் கூடாது. புரதம் கரையும்போது மாவுச்சத்து புளித்துவிடும். இதனால் வயிறு உப்புசம், அசிடிட்டி போன்ற பிரச்சினைகள் ஏற்படும். அதே சமயம் நீங்கள் பீன்ஸ் மற்றும் சாதம் சாப்பிடுபவர் என்றால் அது நல்ல காம்பினேஷனாக இருக்கும்.

டீ அருந்தும் நேரத்தில் : மாலை நேரம் டீ அருந்தும்போது ஏதாவது ஸ்நாக்ஸ் சாப்பிட வேண்டும் என்பது நம் விருப்பமாக இருக்கும். ஆனால், உடல் எடையை குறைக்க இது தடையாக இருக்கும். மேலும், உணவுகளில் உள்ள இரும்புச்சத்தை உடல் உறிஞ்ச விடாமல் டீ தடுக்கும்.

சப்பாத்தி மற்றும் சாதம் : சில சப்பாத்தி, கொஞ்சம் காய்கறி மற்றும் சாதம் சேர்த்து மதிய உணவு சாப்பிடுவது பெரும்பாலானோரின் பழக்கமாக இருக்கிறது. ஆனால், சப்பாத்தியும், சாதமும் அதிக கிளைசமிக் இண்டெக்ஸ் கொண்ட தானிய உணவுகள் ஆகும். இது செரிமானம் தாமதம் ஆகுவதற்கும், உடலில் சர்க்கரை அளவு அதிகரிப்பதற்கு வழிவகை செய்யும். ஆகவே ஒரே சமயத்தில் இதை சாப்பிடக் கூடாது.

உணவுக்கு பிறகு இனிப்பு : மதிய வேளையில் வயிறு முட்ட சாப்பாடு சாப்பிட்டுவிட்டு, அதைத் தொடர்ந்து இனிப்பு சாப்பிடுவதை தவிர்க்க வேண்டும். இதனால் உடல் எடை அதிகரிக்கக் கூடும்.

ஜீரனத்தை கவனிக்க வேண்டும் : ஒவ்வொரு உணவும் எவ்வளவு நேரத்தில் ஜீரனம் ஆகும் என்பதை அறிந்து சாப்பிட வேண்டும். வெவ்வேறு கால அளவில் ஜீரனம் ஆகும் உணவுகளை ஒரே சமயத்தில் சேர்த்து சாப்பிடக் கூடாது.

மாவுச்சத்தும், இனிப்பும் : நாம் சேர்த்து சாப்பிடக் கூடாத உணவுகளில் இதுவும் ஒன்று. உதாரணத்திற்கு உருளைக்கிழங்கு சிப்ஸ் மற்றும் கோலா பானம் ஆகியவற்றை ஒரே சமயத்தில் எடுத்துக் கொள்ளக் கூடாது. உடல் எடை அதிகரிக்கும்.